'/%3E%3C/svg%3E){kind=small}
ဇေအောင်/People’s Spring
စစ်ကိုင်းတိုင်း၊ ကန့်ဘလူမြို့နယ်တွင် စစ်ကောင်စီက ကျေးရွာ၂ရွာအား လေကြောင်းတိုက်ခိုက်ခဲ့ရာ ဘုန်းကြီးကျောင်းနှင့် လူနေအိမ် ၄လုံး ပျက်စီးခဲ့ကြောင်း သတင်းရရှိသည်။
စက်တင်ဘာ ၂၉ ရက် နေ့လယ် ၁၂ နာရီခွဲခန့်က ကန့်ဘလူမြို့နယ်၊ ပင့်သာတိုက်နယ်၊ပင်းတဲရွာအား စစ်ကောင်စီက တိုက်ပွဲဖြစ်ပွားခြင်းမရှိဘဲ မိတ္ထီလာလေတပ်မှ Jet Fighterတစ်စီးဖြင့် ဗုံးချတိုက်ခိုက်ခဲ့ရာ နေအိမ် ၄လုံး ပျက်စီးဆုံးရှုံးခဲ့ကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့၏ တာဝန်ရှိသူက ပြောသည်။
Public Service Announcement
အလားတူ ည ၈ နာရီခွဲခန့်ကလည်း ပင့်သာတိုက်နယ်၊ မကျီးကုန်းရွာဘုန်းကြီးကျောင်းအား Y12 ထောက်ပို့ယာဉ်တစ်စီးဖြင့် လေကြောင်းတိုက်ခိုက်ခဲ့ရာ ဘုန်းကြီးကျောင်းဆောင်တစ်ဆောင် ပျက်စီးခဲ့ကြောင်း အထက်ပါအဖွဲ့က ပြောသည်။
“အဲရွာတွေက အရင်ရက်က အပစ်ခံရတဲ့ရွာတွေနဲ့ မနီးပါဘူး။ကန့်ဘလူ မြောက်ခြမ်းပိုင်းပါ။ လူအထိအခိုက်တော့မရှိဘူး။”ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့၏ တာဝန်ရှိသူက ပြောသည်။
“ပြည်သူထိခိုက်မှု မရှိတာ ရွာထဲ လူမနေတာ တစ်နှစ်ကျော်ပြီ။ အဲဒါကြောင့် အထိအခိုက်မရှိတာ။”ဟု ဒေသခံတစ်ဦးက ပြောသည်။
အာဏာသိမ်းစစ်တပ်သည် စက်တင်ဘာ ၂၇ ရက်ကလည်း ကန့်ဘလူမြို့နယ်အား နှစ်ကြိမ်လေကြောင်းတိုက်ခိုက်မှုပြုခဲ့သည်။
လေကြောင်းတိုက်ခိုက်မှုကြောင့် လူထိခိုက်မှုမရှိခဲ့သော်လည်း အာဏာသိမ်းစစ်တပ်၏ ဒရုန်းဖြင့်ဗုံးချတိုက်ခိုက်မှုကြောင့် ကန့်ဘလူမြို့နယ်တွင် နှစ်ရက်အတွင်း ကလေးငယ်တစ်ဦးအပါအဝင် ပြည်သူ ၆ဦး သေဆုံးခဲ့သည်။
စက်တင်ဘာ ၂၇ ရက်ကလည်း ကန့်ဘလူမြို့နယ်၊ ရေရှင်ကြီးရွာအား ဒရုန်းဖြင့် ဗုံးသီး၃ လုံးချ တိုက်ခိုက်ခဲ့ရာ ဒေသခံပြည်သူ ၇ ဦး ထိခိုက်ဒဏ်ရာရရှိခဲ့ပြီး ခရီးသွားအမျိုးသားတစ်ဦး သေဆုံးခဲ့သည်။
တချိန်တည်းမှာပင် အောင်တိုင်းလယ်ကျေးရွာကိုပါ ဒရုန်းဖြင့် ဗုံးသီးချတိုက်ခိုက်ခဲ့ရာ အသက်(၅၀) ကျော်အရွယ် ဒေါ်ရွှေဆိုသူ ထိမှန်သေဆုံးခဲ့ကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့၏ တာဝန်ရှိသူက ပြောသည်။
စက်တင်ဘာ ၂၈ ရက် နံနက်ပိုင်းကလည်း မှန်နီပင်ရွာအား ဒရုန်းဖြင့် ဗုံးသီး ၂လုံးချတိုက်ခိုက်ခဲ့ရာ (၅)နှစ်အရွယ် ကလေးငယ်တစ်ဦးအပါအဝင် အမျိုးသမီး ၄ဦး သေဆုံးခဲ့သည်။
ထို့အပြင် ပြည်သူ ၇ ဦးထက်မနည်း ထိခိုက် ဒဏ်ရာများ ရရှိခဲ့ပြီး စံပါယ်နံ့သာကေိးရွာအနီးရှိ ကျေးရွာများလည်း အရေးပေါ်ရှောင်တိမ်းနေရကြောင်းသိရသည်။
စစ်ကောင်စီတပ်သည် တိုက်ပွဲဖြစ်ပွါးခြင်းမရှိဘဲ ပြည်သူများကိုသာ ပစ်မှတ်ထား၍ ရွာစဉ်လှည့်ကာ ဒရုန်းဖြင့် ဗုံးသီးချတိုက်ခိုက်နေသည်။
