ကျူးကျော်စစ် စတင်ပြီးတာနဲ့ ရုရှားဟာ ကြိုတင် စာရင်းပြုစု ရွေးချယ်ထားတဲ့ ယူကရိန်း နိုင်ငံသားတွေကို ပစ်မှတ်ထား သတ်ဖြတ်တာတွေ ဖြစ်လာနိုင်ကြောင်း အမေရိကန်က ပြောကြားခဲ့ပါတယ်။
စစ်ထောက်လှမ်းရေး သတင်းတွေအရ ရုရှားဟာ ယူကရိန်းကို ကျူးကျော် သိမ်းပိုက်ပြီးတာနဲ့ သုတ်သင်ဖို့၊ ဒါမှမဟုတ် ဖမ်းဆီး အကျဉ်းချဖို့ လူစာရင်းတွေ ကြိုတင် ပြုစုထားကြောင်း အမေရိကန် အာဏာပိုင်တွေက ကုလသမဂ္ဂကို သတိပေးခဲ့ပါတယ်။ ယူကရိန်းကိုသာ ရုရှားက ကျူးကျော်ခဲ့မယ်ဆိုရင် ဆိုးရွားလွန်းတဲ့ လူ့အခွင့်အရေး ချိုးဖောက်မှုတွေ ကြုံလာလိမ့်မယ်လို့လည်း အမေရိကန်က ဆိုပါတယ်။
ကုလသမဂ္ဂ လူ့အခွင့်အရေး ကောင်စီကို လိပ်မူပြီး အမေရိကန်က ပေးပို့ထားတဲ့ အကြောင်းကြားစာထဲမှာ ရုရှား စစ်ဘက် အနေနဲ့ သုတ်သင်ဖို့၊ ဒါမှမဟုတ် အကျဉ်းစခန်းတွေကို ပို့ဆောင်ဖို့ ရည်ရွယ်ထားတဲ့ ယူကရိန်း နိုင်ငံသား စာရင်းကို ပြုစုထားပြီးဖြစ်ကြောင်း ဖော်ပြ ပါရှိနေပါတယ်။
ဒါ့အပြင် ကျူးကျော်စစ်အပြီး ယူကရိန်းမှာ ရုရှား အကောင်အထည်ဖော်မယ့် အစီအစဉ်တွေက ညှင်းပန်း နှိပ်စက်တာတွေ၊ အစဖျောက်တာတွေ ပါဝင်နိုင်ပြီး အဆိုးဆုံး လူ့အခွင့်အရေး ချိုးဖောက်မှုတွေ ကြုံလာနိုင်တယ်လို့ ကုလသမဂ္ဂ၊ ဂျနီဗာဌာနရဲ့ အမေရိကန် ကိုယ်စားလှယ်က ပြောပါတယ်။
Public Service Announcement
တစ်ဖက်မှာလည်း အမေရိကန်ဟာ ရုရှား-ယူကရိန်း စစ်ပွဲကို သံတမန်ရေး နည်းလမ်းတွေနဲ့ ရှောင်လွှဲနိုင်ဖို့ မျှော်လင့်ချက်ကို လက်မလျှော့သေးပါဘူး။ ပြင်သစ်ရဲ့ ကြားဝင် စေ့စပ်ပေးမှုအရ တကယ်လို့ ရုရှားက ယူကရိန်းကို စစ်မတိုက်ဘူးဆိုရင် ရုရှား သမ္မတ ဗလာဒီမာ ပူတင်နဲ့ တွေ့ဆုံ ဆွေးနွေးဖို့ အမေရိကန် သမ္မတ ဂျိုးဘိုင်ဒန်က လက်ခံထားကြောင်းလည်း သိရှိရပါတယ်။
