မတ်-၁၉၊ ၂၀၂၆။ ရှိန်း/People’s Spring
မန္တလေးတိုင်း၊ မတ္တရာမြို့နယ် အနောက်ခြမ်းက မိုးကြိုးရွာနဲ့ စိန်ပန်းကုန်းရွာကြားမှာ ဆက်ကြေးကောက်ဖို့လာတဲ့ ပျူစောထီးတွေ တိုက်ခိုက်ခံရပြီး ရွာကို ဒရုန်းနဲ့ ဗုံးကြဲလို့ နေအိမ် ၆လုံး မီးလောင်ပျက်စီးခဲ့တယ်လို့ ဒေသခံတွေက ပြောပါတယ်။
မတ်လ ၁၇ ရက်က မတ္တရာမြို့နယ် အနောက်ခြမ်း ရှင်လှရွာက ပျူစောထီးနဲ့ စစ်အုပ်စု ၇ဦးဟာ ကျေးရွာတွေကို ဆက်ကြေးကောက်ဖို့ ထွက်လာစဉ် စိန်ပန်းကုန်းနဲ့ မိုးကြိုးရွာကြားမှာ မတ္တရာမြို့နယ်ပကဖက ဆီးကြိုတိုက်ခိုက်ခဲ့တာလို့ သိရပါတယ်။
မျက်မြင် စစ်သားနှစ်ဦး သေဆုံးပြီး အဲဒီတပ်က ရှင်လှရွာထဲပြန်သွားပြီး မနေ့က မိုးကြိုးရွာထဲကို ဒရုန်းနဲ့ ဗုံးကြဲတိုက်ခိုက်ခဲ့တာလို့ ဒေသခံတွေက ဆိုပါတယ်။
Public Service Announcement
“ရွာထဲက အိမ်တွေ ပေါ်ကိုလိုက်ကြဲတာ။ ဗုံးခိုကျင်းကြောင့် လူတွေလွတ်သွားတာ။ နေအိမ် ၆လုံး မီးလောင်ပြီး ဒဏ်ရာရတဲ့သူ ၂ယောက်လောက် ရှိတယ်”လို့ ဒေသခံတစ်ဦးက ပြောပါတယ်။
မတ္တရာမြို့နယ်အနောက်ခြမ်းကို စစ်တပ်က ကျေးရွာတွေမှာ တရွာကို ၁၀ဦး၊ ၁၅ဦးနဲ့ တပ်ဖြန့်တပ်စွဲထားတယ်လို့ သိရပါတယ်။ ကျေးရွာဒေသခံတွေကို နေအိမ်ပြန်ဝင်ပါက တအိမ်လျှင် ငွေကျပ် ၃၀,၀၀၀ တောင်းပြီး ရွာထဲပြန်နေခိုင်းကာ မကြာခဏ ဆက်ကြေး တောင်းတာ တွေလည်းရှိတယ်လို့ ဒေသခံတွေက ပြောပါတယ်။
