မတ်-၁၇၊ ၂၀၂၆။ ထားမြတ်/People’s Spring
သရက်ချောင်းမြို့နယ် ဝင်း၀ စစ်ကောင်စီတပ်စခန်းသိမ်းတိုက်ပွဲဆင်နွှဲနေတဲ့ ကာလမှာ သရက်နှစ်ခွ စစ်ကောင်စီစစ်ဆေးရေးဂိတ်ကိုလည်း ဒရုန်းနဲ့ တိုက်ခိုက်ခဲ့ကြောင်း ထားဝယ်ခရိုင် အမှတ်(၂) တပ်ရင်း T5 Wings ဒရုန်းတပ်ဖွဲ့က ထုတ်ပြန်ခဲ့ပြီး သရက်နှစ်ခွဂိတ် တိုက်ခိုက်ခဲ့မှု မှတ်တမ်း ရုပ်သံ ဖော်ပြပါတယ်။
ဝင်း၀ တပ်စခန်းကို ဖေဖော်ဝါရီ ၇ရက်မှာ ကရင်အမျိုးသားလွတ်မြောက်ရေးတပ်မတော်(KNLA) ပူးပေါင်းတပ်က စတင်ထိုးစစ်ဆင်ခဲ့ရာ မတ်လ ၁၁ရက်မှာ အပြီးသတ်သိမ်းပိုက်နိုင်ခဲ့တာပါ။
အဲဒီကာလမှာ သရက်နှစ်ခွဂတ်ကို ဒရုန်းနဲ့ ဗုံးအလုံး ၁၀၀ ကျော် အသုံးပြုပြီး နေ့ည တိုက်ခိုက်ခဲ့ကြောင်း ထုတ်ပြန်ပါတယ်။ ဖော်ပြခဲ့တဲ့ ရုပ်သံမှာလည်း သရက်နှစ်ခွဂိတ်က စစ်ကောင်စီ တပ်စွဲရာနေရာ အဆောက်အဦးတွေ ပျက်စီး၊မီးအောင်အောင် ဒရုန်းနဲ့ တိုက်ခိုက်ခဲ့တာလည်းတွေ့ရပါတယ်။ အဲဒီတိုက်ခိုက်မှုတွေမှာ စစ်ကောင်စီတပ်သေဆုံးထိခိုက်ရှိမရှိ အခြေအနေ ဖော်ပြမထားလို့ မေးမြန်းနိုင်ဖို့T5 Wings တပ်ဖွဲ့ထံ ဆက်သွယ်ထားဆဲဖြစ်ပါတယ်။
Public Service Announcement
တိုက်ခိုက်မှုကို T5 Wings ဒရုန်းတပ်ဖွဲ့၊ ဒေါင်းညီနောင်စစ်ကြောင်း PBDFဒရုန်းတပ်ဖွဲ့၊ Dragon Squad 2 TNI ဒရုန်းတပ်ဖွဲ့ တို့ ပူးပေါင်း တိုက်ခိုက်ခဲ့ကြောင်း အသိပေးပါတယ်။
အဲဒီဒရုန်းတပ်ဖွဲ့တွေဟာ ဝင်း၀ စခန်းသိမ်းတိုက်ပွဲမှာလည်း အတူတကွ ပူးပေါင်းပြီး စစ်ကောင်စီကို တိုက်ခိုက်ခဲ့တာဖြစ်ပါတယ်။
ဝင်း၀ စခန်းဟာ အင်အား ၁၀၀ကျော်နဲ့ တပ်စွဲထားတဲ့ စစ်ကောင်စီတပ်စခန်းဖြစ်ပြီး တစ်လကျော်ကြာ စခန်းသိမ်းတိုက်ပွဲအတွင်း စစ်ကောင်စီဘက်က ၅၀ကျော်သေဆုံးကာ လက်နက် အလက် ၄၀ ကျော်သိမ်းရခဲ့ကြောင်း KNLA သတင်းရင်းမြစ်က ပြောပါတယ်။ ထွက်ပြေးသွားတဲ့ စစ်ကောင်စီတပ်သား ၆၀ ကျော်ရှိပြီး လိုက်လံရှင်းလင်းရာ စစ်ကောင်စီတပ်ဖွဲ့ဝင်တွေ ထပ်မံသေဆုံးတာ လက်နက်တွေ သိမ်းရတာတွေရှိတယ်လို့ အသိပေးပါတယ်။
ဝင်း၀တပ်စခန်းလို စစ်ဆင်ရေးတွေ ဆက်လက်ဖော်ဆောင်သွားဖို့ရှိတယ်လို့လည်း စခန်းသိမ်းတိုက်ပွဲပါဝင်ခဲ့တဲ့ PDF တနင်္သာရီတိုင်းစစ်ဌာနက ထုတ်ပြန်ထားပါတယ်။
စစ်တပ်ရဲ့ သရက်နှစ်ခွဂိတ်ကို တော်လှန်ရေးတပ်တွေ ဗုံးသီး ၁၀၀ကျော်ကြဲ တိုက်ခိုက် မတ်-၁၇၊ ၂၀၂၆။ ထားမြတ်/People’s…
Posted by People's Spring on Tuesday 17 March 2026
ရုပ်သံ – T5 Wings
