စစ်တပ်ရဲ့ အကြမ်းဖက်မှုတွေကို ရိုက်ကူးထားတဲ့ မှတ်တမ်းရုပ်ရှင်

စစ်တပ်ကအာဏာသိမ်းပြီးနောက် အကြမ်းဖက်ခံနေရတဲ့ မြန်မာပြည်သူတွေ အကြောင်း ရိုက်ကူးထားတဲ့ Myanmar Diaries ဇာတ်ကားဟာ ဘာလင်ရုပ်ရှင်ပွဲတော်မှာ မှတ်တမ်းရုပ်ရှင်ဆုရရှိခဲ့ပါတယ်။

ဒီမှတ်တမ်းရုပ်ရှင်ကားကို အမည်မဖော်လိုတဲ့ မြန်မာလူငယ် ရုပ်ရှင်ဖန်တီးသူ ဆယ်ဦးက ရိုက်ကူးခဲ့တာဖြစ်ပြီး အာဏာသိမ်းပြီးတဲ့နောက် စစ်တပ်ရဲ့ ရက်စက်ကြမ်းကြုတ်မှုတွေနဲ့အတူ ပြည်သူတွေရဲ့ စစ်အာဏာရှင်ဆန့်ကျင်ရေးပြုလုပ်မှုတွေကိုလည်း ထည့်သွင်းရိုက်ကူးထားပါတယ်။

“ကမ္ဘာတဝှမ်းက သတင်းခေါင်းကြီးပိုင်းတွေကနေ ပျောက်ကွယ်လုနီးပါးဖြစ်နေတဲ့ မြန်မာနိုင်ငံအတွက် အလွန်အရေးကြီးတဲ့ ဇာတ်ကားတစ်ကားပါ” လို့ သူတို့ရုပ်ရှင်အညွှန်းမှာ ဖော်ပြထားပါတယ်။

ဘာလင်ရုပ်ရှင်ပွဲတော်ကို ၇၂ ကြိမ်မြောက်ပြုလုပ်တာဖြစ်ပြီး ဆုပေးပွဲကို ဖေဖော်ဝါရီ ၁၆ ရက်ကပြုလုပ်ခဲ့တာပါ။

Public Service Announcement

Myanmar Diaries ဇာတ်ကားအတွက် ရရှိတဲ့ဆုကိုတော့ ချက်နိုင်ငံသား ဒါရိုက်တာ Petr Lom နဲ့ ဒတ်ခ်ျနိုင်ငံက ထုတ်လုပ်သူ Corinne van Egeraat တို့ ကလက်ခံခဲ့ပြီး ဆုကြေးငွေ ယူရို လေးသောင်းရရှိတယ်လို့သိရပါတယ်။

ဒီရုပ်ရှင်ကို Myanmar Film Collective က နယ်သာလန် နဲ့ နော်ဝေ က ရုပ်ရှင်ထုတ်လုပ်​ရေးကုမ္ပဏီ နှစ်ခုနဲ့ ပူးပေါင်းထုတ်လုပ်ခဲ့တာဖြစ်ပါတယ်။