ဆိုက်ပရပ်စ် နိုင်ငံမှာ Deltaနဲ့ Omicron မျိုးကွဲ ကိုရိုနာဗိုင်းရပ်စ်တွေ ပေါင်းစပ်ထားတဲ့ မျိုးကွဲသစ် ဗိုင်းရပ်စ် ကူးစက်မှုတချို့ ရှိနေကြောင်း သတင်းတွေ ထွက်ပေါ်လာပါတယ်။
ကိုဗစ်ရောဂါ ဖြစ်ပွားစေတဲ့ Sars-Cov-2 ကိုရိုနာဗိုင်းရပ်စ် မျိုးကွဲ အားလုံးထဲမှာ လူသိအများဆုံးဖြစ်တဲ့ နှစ်မျိုးရဲ့ မျိုးဗီဇ ဝိသေသ လက္ခဏာတွေက အဲဒီမျိုးစိတ်သစ်မှာ ရောနှောပါဝင်နေတယ်လို့ ဆိုပါတယ်။ ဒီမျိုးကွဲသစ်ကို တရားဝင် နာမည် မပေးရသေးပေမယ့် ပြည်တွင်းက ဆေးသိပ္ပံ ပညာရှင်တွေကတော့ Deltacronလို့ ရည်ညွှန်း သုံးနှုန်းနေပါတယ်။
အဲဒီ မျိုးစပ် ဗိုင်းရပ်စ်အသစ်ဟာ Omicronနဲ့ Deltaတို့ရဲ့ ကြောက်စရာ အကောင်းဆုံး ဝိသေသတွေ ပိုင်ဆိုင်နေမှာကို ဆိုက်ပရပ်စ် သုတေသီတွေက စိုးရိမ်နေကြပါတယ်။ Deltaလို ရောဂါလက္ခဏာတွေ ပြင်းထန်ပြီး Omicronလိုမျိုး ကူးစက်နှုန်း အရမ်းမြန်မှာကို စိတ်ပူနေကြတာပါ။ ကနဦး အဆင့်အဖြစ် ဆိုက်ပရပ်စ်မှာ Deltacron ကူးစက်ပြီး ဆေးရုံရောက်လာသူ ၂၅ ဦး တွေ့ရှိထားပြီး ဆေးရုံ တက်ရတဲ့ထိ ရောဂါမပြင်းတဲ့ လူနာတွေလည်း ရှိတယ်လို့ ဆိုပါတယ်။
အမေရိကန် အခြေစိုက် Franciscan ကျန်းမာရေး သုတေသနဌာနရဲ့ ဒုတိယ ဥက္ကဋ္ဌ ခရစ္စတိုဖာ ဒိုဟာရင်းကတော့ လူတွေ အနေနဲ့ အရမ်းကြီး စိုးရိမ် စိတ်ပူဖို့တော့ မလိုသေးဘူးလို့ ပြောပါတယ်။ အဆိုးထဲက အကောင်းအနေနဲ့ လွန်ခဲ့တဲ့ ၃ လအတွင်း ကမ္ဘာတလွှားမှာ Omicronနဲ့ Delta ကူးစက်မှုတွေ အရမ်းများခဲ့တာကြောင့် ဒီဗိုင်းရပ်စ်တွေရဲ့ ဆက်စပ် မျိုးကွဲအတွက်လည်း လူအများစုမှာ ကိုယ်ခံအား Antibody ရှိနေလိမ့်မယ်လို့ ဒေါက်တာ ဒိုဟာရင်းက သုံးသပ်ပါတယ်။
Public Service Announcement
Deltacronရဲ့ အန္တရာယ် ပေးနိုင်စွမ်းဟာ ဘယ်လောက်ထိ ကျယ်ပြန့် အားကောင်းလာမလဲ ဆိုတာကို ခန့်မှန်းဖို့တော့ စောလွန်းသေးတယ်လို့လည်း သူက ဆိုပါတယ်။ ကမ္ဘာ့ကျန်းမာရေး အဖွဲ့ကြီး (WHO)ကတော့ Deltacronနဲ့ ပတ်သက်လို့ စုံစမ်း လေ့လာနေဆဲဖြစ်ပြီး ဘာအတည်ပြုချက်မှ မပေးသေးပါဘူး။
WHOရဲ့ မော်လီကျူးဗေဒ ပညာရှင် တစ်ဦးဖြစ်တဲ့ အဲရစ်တိုပဲလ်က Deltacronရဲ့ ဖြစ်တည်မှုကို လက်တွေ့ ယုံကြည်ဖို့ ခက်ခဲကြောင်း၊ ဓာတ်ခွဲခန်းထဲက စမ်းသပ်မှု ရလဒ်တစ်ခုတောင် ဖြစ်ချင် ဖြစ်နိုင်ကြောင်း Twitterမှာ မှတ်ချက်ပေး ရေးသားထားပါတယ်။
