ဇွန်လ ၂၅ ရက်က သမ္မတ အိုင်ဗန် ဒူကေး လိုက်ပါလာတဲ့ ရဟတ်ယာဉ်ဟာ ဗင်နီဇွဲလားနဲ့ နယ်စပ်အနီး၊ ကူကက်တာ လေဆိပ်နားမှာ တိုက်ခိုက် ခံခဲ့ရတာ ဖြစ်ပါတယ်။ အာဏာပိုင်တွေက သမ္မတ လေယာဉ်ရဲ့ အမြီးပိုင်းနဲ့ ပန်ကာတွေမှာ သေနတ် ကျည်ဆန်ရာ အပေါက်တွေ ရှိနေတဲ့ ဓာတ်ပုံတွေကို ထုတ်ပြန် ပြသခဲ့ပါတယ်။
ဒီဖြစ်စဉ်မှာ ရဟတ်ယာဉ်ပေါ် လိုက်ပါလာသူတွေ ထိခိုက် ဒဏ်ရာရတာတော့ မရှိခဲ့ပါဘူး။ ကုလသမဂ္ဂ၊ အမေရိကန်နဲ့ ဥရောပ သမဂ္ဂတို့က အခုတိုက်ခိုက်မှုကို အပြင်းအထန် ရှုတ်ချကြောင်း ကြေညာချက်တွေ အသီးသီး ထုတ်ပြန်ခဲ့ပါတယ်။
နောက်တစ်နေ့မှာတော့ ကိုလံဘီယာ ကာကွယ်ရေး ဝန်ကြီး ဒီယေဂို မိုလာနိုက ဒီတိုက်ခိုက်မှု ကျူးလွန်သူတွေကို သတင်းပေးနိုင်ရင် ပီဆိုငွေ ၃ ဘီလီယံ ချီးမြှင့်မယ်လို့ ကြေညာခဲ့ပါတယ်။ ဒီငွေကြေးဟာ အမေရိကန်ဒေါ်လာ ၈ သိန်း နီးပါးလောက်နဲ့ ညီမျှပါတယ်။ မိုလာနို ကိုယ်တိုင်ကလည်း အခင်းဖြစ်ချိန်က ရဟတ်ယာဉ်ပေါ်မှာ ရှိနေခဲ့ပါတယ်။
ကိုလံဘီယာ အမိုးသား ရဲတပ်ဖွဲ့ကတော့ ကူကက်တာ ဒေသမှာ ရိုင်ဖယ် သေနတ် နှစ်လက်ကို သိမ်းဆည်း ရမိထားကြောင်း ပြောပါတယ်။ AK-47 တစ်လက်နဲ့ 7.62 Calibre ရိုင်ဖယ်တွေဟာ သမ္မတရဲ့ ရဟတ်ယာဉ်ကို တိုက်ခိုက်ဖို့ အသုံးပြုခဲ့တဲ့ လက်နက်တွေလို့ ရဲတပ်ဖွဲ့က ဆိုပါတယ်။ ဒါပေမဲ့ တရားခံ ဘယ်သူဘယ်ဝါ ဆိုတာကိုတော့ မဖော်ထုတ်နိုင်သေးပါဘူး။ 7.62 Calibre ရိုင်ဖယ်ရဲ့ ကိုယ်ထည်မှာတော့ ဗင်နီဇွဲလား လက်နက်ကိုင် တပ်ဖွဲ့ တစ်ခုရဲ့ အမှတ်တံဆိပ် ရိုက်နှိပ်ထားတယ်လို့ သိရပါတယ်။
ကျူးလွန်သူတွေကို မဖော်ထုတ် မဖမ်းဆီးနိုင်သေးသ၍ စုံစမ်းစစ်ဆေးမှုတွေကို ရပ်တန့်မှာ မဟုတ်ကြောင်း ကိုလံဘီယာ ရဲချုပ် ဂျော့ဂျ် ဗားဂက်စ်က ကတိပေးခဲ့ပါတယ်။ သမ္မတ ဒူကေးဟာ ကက်တာတမ်ဘို ဒေသက အခမ်းအနား တစ်ခုကို တက်ရောက်ပြီး ပြန်လာချိန်မှာ အခုလို တိုက်ခိုက်မှုနဲ့ ကြုံခဲ့တာပါ။ ကက်တာတမ်ဘို အပါအဝင် ကိုလံဘီယာနဲ့ ဗင်နီဇွဲလား နယ်စပ်တလျှောက်က ဒေသတွေဟာ ကိုကင်း မူးယစ်ဆေးဝါး ထုတ်လုပ်တဲ့ ကိုကာပင်တွေ အများဆုံး စိုက်ပျိုးတဲ့ ဧရိယာတွေလည်း ဖြစ်ပါတယ်။