အမေရိကန်ဟာ တစ်ကမ္ဘာလုံး အားကိုးရမယ့် ကာကွယ်ဆေး လက်နက်တိုက်ကြီး ဖြစ်လာစေမယ်လို့ သမ္မတ ဂျိုးဘိုင်ဒန်က ကြွေးကြော်လိုက်ပါတယ်။
လာမယ့်နှစ်မှာ ဖွံ့ဖြိုးဆဲ နိုင်ငံတွေဆီ အမေရိကန်ရဲ့ Pfizer ကိုဗစ်ကာကွယ်ဆေး အလုံးရေ သန်း ၅၀၀ လှူဒါန်းသွားမယ့် အစီအစဉ်ကို အကြောင်းပြုပြီး ဘိုင်ဒန်က အခုလို ဂုဏ်ယူ ပြောဆိုခဲ့တာပါ။ ကုလသမဂ္ဂ အထွေထွေ ညီလာခံရဲ့ ကိုဗစ် ကပ်ရောဂါ တိုက်ဖျက်ရေး အစည်းအဝေးကို အွန်လိုင်းကနေ ချိတ်ဆက် တက်ရောက်ချိန်မှာ ဘိုင်ဒန်က ကာကွယ်ဆေးတွေ ဖြန့်ဝေ လှူဒါန်းဖို့ ကတိပြုသွားခဲ့ပါတယ်။
ဒီအရေအတွက်ကို ထပ်ပေါင်းလိုက်မယ်ဆိုရင် အမေရိကန်က လှူဒါန်းပေးထားတဲ့ ကာကွယ်ဆေး အလုံးရေဟာ ၁ ဘီလီယံ ကျော်လွန်လာတော့မှာ ဖြစ်ပါတယ်။ အမေရိကန်ဟာ ကမ္ဘာအနှံ့ကို ကိုဗစ် ကာကွယ်ဆေးတွေ အများဆုံး ပို့ဆောင်ထားတဲ့ ဦးဆောင်နိုင်ငံ တစ်ခုအဖြစ် ရပ်တည်နေပါတယ်။
လေ့လာသူတွေကတော့ ကမ္ဘာ့လူဦးရေရဲ့ ၇၀ ရာခိုင်နှုန်းလောက်ကို လွှမ်းခြုံနိုင်ဖို့ အနည်းဆုံး ကာကွယ်ဆေး ၁၁ ဘီလီယံလောက် လိုအပ်လိမ့်မယ်လို့ သုံးသပ်ထားပါတယ်။ ကမ္ဘာ့ကျန်းမာရေး အဖွဲ့ကြီး (WHO)က ၂၀၂၁ နှစ်ကုန်ပိုင်းလောက်မှာ ကမ္ဘာ့လူဦးရေရဲ့ ၄၀ ရာခိုင်နှုန်းလောက်ထိ ကာကွယ်ဆေး ထိုးထားပြီးဖြစ်ဖို့ မျှော်လင့်ထားပါတယ်။ ဒါပေမဲ့ လက်ရှိ အခြေအနေတွေအရ အဲဒီရည်မှန်းချက် အထမြောက်ဖို့ အလားအလာ သိပ်မရှိပါဘူး။
Public Service Announcement
ချမ်းသာတဲ့ နိုင်ငံကြီးတွေမှာတော့ အနည်းဆုံး လူဦးရေ တစ်ဝက်ကို ကာကွယ်ဆေး တစ်ကြိမ်ထက်မနည်း ထိုးပေးပြီး ဖြစ်ပေမယ့် ဆင်းရဲတဲ့ ကမ္ဘာ့နိုင်ငံတွေမှာ စုစုပေါင်း လူဦးရေရဲ့ ၂ ရာခိုင်နှုန်းသာ ကာကွယ်ဆေး ထိုးခွင့် ရသေးတယ်လို့ အောက်စ်ဖို့ဒ် တက္ကသိုလ် စစ်တမ်းတစ်ခုက ဖော်ပြထားပါတယ်။
အမေရိကန် ပြည်ထောင်စုဟာ ကာကွယ်ဆေး အလုံးရေ သန်းပေါင်း ၅၈၀ လောက် လှူဒါန်းမယ်လို့ ကတိပြုထားဖူးပေမယ့် လက်ရှိ အချိန်ထိ အလုံးရေ သန်း ၁၆၀ ကျော်သာ ပေးပို့နိုင်ပါသေးတယ်။ တစ်ဖက်မှာ ဆင်းရဲချမ်းသာ ကွာဟတဲ့ နိုင်ငံတွေကြား ကာကွယ်ဆေး ရရှိမှု ဘက်မညီတဲ့ အခြေအနေကလည်း ပိုပြီး ထင်ရှားလာနေပါတယ်။
အခုနှစ်ကုန်ပိုင်းမှာ ချမ်းသာတဲ့ နိုင်ငံတွေ အနေနဲ့ ပိုလျှံ ကာကွယ်ဆေး အလုံးရေ ၁.၂ ဘီလီယံလောက်ထိ လက်ထဲမှာ ရှိနေနိုင်ပေမယ့် ဆင်းရဲတဲ့ နိုင်ငံတွေကတော့ ဆေးလိုအပ်ချက် အရမ်းကြီးမားလာနိုင်ပါတယ်။ အမေရိကန်မှာ အရွယ်ရောက်ပြီးသူ ဦးရေရဲ့ ၇၆ ရာခိုင်နှုန်းဟာ အနည်းဆုံး ကာကွယ်ဆေး တစ်ကြိမ် ထိုးပြီး ဖြစ်ပေမယ့် နိုင်ငံတကာကို ကာကွယ်ဆေးတွေ ဖြန့်ဝေ လှူဒါန်းပေးမှု နည်းလွန်းတယ်ဆိုတဲ့ ဝေဖန်မှုတွေနဲ့ ရင်ဆိုင်နေရပါတယ်။
ဒီအတောအတွင်း အမေရိကန် အာဏာပိုင်တွေက ကာကွယ်ဆေး တတိယအလုံး Booster ထပ်ထိုးပေးမယ့် ကိစ္စကို အတည်ပြုလိုက်တာကလည်း အငြင်းပွားစရာတွေ ဖြစ်လာပါတယ်။ WHOကတော့ ချမ်းသာတဲ့ နိုင်ငံကြီးတွေ အနေနဲ့ အရေးတကြီး မလိုအပ်တဲ့ Boosterဆေးတွေ ထိုးပေးနေမယ့်အစား ဆင်းရဲတဲ့ နိုင်ငံတွေဆီ ဆေးတွေ မျှဝေပေးဖို့ အလေးအနက် တိုက်တွန်းထားပါတယ်။
