လူအေး/People’s Spring
စစ်ကောင်စီသည် လားရှိုးမြို့ကို ယနေ့ နံနက်စော ၂နာရီ ၁၃မိနစ်မှ ၅နာရီ ၂၀မိနစ်အတွင်း တိုက်လေယာဉ်လေးစင်းဖြင့် လေကြောင်းမှ လေးကြိမ်းဗုံးကြဲတိုက်ခိုက်ခဲ့ကြောင်း သတင်းရရှိသည်။
မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)ထိန်းချုပ်ထားသော လားရှိုးမြို့ကို နံနက် ၂နာရီ ၁၃မိနစ်၊ ၄နာရီ ၈မိနစ်၊ ၄နာရီ ၁၅ မိနစ်၊ ၅နာရီ ၂၀မိနစ်တို့တွင် လေကြောင်းတိုက်ခိုက်ခြင်းဟု ဒေသခံများကပြောသည်။
Public Service Announcement
” ဂျက်ဖိုက်တာတွေနဲ့ လာပစ်တာ။ ရပ်ကွက် ၈ထဲကိုအများဆုံးကြဲတာ။ ထိခိုက်တာတွေကို မသိနိုင်ဘူး။ စစ်တပ်က ဒီလိုတိုက်ခိုက်နေတာကို MNDAA အနေနဲ့ တခုခု တုန့်ပြန်သင့်တယ်လို့ ထင်တယ်”ဟု မြို့ခံတစ်ဦးက ပြောသည်။
စစ်ကောင်စီသည် ဩဂုတ် ၃၀ရက်မှ စက်တင်ဘာ ၃၀ရက် တစ်လအတွင်း လားရှိုးမြို့ကို လေကြောင်းတိုက်ခိုက်မှု ၁၀ကြိမ်ထက်မနည်း ပြုလုပ်ခဲ့သည်။
မြို့ပေါ်ရပ်ကွက်များတွင် သုံးဦးသေဆုံးခဲ့ပြီး တစ်မြို့နယ်လုံးအတိုင်းအတာအားဖြင့် အရပ်သား ကိုးဦးသေဆုံးကာ ၅၀ကျော်ဒဏ်ရာရခဲ့သည်။ အထပ်မြင့်အဆောက်အဦးများနှင့် နေအိမ်များ ပျက်စီးခဲ့သည်။
အောက်တိုဘာ ၁ရက်မှစ၍ ဖုန်းလိုင်းများ ဖြတ်တောက်ထားခဲ့ရာ ယင်းနေ့မှစ၍ လေကြောင်း တိုက်ခိုက်မှုမရှိတော့ဘဲ သုံးရက်အကြာတွက် နောက်တစ်ကြိမ် လေကြောင်းမှ တိုက်ခိုက်ခြင်းဖြစ်သည်။
စစ်ကောင်စီ၏ လေကြောင်းတိုက်ခိုက်မှုများသည် လားရှိုးမြို့ပြန်လည်ထူထောင်ရေးအတွက် အတားအဆီးဖြစ်စေသလို ဒေသခံများ ပြန်လာပြီး ပြန်လည်စည်ကားလာသည့် လားရှိုးမြို့ကို လေကြောင်းပစ်မှတ်အဖြစ် တိုက်ခိုက်နေခြင်းဟု MNDAAက သတင်းထုတ်ပြန်ထားသည်။
