မတ်−၃၊၂၀၂၆။မိုမို/People’s Spring
မကွေးတိုင်း၊ ပခုက္ကူမြို့အနီးမှာ စစ်တပ်ကိုတိုက်ခိုက်ရာ ငါးဦးထိခိုက်သေဆုံးပြီး လက်နက် တစ်လက်သိမ်းရတယ်လို့ ပခုက္ကူခရိုင် Localတပ်ရင်းရဲ့ ပြန်ကြားရေးတာဝန်ခံက ပြောပါတယ်။
မနေ့က(မတ်လ ၂ ရက်)မှာ ကိုးပင်ကျေးရွာအနီး ဆက်ကြေးကောက်နေတဲ့ စစ်ကောင်စီတပ်သားတွေကို ဒရုန်းနဲ့ ဗုံးသီးချတိုက်ခဲ့တာလို့ ဆိုပါတယ်။
တိုက်ခိုက်မှုအတွင်း စစ်ကောင်စီတပ်သား ၃ ဦးသေဆုံးပြီး ၊ ၂ဦးထိခိုက်ကာ MA 3 သေနတ်တစ်လက် သိမ်းဆည်းရရှိတယ်လို့ အသိပေးပါတယ်။
Public Service Announcement
“ စစ်တပ်က ရှောင်တခင် စစ်တဲ့နေရာပေါ့။မနက်ခင်းမြို့ထဲကနေ ထွက်ပြီး ညနေပြန်တာမျိုးလုပ်တာပေါ့။ရှောင်တခင်ဝင်ဝင်ပြီး စစ်တာ။မနေ့က ကားသုံးစီးနဲ့ အင်အား ၃၀ဝန်းကျင်လောက်ပါတယ်” လို့ အထက်ပါ ပြန်ကြားရေးတာဝန်ခံက ပြောပါတယ်။
လက်ရှိမှာ ပခုက္ကူမြို့နယ်အတွင်း စစ်တပ်စစ်ကြောင်းတွေ လှုပ်ရှားမှုရှိပြီး ပခုက္ကူမြို့အခြေစိုက် တပ်မ(၁၀၁) ရိက္ခာတင်ယာဉ်အုပ်စုဟာ ကပစ(၂၄)ကို ထွက်ခွာဖို့ ပြင်ဆင်နေတာလို့ သူက အသိပေးပါတယ်။
ဒါကြောင့် မြေပြင်စစ်ကြောင်းနဲ့ အတူ လေကြောင်းတိုက်ခိုက်မှုတွေ လုပ်လာနိုင်တယ်တဲ့အတွက် အထူးသတိထားနေကြဖို့ အညာမြေ အရပ်ဖက်လူမှုအဖွဲ့အစည်း-မြိုင် တာဝန်ရှိသူက တိုက်တွန်းထားပါတယ်။
ပေါက်နဲ့ မြိုင်မြို့နယ်တွေမှာ စစ်ကောင်စီတပ်ရိက္ခာယာဥ်တန်းဖြတ်သန်းတိုင်း ပခုက္ကူခရိုင်အတွင်းက ကျေးရွာတွေကို လေကြောင်းတိုက်ခိုက်တာ၊ ကျေးရွာတွေမီးရှို့ပြီး ပြည်သူတွေကို လူသားဒိုင်းလုပ် ဖမ်းဆီးသတ်ဖြတ်တာတွေ ပြုလုပ်လေ့ရှိကြောင်း ဒေသခံတွေဆီက သိရပါတယ်။
