တရုတ်မှာ ရေကြီးမှုတွေကြောင့် လူပေါင်း ၂ သန်းနီးပါး ရွှေ့ပြောင်းရ

တရုတ်နိုင်ငံ မြောက်ပိုင်းမှာ ရေလွှမ်းမိုးမှုတွေကြောင့် နေရပ်စွန့်ခွာ ရွှေ့ပြောင်းရသူ ၂ သန်းနီးပါး ရှိခဲ့ကြောင်း သိရပါတယ်။

ပြီးခဲ့တဲ့ သီတင်းပတ်က ရှန်စီးဒေသမှာ မိုးသည်းသည်းထန်ထန် နေ့စဉ်ရက်ဆက် ရွာသွန်းပြီး နေရာအနှံ့ ရေကြီးခဲ့တာ ဖြစ်ပါတယ်။ ပြီးတော့ ခရိုင်ပေါင်း ၇၀ လောက်မှာလည်း မြေပြိုမှု သတင်းတွေ ကြားခဲ့ရပါတယ်။

ရေကြီးမှုတွေကြောင့် ရှန်စီးမှာ လူပေါင်း ၁.၈ သန်းလောက်ကို အရေးပေါ် ပြောင်းရွှေ့မှုတွေ ပြုလုပ်ပေးခဲ့ရပါတယ်။ နေ့စဉ်ရက်ဆက် ရွာသွန်းနေတဲ့ မိုးကြောင့် ကယ်ဆယ်ရေး လုပ်ငန်းတွေမှာ နှောင့်နှေး ကြန့်ကြာမှုတွေ ကြုံနေရတယ်လို့လည်း သိရပါတယ်။

တရုတ်နိုင်ငံ၊ ဟီနန်ဒေသမှာ ရေကြီးမှုတွေကြောင့် လူပေါင်း ၃၀၀ ကျော် သေဆုံးခဲ့တဲ့ ဖြစ်စဉ်အပြီး ၃ လနီးပါး အကြာမှာ အခုလို အခြေအနေတွေ ထပ်ကြုံလာရတာပါ။ ရှန်စီးမှာ ရေကြီးမှုတွေကြောင့် အိမ်ခြေ ၂ သောင်း နီးပါးလောက် ပြိုကျ ပျက်စီးမှုတွေ ကြုံခဲ့တယ်လို့လည်း တရုတ် မီဒီယာတွေက ဖော်ပြပါတယ်။

Public Service Announcement

အသေအပျောက် စာရင်းတွေ အတိအကျ ထွက်မလာသေးပေမယ့် မြေပြိုမှုတွေအတွင်း တရုတ် ရဲအရာရှိ ၄ ဦး သေဆုံးသွားကြောင်း အစိုးရပိုင် Global Times သတင်းစာက ဆိုပါတယ်။ ရှန်စီးက ရေကြီးမှုတွေဟာ ဟီနန်မှာ ကြုံခဲ့တာတွေထက်တောင် ပိုဆိုးရွားနိုင်တယ်လို့ ကယ်ဆယ်ရေး အဖွဲ့တွေက ဆိုပါတယ်။

ရှန်စီးဒေသရဲ့ မြို့တော် တိုင်ယွမ်မှာ ပြီးခဲ့တဲ့ သီတင်းပတ်က မိုးရေချိန် ၁၈၅.၆ မီလီမီတာထိ ရွာသွန်းခဲ့ပါတယ်။ ၁၉၈၁ ခုနှစ်နဲ့ ၂၀၁၀ ပြည့်နှစ်ကြား အောက်တိုဘာ လတွေမှာ တိုင်ယွမ်ရဲ့ ပျမ်းမျှ မိုးရေချိန်ဟာ ၂၅ မီလီမီတာ ဝန်းကျန်သာ ရှိပါတယ်။

ရှန်စီးမှာ တရုတ်ရှေးဟောင်း အမွေအနှစ် လက်ရာ အဆောက်အအုံတွေ တော်တော်များများ ရှိနေပြီး မိုးသည်းထန်မှု၊ ရေကြီးမှုတွေကြောင့် ထိခိုက်ပျက်စီးလာမှာ စိုးရိမ်နေရကြောင်းလည်း သိရပါတယ်။