ဖေဖော်ဝါရီ ၂၆၊ ၂၀၂၆။ ထားမြတ်/People’s Spring
ပြည်သူ့ကာကွယ်ရေးတပ်မတော်(PDF)ဟာ စစ်ကောင်စီကို ဆက်လက်တိုက်ပွဲဝင်နေဆဲဖြစ်ပြီး ပြည်သူလူထု အင်အားနဲ့ တော်လှန်ရေး (၅)နှစ်ခရီးမှာ အောင်ပွဲများစွာဆင်နွှဲနိုင်ခဲ့သလို တော်လှန်ရေးလှိုင်းအနိမ့်အမြင့်တွေကိုလည်း ကျော်ဖြတ်ခဲ့ရကြောင်း အမျိုးသားညီညွတ်ရေးအစိုးရ(NUG)၊ကာကွယ်ရေးဝန်ကြီးဌာန ဒုတိယ ဝန်ကြီး နိုင်ကောင်းရွက်က ပြောပါတယ်။
တနင်္သာရီတိုင်းစစ်ဌာနက ရဲဘော်တွေအတွက် ကျည်ကာပစ္စည်း တပ်ဆင်ပေးနိုင်ရေးလုပ်ဆောင်နေတဲ့ ဆီသို့လှမ်းချီ တနင်္သာရီကမ်ပိန်းမှာ ပြည်သူတွေ ပါဝင်ဖို့ တိုက်တွန်းစကား ပြောကြားရာမှာ ပြည်သူလူထု အင်အား အရေးကြီးကြောင်း ဒုဝန်ကြီးက ဖေဖော်ဝါရီ ၂၅ရက်မှာ အခုလို ပြောကြားခဲ့တာပါ။
” တော်လှန်ရေးလှိုင်း ဘယ်လောက်ပဲ ပြင်းထန်ပါစေ ပြည်သူလူထု အင်အားသာရှိရင် အမြဲရှေ့သို့ လှမ်းချီနိုင်မှာ ဖြစ်ပါတယ်”လို့ ဒုဝန်ကြီး နိုင်ကောင်းရွက်က ပြောပါတယ်။
Public Service Announcement
လက်ရှိမှာ တနင်္သာရီတိုင်းစစ်ဌာနအတွက် ကျည်ကာပစ္စည်းတွေ တပ်ဆင်ပေးနိုင်ဖို့ ကမ်ပိန်းမှာလည်း တော်လှန်ရေးရဲဘော်တွေအတွက် ကျည်ကာပစ္စည်းများ တပ်ဆင်ပေးနိုင်ရေး အားပေးကူညီဆောင်ရွက် ပေးဖို့ ဒုဝန်ကြီးက တိုက်တွန်းထားပါတယ်။
တနင်္သာရီတိုင်းစစ်ဌာန ကွပ်ကဲရေးမှူး ရဲဘော်စတားကလည်း ပြီးခဲ့တဲ့ နှစ်မှာ တိုက်ပွဲပေါင်း ၃၀၀ ကျော်ဖြစ်ခဲ့ပြီး စစ်ကောင်စီက တပ်ဖွဲဝင် ၁၀၀၀ ကျော်သေဆုံးကာ တနင်္သာရီတိုင်းစစ်ဌာန ဘက်က ရဲဘော် ၁၃၀ ထိခိုက်ကျဆုံးရှိခဲ့တယ်လို့ မကြာသေးမီက အသိပေးထားပါတယ်။
ကျဆုံးရဲဘော်တွေထဲမှာ ရှေ့တန်းထွက်စဉ် ကျည်ကာ အပါအဝင် အကာအကွယ်ပစ္စည်းတွေ မစုံလင်လို့ ကျဆုံးတာတွေလည်း ဖြစ်ပေါ်ခဲ့ရတယ်လို့ ပြောပါတယ်။
လာမယ့် စစ်ဆင်ရေးတွေဟာ ပြောက်ကျားစစ် ထက် ရင်ဆိုင်တိုက်ပွဲတွေ ဖြစ်လာတာဖြစ်လို ရဲဘော်တွေ အကာအကွယ်ရှိနေလို့ လိုအပ်ကြောင်းလည်း ရဲဘော်စတားက ပြောပါတယ်။
အထွေထွေထိုးစစ်မှာ တိုက်ခိုက်ရေးလုပ်နိုင်တဲ့ အင်အားတွေကို ထုတ်နုတ်ပြီး ချေမှုန်းရေးအဖွဲတွေနဲ့ထိုးစစ်ဆင်မှာဖြစ်လို ချေမှုန်းရေးတပ်မှာ ပါတဲ့ရဲဘော်တွေ တဦးချင်းစီအတွက် ကျည်ကာတွေလိုအပ်ကြောင်း အသိပေးထားပါတယ်။
