တရုတ် ကုမ္ပဏီ Sinovacက ထုတ်လုပ်တဲ့ Covid-19 ကာကွယ်ဆေးနဲ့ ပတ်သက်လို့ အင်ဒိုနီးရှား နိုင်ငံမှာ သံသယနဲ့ မေးခွန်းထုတ်မှုတွေ ပိုမို မြင့်တက်လာနေပါတယ်။
အင်ဒိုနီးရှားမှာ လက်ရှိ အသုံးပြုနေတဲ့ ကာကွယ်ဆေးတွေရဲ့ ၅၈.၅ ရာခိုင်နှုန်းဟာ တရုတ် ကုမ္ပဏီတွေဖြစ်တဲ့ Sinovac၊ Sinopharmနဲ့ CanSinoတို့က ထုတ်လုပ်တဲ့ အမျိုးအစားတွေပါ။ အရှေ့တောင်အာရှ ဒေသတွင်း နိုင်ငံတွေမှာ တရုတ်လုပ် ကာကွယ်ဆေးတွေ အသုံးပြုမှု အချိုးအစားက အတိုင်းအတာ တစ်ရပ်ထိ ကျယ်ပြန့် များပြားနေပါတယ်။ မလေးရှားမှာဆိုရင် ကာကွယ်ဆေး စုစုပေါင်းရဲ့ ၄၄.၆ ရာခိုင်နှုန်း၊ ထိုင်းမှာ ၁၇.၃ ရာခိုင်နှုန်းနဲ့ ဖိလစ်ပိုင်မှာ ၁၆.၈ ရာခိုင်နှုန်းထိ တရုတ် ကာကွယ်ဆေးတွေ သုံးစွဲနေပါတယ်။
အရှေ့တောင်အာရှရဲ့ လူဦးရေ အထူထပ် အများပြားဆုံး နိုင်ငံကြီးဖြစ်တဲ့ အင်ဒိုနီးရှားဟာ လတ်တလောမှာ အဆိုးရွားဆုံး Covid-19 ရောဂါ ဂယက်ကို ခံစားနေရပါတယ်။ ဇူလိုင် ၄ ရက်မှာဆိုရင် တစ်နေ့တာ စံချိန်တင် အရေအတွက်အဖြစ် ကူးစက်လူနာအသစ် ၂၁၀၀၀ ကျော် တိုးပွားလာပါတယ်။
အင်ဒိုနီးရှားမှာ ကာကွယ်ဆေး အလုံးရေ ၁၀၄ သန်းကျော် ထိုးနှံထားပြီး တရုတ်ရဲ့ ကာကွယ်ဆေး တော်တော်များများ ပါဝင်ခဲ့ပါတယ်။ ဒါပေမဲ့ Sinopharmက ထုတ်လုပ်တဲ့ ကာကွယ်ဆေးကို နှစ်ကြိမ်အပြည့် ထိုးနှံထားသူ တချို့က ရောဂါ ပြန်ကူးစက်တာ ခံရတဲ့အပြင် သေဆုံးသူတွေပါ ရှိနေတာကြောင့် ဆေးရဲ့ ထိရောက်မှု အာနိသင်အပေါ် မေးခွန်းတွေ ထွက်ပေါ်လာတာပါ။ အင်ဒိုနီးရှားဟာ ကာကွယ်ဆေး ဖူဖူလုံလုံ ရရှိရေးနဲ့ ပတ်သက်ပြီး တရုတ်အပေါ် အကြီးအကျယ် မှီခိုနေရဆဲလို့ ကျန်းမာရေးဌာန တာဝန်ရှိသူ တစ်ဦးက ဝန်ခံခဲ့ပါတယ်။
Public Service Announcement
ပြီးခဲ့တဲ့နှစ်၊ မေလမှာ တရုတ် သမ္မတ ရှီကျင့်ဖျင်က သူ့နိုင်ငံထုတ် ကာကွယ်ဆေးတွေဟာ တစ်ကမ္ဘာလုံးရဲ့ ကျန်းမာရေး စောင့်ရှောက်မှု ကဏ္ဍအတွက် ထိထိရောက်ရောက် ပံ့ပိုးပေးနိုင်ဖို့ ရည်စူးကြောင်း ပြောကြားခဲ့ဖူးပါတယ်။ အင်ဒိုနီးရှားဟာ တခြားနိုင်ငံတွေက ထုတ်လုပ်တဲ့ ကာကွယ်ဆေးတွေကိုပါ ဖြန့်ဝေပေးနိုင်ဖို့ အစွမ်းကုန် ကြိုးစားနေပေမယ့် ထိရောက်မှု အရမ်းနည်းပါးနေဆဲလို့ ပညာရှင်တွေက သတိပေးထားပါတယ်။
