ဖယ်ခုံ PDF က စစ်ကောင်စီသီးသန့်သုံးမဟာဓါတ်အားလိုင်း တာဝါတိုင် ၂ ခုကို မိုင်းခွဲဖျက်ဆီးခဲ့တယ်လို့ ယနေ့ညမှာ သတင်းထုတ်ပြန်ပါတယ်။
စစ်ကောင်စီက ပြည်သူတွေအပေါ် ကျူးလွန်နေတဲ့ ရက်စက်ယုတ်မာမှုတွေကို ကာကွယ်နိုင်စေဖို့ရယ်၊ အကြမ်းဖက်စစ်ကောင်စီရဲ့ ယန္တရားလည်ပတ်မှုတွေကို ဟန့်တားနိုင်ဖို့အတွက် ဖယ်ခုံမြို့နယ်နဲ့ပင်လောင်းမြို့နယ်ကြား လွယ်ဟွဲကျေးရွာနားမှာ လောပိတအမှတ် ၃ စက်ရုံမှ နေပြည်တော်သွယ်တန်းထားတဲ့ စစ်ကောင်စီသီးသန့်သုံး တာဝါတိုင် နှစ်တိုင်ကို သြဂုတ် ၁၂ ရက်ညနေမှာ ဗုံးခွဲဖျက်ဆီးခဲ့တာလို့ထုတ်ပြန်ချက်မှာဖော်ပြထားပါတယ်။
ပြည်သူလူထု သုံစွဲတဲ့လိုင်းမဟုတ်ဘဲ စစ်ကောင်စီသီးသန့်သုံး ဓါတ်အားလိုင်းကိုတာ ဖျက်ဆီးခဲ့တာလို့လည်း ပါရှိပါတယ်။
ဒါအပြင် စစ်ကောင်စီတပ်နဲ့ စစ်ကောင်စီသြဇာခံ PNO တပ်ဖွဲ့တွေ ချီတက်လာတဲ့စစ်ကြောင်းကို ပင်လောင်းမြို့နယ် ပင်ပုံရွာနဲ့ လွယ်ဟွဲရွာကြားမှာ သြဂုတ် ၁၄ ရက်နေ့က ဖယ်ခုံ PDF နဲ့တိုက်ပွဲဖြစ်ပွားတာကြောင့် စစ်ကောင်စီနဲ့PNO တပ်ဖွဲ့ဝင်အများအပြားသေဆုံးဒဏ်ရာရရှိခဲ့တယ်လို့ ဆိုပါတယ် ။ ဖယ်ခုံ PDF ထောင်ထားတဲ့မိုင်း ၅ လုံးထက်မနည်းနင်မိပြီး အထိနာခဲ့တာဖြစ်ပါတယ်။ ဖယ်ခုံ PDF ဘက်ကတော့ ၂ ဦး ဒဏ်ရာရရှိခဲ့တယ်လို့ ထုတ်ပြန်ပါတယ်။
သြဂုတ် ၁၅ ရက်မှာလွိုင်ကော်ဘက်က စစ်ကူလာတဲ့ စစ်ကောင်စီယာတန်း ၃၈ စီး အင်အား ၄၀၀ ကျော် ကို ဖယ်ခုံ- လွိုင်ကော်လမ်ပေါ်မှာ ဖယ်ခုံနဲ့ မိုးဗြဲ PDF တွေက ခြုံခိုတိုက်ခိုက်ခဲ့တဲ့အတွက် စစ်ကောင်စီတပ် သေဆုံး၊ဒဏ်ရာရသူများပြီး အထိနာခဲ့ပြန်ပါတယ် ။ ပြည်သူ့ကာကွယ်ရေးတပ်တွေဘက်ကတော့ ၁ ဦးဒဏ်ရာရခဲ့ပါတယ် ။ ဖယ်ခုံနဲ့ မိုးဗြဲ PDF တွေနဲ့အတူ PDF-DMO ၊ KA နဲ့ KNDF တို့ကစွမ်းစွမ်းတမံပူးပေါင်းတိုက်ခိုက်ပေးခဲ့တယ်လို့လည်း သိရပါတယ်။
အခုအခါမှာ စစ်ကောင်စီတပ်တွေက မိုင်းခွဲဖျက်ဆီးခံရတဲ့ တာဝါတိုင်အနီးရှိတောင်ကုန်းများ၊ ဖယ်ခုံမြို့နယ် လွယ်ဟွဲကျေးရွာ ၊ပင်လောင်းမြို့နယ် ပင်ပုံကျေးရွာတွေမှာ အင်အားအလုံးအရင်းနဲ့တပ်စွဲထားသလို စစ်ရေးတင်းမာနေတယ်လို့ ဖယ်ခုံ PDF ကထုတ်ပြန်ပါတယ်။
Video – PDF Pekhon