တရုတ်နိုင်ငံ အလယ်ပိုင်း၊ ဟူပေပြည်နယ်က ရှီယန်းမြို့မှာ ဇွန်လ ၁၂ ရက် ညနေပိုင်းက ပေါက်ကွဲမှု ဖြစ်ခဲ့တာပါ။ အခင်းဖြစ်ရာ လူနေတိုက်မှာ အကြီးအကျယ် ပျက်စီးမှုတွေ ပေါ်ပေါက်ခဲ့ပါတယ်။
ကယ်ဆယ်ရေးတွေက လူ ၁၂ ဦးထက်မနည်း သေဆုံးပြီး ဒဏ်ရာရသူ ၃၇ ဦးထက်မနည်း ရှိခဲ့ကြောင်း ပြောပါတယ်။ ဒဏ်ရာရသူတွေထဲမှာ အခြေအနေ ဆိုးသူတွေလည်း ပါဝင်နေတာကြောင့် အသေအပျောက် ကိန်းဂဏန်းက မြင့်တက်လာဖွယ် ရှိနေပါတယ်။
ပေါက်ကွဲမှု ဖြစ်ပွားရာ ဧရိယာ တဝိုက်မှာ နေထိုင်သူ ၁၄၀ လောက်ကိုလည်း အရေးပေါ် ပြောင်းရွှေ့ပေးခဲ့ရပါတယ်။ ကယ်ဆယ်ရေးတွေက အပျက်အစီးပုံတွေ အောက်ထဲမှာ ပိတ်မိနေသူတွေ တော်တော်များများ ရှိမယ်လို့ ခန့်မှန်းထားပါတယ်။
ပေါက်ကွဲမှု ဖြစ်ပွားရတဲ့ အကြောင်းရင်းကိုတော့ လတ်တလော မသိရသေးပါဘူး။ လူနေ တိုက်ခန်းတွေဆီ ဓာတ်ငွေ့ ပို့ဆောင်ဖို့ သွယ်တန်းပေးထားတဲ့ ပိုက်လိုင်း တစ်ခုခုမှာ ချွတ်ယွင်းချက် ဖြစ်ရာက ပေါက်ကွဲခဲ့တယ်လို့တော့ ကနဦး ယူဆထားပါတယ်။
Public Service Announcement
