လမ်းဘေးဈေးသည်တွေနဲ့ အမြဲစည်ကားနေလေ့ရှိတဲ့ လှည်းတန်းက ဒီနေ့မှာတော့ ဈေးသည်မရှိဘဲ ရှင်းလင်းနေပါတယ်။
အရင်က ညနေလေးနာရီလောက်ဆိုရင် စျေးသည်တွေဆိုင်စဖွင့်ပြီး လူတန်းစားစုံလာရောက် စားသောက်ကြတဲ့နေရာလေးပါ။
အမြဲလန်း လှည်းတန်း လို့တင်စားလေ့ရှိတဲ့ လှည်းတန်း မလန်းဆန်းနိုင်တာက တခြားကြောင့်တေ့မဟုတ်ပါဘူး။
ဇွန် ၂ ရက် ညနေက လမ်း ဘေး ဈေးဆိုင်တွေစဖွင့်တဲ့ အချိန် လက်နက်တွေကိုင်ထားတဲ့ စစ်ကောင်စီတပ်ဖွဲ့ဝင်တွေက ဆိုင်တွေ မဖွင့်ဖို့ ဖိအားပေးခဲ့တာပါ။
Public Service Announcement
ဇွန် ၃ ရက်ကစပြီး လှည်းတန်းတဝိုက်မှာ လမ်းဘေးဈေးသည်တွေ မဖွင့်ဖို့ အမိန့်ပေးခဲ့ပြီး ဒီနေ့ရောင်းဖို့ ပြင်ထားတဲ့သူတွေကိုလည်း ဆိုင်တွေပိတ်ဖို့ ညနေစောင်းမှာ နောက်တစ်ခေါက်လာဖိအားပေးခဲ့တာကြောင့် ဈေးသည်တွေ ပြေးလွှားခဲ့ရပါတယ်။
အရင်က အင်းစိန်လမ်းမပေါ်က လမ်းဘေးဈေးသည်တွေကိုသာ မရောင်းဖို့ ဖိအားပေးတတ်ပေမယ့် ဒီတစ်ခေါက်တော့ လှည်းတန်းလမ်းမနဲ့ လှည်းတန်းဈေးထဲက လမ်းဘေးဈေးသည် တွေကိုလည်း မဖွင့်ဖို့ အမိန့်ပေးခဲ့တာပါ။
လမ်းမတန်းပေါ်မှာတင်မဟုတ်ဘဲ လမ်းကြားတွေထဲမှာပါ ဖွင့်လို့ မရတော့ဘူးလို့ ပြောထားတာကြောင့် လမ်းကြားတွေထဲမှာလည်း ဆိုင်တွေ မတွေ့ခဲ့ရပါဘူး။
ဒီလိုပိတ်ခိုင်းတာက ရက်အကန့်အသတ်မရှိဘူးလို့လဲ လှည်းတန်းလမ်းမပေါ်မှာ ဈေးရောင်းသူတစ်ဦးကပြောပါတယ်။
အခုလိုဖြစ်ရတာက ပြီးခဲ့တဲ့ ရက်ပိုင်း လှည်းတန်းဈေးထဲမှာ လမ်းဘေးဆိုင်တွေကို ကားတစ်စီးကဝင်တိုက်ပြီးပြဿနာဖြစ်ခဲ့တာကြောင့်လို့ ဆိုပါတယ်။
ကားမောင်းလာတဲ့သူက စစ်တပ်ဘက်ကအရာရှိဖြစ်ပြီး လမ်းဘေးဈေးသည်ကို မကျေနပ်တာကြောင့် တိုင်းအထိ တိုင်ကြားခဲ့လို့ဖြစ်တာလို့ ဈေးသည်တစ်ဦးကဆိုပါတယ်။
လမ်းဘေးဈေးသည် အများစုက တစ်ရက်စာမိသားစုစားဝတ်နေရေးအတွက် ရုန်းကန်နေရသူများတာကြောင့် စိတ်မကောင်းဘူးလို့ အဲဒီအနားမှာနေထိုင်တဲ့ အသက် ၆၀ ကျော်အရွယ်အမျိုးသမီးတစ်ဦးက ပြောပါတယ်။
