'/%3E%3C/svg%3E){kind=small}
တရုတ်ဟာ ပြည်တွင်းအခြေစိုက် လေကြောင်းလိုင်းတွေ အနေနဲ့ အမေရိကန် ကုမ္ပဏီ Boeingရဲ့ လေယာဉ်တွေ မှာယူမှုကို ဆိုင်းငံ့ထားကြဖို့ ညွှန်ကြားထားကြောင်း သတင်းတွေ ထွက်ပေါ်လာပါတယ်။
ဧပြီ ၁၅ ရက်နေ့မှာ ထွက်ပေါ်လာတဲ့ သတင်းဟာ တရုတ်နဲ့ အမေရိကန်ကြားက ပိုမို တင်းမာလာတဲ့ ကုန်သွယ်ရေး အားပြိုင်မှုတွေအတွက် တရုတ်က တုံ့ပြန်တဲ့ အစီအမံ တစ်ခုလို့လည်း ယုံကြည်ရပါတယ်။ တရုတ် အစိုးရကတော့ ဒီကိစ္စအပေါ် အတိအလင်း မှတ်ချက်ပေးတာမျိုး မရှိသေးပါဘူး။
ထရမ့်ဟာ တရုတ်ရဲ့ သွင်းကုန်တွေအပေါ် အခွန် အလုံးအရင်း မြှင့်တင် စည်းကြပ်ခဲ့ပြီး တရုတ်ကလည်း တန်ပြန်ရာက ကမ္ဘာ့စီးပွားရေးအင်အား အတောင့်တင်းဆုံး နိုင်ငံကြီး နှစ်ခုကြားမှာ ကုန်သွယ်ရေး စစ်ပွဲမျိုး ဖြစ်ပေါ်လာခဲ့တာပါ။
အခုဆိုရင် အမေရိကန်က တရုတ် သွင်းကုန်အများစုအပေါ် အခွန်စည်းကြပ်မှုဟာ တန်ဖိုးရဲ့ ၁၄၅ ရာခိုင်နှုန်းထိ မြင့်တက်နေပြီး တရုတ်က ဒေါသတကြီး ကန့်ကွက်ထားသလို အမေရိကန် သွင်းကုန်တွေကိုလည်း ၁၂၅ ရာခိုင်နှုန်း အခွန်ပြန်စည်းကြပ်မယ်လို့ ကြေညာထားပါတယ်။
Public Service Announcement
တရုတ်က Boeing လေယာဉ်တွေ ဝယ်ယူမှုကို ရပ်တန့်ဖို့ ပြည်တွင်းမှာရှိတဲ့ လေကြောင်းလိုင်းတွေကို ညွှန်ကြားထားတယ်ဆိုတဲ့ သတင်းကို Bloomberg သတင်းဌာနက ဧပြီ ၁၅ ရက်နေ့မှာ စတင် ဖော်ပြခဲ့တာပါ။ တရုတ် နိုင်ငံခြားရေး ဝန်ကြီးဌာနနဲ့ Boeing ကုမ္ပဏီတို့ကတော့ ဒီကိစ္စအပေါ် လတ်တလော တုံ့ပြန်တာ မရှိသေးပါဘူး။
Bloombergရဲ့ အဆိုအရ Boeingဆီက လေယာဉ်တွေနဲ့ တခြား ကုန်ကျစရိတ် များပြားတဲ့ ပစ္စည်းတွေ ဝယ်ယူမှု မှန်သမျှကို အကူအညီတွေ ပေးတော့မှာ မဟုတ်တဲ့ သဘောမျိုး တရုတ် လေကြောင်းလိုင်းတွေကို အသိပေးထားကြောင်း သိရပါတယ်။
ကိုးကား: Bloomberg, CNA
