မြောက်ကိုရီးယားဟာ ဖျက်သင်္ဘော အသစ်ရဲ့ လက်နက်စနစ်တွေကို ပထမဆုံးအကြိမ် စမ်းသပ် ပစ်ခတ်ခဲ့တယ်လို့ သိရပါတယ်။
ချိုယန် အမျိုးအစားလို့ မြောက်ကိုရီးယား ရေတပ်က ကြေညာထားတဲ့ သင်္ဘောတွေရဲ့ ပထမဆုံး တစ်စီးကို ဧပြီ ၂၅ ရက်နေ့မှာ တရားဝင် အခမ်းအနားနဲ့ မိတ်ဆက်ခဲ့ပါတယ်။ အခုသီတင်းပတ်မှာတော့ အဲဒီ သင်္ဘောရဲ့ လက်နက် စနစ်တွေကို ပင်လယ်ပြင်မှာ စမ်းသပ် ပစ်ခတ်ခဲ့ကြောင်း မြောက်ကိုရီးယား အစိုးရပိုင် KCNA သတင်းဌာနက ဖော်ပြခဲ့ပါတယ်။
လက်နက် စမ်းသပ်မှုမှာ ပဲ့ထိန်း ခရုစ်ဒုံးကျည်တွေရော၊ သင်္ဘောဖျက် ဒုံးကျည်တွေကိုပါ စမ်းသပ်ခဲ့ကြောင်း၊ လက်နက် စမ်းသပ်မှုတွေကို နိုင်ငံခေါင်းဆောင် ကင်မ်ဂျုံအွန်း၊ စစ်ဘက်နဲ့ အစိုးရ ထိပ်တန်း အရာရှိကြီးတွေ တက်ရောက်ခဲ့ကြောင်း KCNAက ဆိုပါတယ်။
နိုင်ငံ ကာကွယ်ရေး ကဏ္ဍအတွက် မြောက်ကိုရီးယား ရေတပ် အနေနဲ့လည်း နျူကလီးယား လက်နက် တပ်ဆင်နိုင်စွမ်းထိ အရှိန်အဟုန်မြှင့် ချဲ့ထွင် တည်ဆောက်ဖို့ အရေးကြီးတယ်လို့ ခေါင်းဆောင်ကြီး ကင်မ်က ညွှန်ကြားခဲ့ကြောင်း KCNA သတင်းထဲမှာ ပါရှိခဲ့ပါတယ်။
Public Service Announcement
တောင်ကိုရီးယားနဲ့ အမေရိကန်တို့ဟာ မြောက်ကိုရီးယားရဲ့ စစ်သင်္ဘောသစ်တွေ တည်ဆောက်နိုင်မှု စွမ်းရည်နဲ့ ပတ်သက်ပြီး မျက်ခြေမပြတ် အနီးကပ် စောင့်ကြည့်နေတယ်လို့ တောင်ကိုရီးယား ကာကွယ်ရေး ဝန်ကြီးဌာနက ဆိုပါတယ်။
မြောက်ကိုရီးယားရဲ့ စစ်သင်္ဘော အသစ်ဟာ ပင်လယ်ပြင်မှာ အမှီအခိုကင်းကင်း ခုတ်မောင်းပြီး စစ်ဆင်ရေး ဆောင်ရွက်နိုင်တဲ့ အဆင့်ကို ရောက်ဖို့တော့ အချိန်လိုဦးမယ်လို့လည်း တောင်ကိုရီးယားက ယူဆနေပါတယ်။ ဘာကြောင့်လဲဆိုတော့ လက်နက်စမ်းသပ်မှုတွေ အပြီးမှာ အဲဒီသင်္ဘောကို ဆွဲသင်္ဘောတွေက သင်္ဘောကျင်းဖက်ဆီ ပြန်လည် ဆွဲယူသွားခဲ့ရတာကြောင့် ဖြစ်ပါတယ်။ ဒီအခြေအနေက စစ်သင်္ဘော အသစ်မှာ ယုံကြည် အားကိုးလောက်တဲ့ မောင်းနှင်နိုင်စွမ်းမျိုး မရှိသေးဘူးဆိုတဲ့ အဓိပ္ပါယ်လို့ စစ်ရေး သုတေသီတွေက သုံးသပ်ပါတယ်။
KCNAကတော့ ပြီးခဲ့တဲ့ သီတင်းပတ်ကုန်မှာ မိတ်ဆက်ခဲ့တဲ့ တန် ၅၀၀၀ လေးတဲ့ စစ်သင်္ဘောဟာ ရေတပ်ရဲ့ အစွမ်းအထက်ဆုံး စစ်လက်နက်တွေ တပ်ဆင်ထားတယ်လို့ ပြောပါတယ်။
ကင်မ်က အဲဒီ ဖျက်သင်္ဘော အသစ်ကို ၂၀၂၆ နှစ်ဆန်းပိုင်းလောက်မှာ ရေတပ်ဆီ လွှဲအပ်ပြီး တပ်တော်ဝင်စေမယ်လို့ ပြောကြားထားပါတယ်။ သင်္ဘောရဲ့ အဆင့်သတ်မှတ်ချက် ကုတ်ဒ်နာမည်ကိုတော့ ဂျပန်ကို ဆန့်ကျင်ခဲ့သူ ကိုရီးယား တော်လှန်ရေး ခေါင်းဆောင် ချိုယန်ကို ဂုဏ်ပြု သတ်မှတ်ထားတာလို့ သိရပါတယ်။
ကိုးကား: Reuters
