Connect with us

Hi, what are you looking for?

LuduNwayOo

နိုင်ငံတကာ

ယူကရိန်း ငြိမ်းချမ်းရေးအတွက် အားထုတ်မှုတွေကို ရုရှားအလိုကျ တရုတ်က နှောင့်ယှက်နေတယ်လို့ ဇီလန်စကီး ဝေဖန်

တရုတ်လိုမျိုး တောင့်တင်းအားကောင်းတဲ့၊ လွတ်လပ်တဲ့၊ ဩဇာကြီးမားတဲ့ နိုင်ငံမျိုးက ပူတင် အလိုကျ အသုံးတော်ခံနေတဲ့ အခြေအနေမျိုး မြင်ရတာကို စိတ်မကောင်းကြောင်း ဇီလန်စကီးက ဆိုပါတယ်။

ယူကရိန်း ငြိမ်းချမ်းရေးအတွက် အားထုတ်မှုတွေကို ရုရှားအလိုကျ တရုတ်က နှောင့်ယှက်နေတယ်လို့ ဇီလန်စကီး ဝေဖန်
ယူကရိန်း ငြိမ်းချမ်းရေးအတွက် အားထုတ်မှုတွေကို ရုရှားအလိုကျ တရုတ်က နှောင့်ယှက်နေတယ်လို့ ဇီလန်စကီး ဝေဖန်

ယူကရိန်းမှာ အပစ်အခတ် ရပ်စဲနိုင်ရေး စုပေါင်းဆွေးနွေးမယ့် အစည်းအဝေး တစ်ခုကို တခြားနိုင်ငံတွေ မတက်ရောက်ဖြစ်အောင် ရုရှားအလိုကျ တရုတ်က ဖိအားပေးနေတယ်လို့ ယူကရိန်း သမ္မတ ဗိုလိုဒီမာ ဇီလန်စကီးက ဝေဖန် စွပ်စွဲသွားခဲ့ပါတယ်။

အခုလကုန်ပိုင်းကျရင် ဆွစ်ဇာလန်မှာ ကျင်းပမယ့် အဲဒီ ဆွေးနွေးပွဲဟာ ရုရှားရဲ့ ကျူးကျော်စစ်ဒဏ် ခံနေရတဲ့ ယူကရိန်းအတွက် ငြိမ်းချမ်းရေးကို ပြန်လည် ဆောင်ကြဉ်းပေးနိုင်ဖို့ ရည်ရွယ်ထားတာပါ။

အာရှတိုက်ရဲ့ အကြီးမားဆုံး လုံခြုံရေး ညီလာခံဖြစ်တဲ့ ရှန်ဂရီလာ ဆွေးနွေးပွဲ တက်ရောက်ရင်း စင်ကာပူကို ရောက်နေတဲ့ အချိန်မှာ ဇီလန်စကီးက တရုတ်ကို ဝေဖန်ခဲ့သလို အာရှ-ပစိဖိတ် ရပ်ဝန်းက နိုင်ငံတွေ အနေနဲ့လည်း ဆွစ်ဇာလန်က ဆွေးနွေးပွဲကို ထောက်ခံ တက်ရောက်ပေးကြဖို့ တိုက်တွန်းသွားခဲ့တာ ဖြစ်ပါတယ်။

ကမ္ဘာကြီးဟာ ကြံ့ကြံ့ခံ အားမွေးရင်း ရုရှားလိုမျိုး ကျူးကျော်သူ နိုင်ငံတွေကို ဆက်တိုက် ဖိအားပေးနေဖို့ လိုတယ်လို့ ဇီလန်စကီးက ဆိုပါတယ်။ ရုရှား သမ္မတ ဗလာဒီမာ ပူတင်ကို ရပ်တန့်ဖို့ ဆိုတာဟာ နိုင်ငံတကာရဲ့ သံတမန်ရေးရာ ဖိအားပေးဖို့နဲ့ ယူကရိန်းရဲ့ စစ်အင်အားကို ဖြည့်တင်းပေးဖို့ ဆိုတာကလွဲပြီး တခြားနည်းလမ်း မရှိကြောင်း၊ ကမ္ဘာကြီးဟာ ရုရှားနဲ့ ယူကရိန်းကြားမှာ ဘက်ရွေးစရာ မလိုဘဲ နိုင်ငံတကာ တရားမျှတမှုနဲ့ ဥပဒေတွေကို စောင့်ရှောက်ပေးရင် လုံလောက်ပြီဖြစ်ကြောင်း သူက ဆက်ပြောပါတယ်။

Public Service Announcement

Public Service Announcement

စင်ကာပူမှာ မီဒီယာတွေနဲ့ တွေ့ဆုံတဲ့ အချိန်မှာတော့ ဇီလန်စကီးက တရုတ်ဟာ ရုရှားအလိုကို လိုက်ပြီး တချို့နိုင်ငံတွေကို ဆွစ်ဇာလန် ဆွေးနွေးပွဲ မတက်ရောက်အောင် သွယ်ဝိုက် ဖိအားပေးနေတယ်လို့ ဝေဖန်သွားခဲ့ပါတယ်။ ရုရှားဟာ တရုတ်ရဲ့ လွှမ်းမိုးနိုင်စွမ်းနဲ့ တရုတ် သံတမန်တွေကို အသုံးချပြီး အဲဒီ ငြိမ်းချမ်းရေး ဆွေးနွေးပွဲကို နှောင့်ယှက်ဖို့ အစွမ်းကုန် လုပ်ဆောင်နေကြောင်း၊ ဝမ်းနည်းဖို့ ကောင်းတာက တရုတ်ကလည်း ရုရှား အလိုကျ လက်ခံပေးထားတာဖြစ်ကြောင်း သူက ပြောကြားသွားပါတယ်။

တရုတ်လိုမျိုး တောင့်တင်းအားကောင်းတဲ့၊ လွတ်လပ်တဲ့၊ ဩဇာကြီးမားတဲ့ နိုင်ငံမျိုးက ပူတင် အလိုကျ အသုံးတော်ခံနေတဲ့ အခြေအနေမျိုး မြင်ရတာကို စိတ်မကောင်းကြောင်း ဇီလန်စကီးက ဆိုပါတယ်။

လွန်ခဲ့တဲ့ တစ်နှစ်လောက်က သူဟာ တရုတ်သမ္မတ ရှီကျင့်ဖျင်နဲ့ ဖုန်းဆက် ဆွေးနွေးခဲ့တဲ့နောက်ပိုင်း စစ်ပွဲရပ်ဆိုင်းရေးကိစ္စ တရုတ်အကူအညီကို ယူနိုင်ဖို့ အစိုးရအဆင့် အမျိုးမျိုးကို ဆက်သွယ်ဖို့ ကြိုးစားစေခဲ့ပေမယ့် မအောင်မြင်ခဲ့ဘူးလို့လည်း ဇီလန်စကီးက ဝန်ခံသွားပါတယ်။ သူဟာ ရှန်ဂရီလာ ဆွေးနွေးပွဲ တက်ရောက်လာတဲ့ တရုတ် ကိုယ်စားလှယ် အစုအဖွဲ့နဲ့လည်း မဆွေးနွေးဖြစ်သေးပါဘူး။

ဇွန်လ ၂ ရက်နေ့တုန်းကတော့ အဲဒီဆွေးနွေးပွဲကို ရောက်လာတဲ့ တရုတ် ကာကွယ်ရေးဝန်ကြီး ဒေါင်ကျန်က သူ့နိုင်ငံဟာ ငြိမ်းချမ်းရေးဆိုင်ရာ ညှိနှိုင်းမှုတွေမှာ ဖြောင့်မှန်တဲ့ သဘောထား မူဝါဒတွေကိုသာ အမြဲတမ်း လက်ကိုင်ပြုတယ်လို့ ပြောကြားသွားခဲ့ပါတယ်။

ကိုးကား: Guardian⁩

ဆက်စပ်သတင်းများ

နိုင်ငံတကာ

လွန်ခဲ့တဲ့ ၇ လတုန်းကလည်း USS Carl Vinson ဦးဆောင်တဲ့ နောက်ထပ် အမေရိကန် CSG တစ်ခုဟာ မြောက်ကိုရီးယားကို ခြိမ်းခြောက် အင်အားပြဖို့အတွက် တောင်ကိုရီးယားမှာ ကမ်းကပ်ခဲ့ဖူးပါတယ်။

နိုင်ငံတကာ

လူမှုကွန်ရက် မီဒီယာပေါ် ပျံ့နှံ့လာတဲ့ ဗီဒီယိုတွေထဲမှာတော့ အနက်ရောင်တွေ ဝတ်ထားပြီး ချေမှုန်းရေး ရိုင်ဖယ်တွေ ကိုင်ဆောင်ထားတဲ့ သေနတ်သမားတွေက ရဲကားတွေနဲ့ တခြားပစ်မှတ်တွေကို တိုက်ခိုက်နေတာ တွေ့ရပါတယ်။

နိုင်ငံတကာ

ပူတင်ဟာ အရင်ကလည်း အမေရိကန်နဲ့ အနောက်နိုင်ငံတွေအပေါ် ရန်လိုတဲ့ တခြားနိုင်ငံ တချို့ဆီ ရုရှားလက်နက်တွေ ထောက်ပံ့တာမျိုး ရှိလာနိုင်ကြောင်း ခြိမ်းခြောက်ခဲ့ဖူးပါတယ်။

သတင်း

ဒေါက်တာဝင်းကျော်နှင့် ၎င်း၏ ဇနီးဖြစ်သူ ခင်ကေခိုင်တို့က ဦးဆောင်သည့် Mascots Group of Companies က အထက်ပါတရုတ်ကုမ္ပဏီများနှင့် စစ်အုပ်စုအကြား စီးပွားရေးလုပ်ဆောင်နိုင်ရန် ကြားခံပွဲစားအဖြစ် ဆောင်ရွက်ပေးကြောင်း JFM က စုံစမ်းဖော်ထုတ်သည်။