ကမ္ဘာ့ဖလား အုပ်စု (ဇ) အဖွင့်ပွဲစဉ်မှာတော့ ဥရုဂွေးဟာ အာရှနိုင်ငံ တစ်ခုဖြစ်တဲ့ ဆော်ဒီအာရေးဘီးယားကို နောက်ကလိုက်ကစားပြီး တစ်ဂိုးစီ သရေကျခဲ့ပါတယ်။ အကျိုးဆက် အနေနဲ့ ၂၀၂၆ ကမ္ဘာ့ဖလား ပြိုင်ပွဲ စတင်ချိန် ကတည်းက တောင်အမေရိက အသင်းတွေဟာ နိုင်ပွဲတစ်ပွဲ ရှာတွေ့ဖို့ ရုန်းကန်နေရဆဲ ဖြစ်ပါတယ်။
တကယ်တော့ တောင်အမေရိက ဆိုတာဟာ ကမ္ဘာ့ဘောလုံးရပ်ဝန်းမှာ ရေခံမြေခံ အကောင်းဆုံး ဒေသတစ်ခုလည်း ဖြစ်ပါတယ်။ ကမ္ဘာ့ဖလား ချန်ပီယံဆုတွေကို ဆွတ်ခူးဖူးတာဆိုလို့ ဥရောပနဲ့ တောင်အမေရိက နိုင်ငံတွေသာ ရှိခဲ့ပါတယ်။ ဒါပေမဲ့ အခုနှစ် ကမ္ဘာ့ဖလား အုပ်စုအဖွင့် ပွဲစဉ်တွေမှာတော့ ဘောလုံးအစဉ်အလာကောင်းတဲ့ တောင်အမေရိကသားတွေဟာ မကြုံစဖူး အတော်လေး ရုန်းကန်နေရပါတယ်။
အခုနှစ် ကမ္ဘာ့ဖလားမှာတော့ တောင်အမေရိက ကိုယ်စားပြု ၆ သင်းထိ ပါဝင် ယှဉ်ပြိုင်ခွင့် ရခဲ့ပြီး ပါရာဂွေး၊ ဘရာဇီး၊ အီကွေဒေါနဲ့ ဥရုဂွေး အသင်းတွေကတော့ အဖွင့်ပွဲစဉ်တွေ ယှဉ်ပြိုင်ပြီးပါပြီ။ အဲဒီထဲမှာ ကမ္ဘာ့ဖလားကို ၅ ကြိမ် ဆွတ်ခူးဖူးတဲ့ ဘရာဇီးရော၊ ဆုဖလား ၂ ကြိမ် ကိုင်မြှောက်ဖူးတဲ့ ဥရုဂွေးပါ ပြိုင်ဘက်တွေကို နောက်ကနေ လိုက်ကစားခဲ့ပြီးမှ သရေ ၁ မှတ်စီ ရခဲ့ကြပါတယ်။ ပါရာဂွေးက အိမ်ရှင် အမေရိကန်ကို လေးဂိုး-တစ်ဂိုးနဲ့ အရှုံးကြီးရှုံးပြီး အီကွေဒေါကလည်း အိုင်ဗရီကို့စ်ကို တစ်ဂိုး-ဂိုးမရှိနဲ့ အရေးနိမ့်ထားပါတယ်။
ဒါကြောင့် ယှဉ်ပြိုင်ပြီးသမျှ တောင်အမေရိက အသင်းအားလုံး နိုင်ပွဲပျောက်နေကြပြီး လက်ရှိ ကမ္ဘာ့ဖလား ချန်ပီယံ အာဂျင်တီးနား၊ နောက်ထပ် ဒေသတွင်း နာမည်ကြီး အသင်းတစ်သင်းဖြစ်တဲ့ ကိုလံဘီယာတို့ကို ဆက်ပြီး စောင့်ကြည့်ရမှာပါ။ ကိုလံဘီယာက ကမ္ဘာ့ဖလားကို ပထမဆုံးအကြိမ် ပါဝင်ယှဉ်ပြိုင်မယ့် ဥဇဘက်ကစ္စတန်နဲ့ တွေ့ဆုံမှာဖြစ်ပြီး အာဂျင်တီးနားက အယ်လ်ဂျီးရီးယားနဲ့ ရင်ဆိုင်သွားမှာ ဖြစ်ပါတယ်။
Public Service Announcement
အခုနှစ်မှာ ကမ္ဘာ့ဖလား ပြိုင်ပွဲဝင် အသင်းအရေအတွက်ကို ၃၂ သင်းအစား ၄၈ သင်းအထိ တိုးချဲ့ခဲ့တာကြောင့် ပြိုင်ပွဲရဲ့ အရည်အသွေးကို ထိခိုက်စေနိုင်ကြောင်း ဝေဖန်မှုတွေ ရှိခဲ့ပါတယ်။ ဒါပေမဲ့ လက်တွေ့မှာတော့ ပြိုင်ဆိုင်မှုတွေက ပိုပြီး ပြင်းထန်လာသလို အသင်းငယ်တွေရဲ့ ခံကန်အားကြောင့် နာမည်ကြီး အသင်းတွေ အငိုက်မိကုန်တာ၊ အခက်ကြုံသွားတာတွေကို တွေ့နေရပါတယ်။ လောလောလတ်လတ် အနေနဲ့ ကမ္ဘာ့ချန်ပီယံဟောင်း၊ ပြီးတော့ ဗိုလ်စွဲဖို့ ရေပန်းအစားဆုံး အသင်းတစ်သင်းဖြစ်တဲ့ စပိန်ဟာ ကမ္ဘာ့ဖလားရဲ့ လူသစ်တန်း ကိပ်ဗာဒီကို ဂိုးမရှိ သရေကျသွားခဲ့ပါတယ်။
ကမ္ဘာ့ဖလားမှာ တောင်အမေရိက အသင်းတွေ ရုန်းကန်နေရပေမယ့် အာရှတိုက် ကိုယ်စားပြု အသင်းတွေကတော့ မျှော်လင့်ထားတာထက် ပိုပြီး ကောင်းမွန်တဲ့ စွမ်းဆောင်မှုတွေ ပြသနေဆဲပါ။
ဩစတြေးလျ အပါအဝင် အာရှဘောလုံးအဖွဲ့ချုပ် (AFC) ကိုယ်စားပြု ၉ သင်းထိ အခုနှစ် ကမ္ဘာ့ဖလားမှာ ပါဝင်ယှဉ်ပြိုင်နေပြီး ၆ သင်းက အဖွင့်ပွဲစဉ်တွေ ကစားပြီး ရှုံးပွဲ မရှိခဲ့ပါဘူး။ တောင်ကိုရီးယားနဲ့ ဩစတြေးလျတို့က ပြိုင်ဘက်တွေကို အသီးသီး အနိုင်ကစားခဲ့သလို ကာတာ၊ ဂျပန်၊ ဆော်ဒီနဲ့ အီရန်တို့ဟာလည်း သရေရလဒ်တွေ ပိုင်ဆိုင်ခဲ့ကြပါတယ်။
ကိုးကား: FIFA
ဓာတ်ပုံ – Reuters, Getty Images,AP,AFP
