မေ-၄၊ ၂၀၂၆။မေရီ/People’s Spring
မန္တလေးမြို့ကလမ်းမတွေပေါ်မှာ အာဏာသိမ်းစစ်ကောင်စီရဲ့အဖွဲ့စုံစစ်ဆေးဖမ်းဆီးမှုတွေ ပြန်လည်အရှိန်မြှင့်လုပ်လာကြောင်း မြို့ခံတွေက ပြောပါတယ်။
သင်္ကြန်မတိုင်မီက မန္တလေးမြို့တွင်းမှာ စစ်ဆေးဖမ်းဆီးတဲ့အဖွဲ့တွေ အနည်းငယ်လျော့နည်းသွားခဲ့ပေမဲ့ ယခုမေလ ၁ ရက်ကစတင်ပြီး အဖွဲ့စုံစစ်ဆေးဖမ်းဆီးတဲ့အဖွဲ့တွေ ပြန်လည်များပြားလာကြောင်း မြို့ခံတွေက ပြောပါတယ်။
“၃ရက်လောက်ရှိပြီပြန်များလာတာ။”လို့ မန္တလေးမြို့ခံတစ်ဦးက ပြောပါတယ်။
Public Service Announcement
ယနေ့ မေလ ၄ ရက် တစ်ရက်တည်း မန္တလေးမြို့မှာ စစ်ဆေးဖမ်းဆီးတဲ့အဖွဲ့ ၁၇ ဖွဲ့တိတိ ရှိနေကြောင်း Voice of Mandalay အဖွဲ့ရဲ့အချက်အလက်အရ သိရပါတယ်။
အဲဒီအဖွဲ့တွေဟာ ယာဥ်တွေအပြင် စုံ/မစစ်ဆေးတာ၊ လက်ကိုင်ဖုန်းတွေကိုပါ စစ်ဆေးတာတွေ ပြုလုပ်နေတယ်လို့ မြို့ခံတွေက ပြောပါတယ်။
“စုံ/မ စစ်တယ်ဆိုလို့ ကားကိုပတ်မောင်းနေရတယ်။ တော်တော်အလုပ်ရှုပ်တယ်”လို့ မြို့ခံကားပိုင်ရှင်တစ်ဦးက ပြောပါတယ်။
မန္တလေးမြို့၊ မဟာမုနိ ဘုရားကြီး အနောက်မုခ်ဦးအဝင်ရှေ့မှာလည်း ရဲနဲ့ယာဥ်ထိန်း အင်အား ၂၀ခန့်နဲ့ ၃ ရက်ဆက် နေ့စဥ် စစ်ဆေးဖမ်းဆီးနေလို့ ပြည်သူတွေသတိပြုသွားလာကြဖို့ MDY Revolution က သတိပေးထားပါတယ်။
စစ်ဆေးရေးအဖွဲ့က စစ်အုပ်စုဝင်တွေဟာ မော်တော်ယာဥ်ပိုင်ရှင်တွေဆီကနေ ငွေကျပ် သောင်းဂဏန်းကနေ သိန်းချီအထိ ငွေညှစ်တောင်းလေ့ရှိတယ်လို့ သိရပါတယ်။
