ဇွန် – ၂၆ ၊၂၀၂၆ ၊နိုင်ပကောင်း/People’s Spring
ကရင်ပြည်နယ်၊ ကမမောင်း-ဖာပွန်လမ်းပိုင်းနဲ့ မြ၀တီ-ဝေါ်လေ-စုကလိလမ်းပိုင်းတွေကို ပြန်လည်စိုးမိုးထိန်းချုပ်နိုင်ဖို့ အာဏာသိမ်း စစ်တပ်က တန်ပြန်ထိုးစစ်ဆင်နေတာကြောင့် KNU ဦးဆောင်တဲ့ပူးပေါင်းတပ်တွေနဲ့ တိုက်ပွဲတွေ ဆက်ဖြစ်နေတယ်လို့ကရင်သတင်းရင်းမြစ်တွေကပြောပါတယ်။
KNU မူတြော်(ဖာပွန်)ခရိုင်၊ တပ်မဟာ(၅)နယ်မြေအတွင်းကမမောင်း-ဖာပွန်လမ်းပိုင်းနဲ့ ဖာပွန်ဗျုဟာအပါအဝင်သိမ်းပိုက်ခံထားရတဲ့ တပ်ရင်းတွေ၊ စခန်းတွေအားလုံး ပြန်လည်ရယူနိုင်ဖို့အတွက်ပြီးခဲ့တဲ့ မေလကတည်းက စစ်တပ်ကကမမောင်းမြို့ကနေ ထိုးစစ်ဆင်နေရာလက်ရှိမှာကတိုင်တိရွာအနီးမှာ ရောက်ရှိနေပြီလို့သိရပါတယ်။
အာဏာသိမ်းစစ်တပ်စစ်ကြောင်းကို ကရင်နယ်ခြားစောင့်တပ်(BGF) အမှတ်(၁၀၁၄)တပ်ရင်းနဲ့ ဗိုလ်ဘိဦးဆောင်တဲ့ တိုးတက်သောဗုဒ္ဓဘာသာကရင်အမျိုးသားတပ်မတော်(DKBA)တပ်ဖွဲ့ဝင်တွေက လမ်းပြပို့ဆောင်ပေးတယ်လို့ BGF သတင်းရင်းမြစ်တစ်ဦးက ပြောပါတယ်။
Public Service Announcement
“စစ်ကြောင်းကကတိုင်တိနားရောက်လာပြီ ၊ခေါင်းပေါင်းဝါ(DKBA)တို့ BGF တို့က လိုက်ပို့ပေးတယ်လေ၊(လက်နက်ကြီး)အသံတွေက အမြဲကြားနေရတယ်” လို့ အဲဒီသတင်းရင်းမြစ်က ပြောပါတယ်။
စစ်ကြောင်းထိုးလာတဲ့စစ်တပ်ကဘောကျို့ထရွာသား ၃၂ ဦးကို ပြီးခဲ့တဲ့ မေလ ၃၀ ရက်နေ့က ဖမ်းဆီးထိန်းသိမ်းထားပြီး အဲဒီအထဲမှာ ကလေးနဲ့ သက်ကြီးရွယ်အိုတွေလည်း ပါဝင်တယ်လို့ KNU မူတြော်ခရိုင် ပြောခွင့်ရ ပဒိုစောထို့ရော်ဘင်က KIC ကရင်သတင်းစဉ်ကို ဖြေကြားထားပါတယ်။
မြ၀တီခရိုင်၊ထိုင်း-မြန်မာနယ်စပ်ဖလူး၊မင်းလက်ပံဒေသမှာလည်းစစ်တပ်စစ်ကြောင်းတွေကလအတန်ကြာတဲ့အထိ ထိုးစစ်ဆင်တိုက်ခိုက်ခဲ့ပေမယ့် ဖလူး၊ မင်းလက်ပံရွာတွေကို မကျော်နိုင်သေးသလို နယ်စပ်ဝေါ်လေမြို့နားက စစ်တပ်ဗျူဟာကုန်းကို KNU ပူးပေါင်းတပ်တွေက ဆက်လက်ဝိုင်းရံပြီး ပိတ်ဆို့တိုက်ခိုက်နေဆဲပါ။
ဝေါ်လေဗျူဟာကုန်းမကျဖို့အတွက်စစ်တပ်ကလေကြောင်းအားပြုပြီး ခုခံခဲ့တယ်လို့သိရပါတယ်။
မြ၀တီမြို့တောင်ဘက်မင်းလက်ပံရွာနဲ့ ဖလူးကျေးရွာတွေကိုသိမ်းပိုက်နိုင်ရေးအတွက်စစ်တပ်နဲ့အတူ ဗိုလ်ဘိဦးဆောင်တဲ့ တိုးတက်သောဗုဒ္ဓဘာသာကရင်အမျိုးသားတပ်မတော်(DKBA)တို့ ပူးပေါင်းပြီး စစ်ကြောင်းထိုးမယ်လို့ သိရကြောင်းကရင်သတင်းရင်းမြစ်က ပြောပါတယ်။
မင်းလက်ပံနဲ့ ဖလူးဒေသမှာ ဇွန်လ ၂၂ ရက်နေ့ကတိုက်ပွဲတွေဖြစ်ပွားခဲ့ရာလက်နက်ကျည်တချို့ထိုင်းနိုင်ငံဘက်ကျရောက်ခဲ့တာကြောင့် ထိုင်းစစ်တပ် ကနယ်စပ်ဒေသကို လုံခြုံရေးတင်းကျပ်ထားပြီး စာသင်ကျောင်းတွေလည်း ပိတ်ထားပါတယ်။
