ဟန်နွေ/People’s Spring
ရှမ်းပြည်နယ်မြောက်ပိုင်း၊ ကွတ်ခိုင်မြို့နယ် မုံးစီးဒေသကို စစ်ကောင်စီက တိုက်လေယာဉ်ဖြင့် ဗုံးကြဲတိုက်ခိုက်ခဲ့၍ အရပ်သား ပြည်သူတစ်ဦး ဒဏ်ရာရရှိခဲ့ကြောင်း တအာင်းတပ်မတော်(TNLA)က ထုတ်ပြန်သည်။
အောက်တိုဘာ ၁၀ရက် နံနက်စော ၃နာရီခွဲတွင် မုံးစီးမြို့နယ် ရေပူစမ်းတွင် တိုက်လေယာဉ်ဖြင့် ဗုံးလေးလုံး ကြဲချတိုက်ခိုက်ခဲ့ရာ အဆောက်အဦးအချို့ ပျက်စီးခဲ့သည်ဟု ဆိုသည်။
Public Service Announcement
အဆိုပါ နေရာသည် မုံးစီးနှင့် တာမိုးညဲ ဒေသနေပြည်သူများ၏ အပန်းဖြေစခန်းနေရာ တစ်ခုသာဖြစ်ပြီး စစ်ရေးပစ်မှတ်မဟုတ်ကြောင်း၊ ပြည်သူလူထုဦးတည်ကာ လေကြောင်း တိုက်ခိုက်လာခြင်းဖြစ်ကြောင်း TNLAက ထုတ်ပြန်သည်။
စစ်ကောင်စီတပ်သည် ကွတ်ခိုင်မြို့ကို သြဂုတ် ၇ရက်နှင့် ဩဂုတ် ၅ရက်က လေကြောင်း တိုက်ခိုက်ခဲ့ရာ ပြည်သူ ၆ဦးသေဆုံးကာ ၁၀ဦးဒဏ်ရာရရှိခဲ့ပြီး ကွတ်ခိုင်မြို့မစျေးမှဆိုင်ခန်း ၄၀၀ကျော် မီးလောင်ပျက်စီးခဲ့သည်ဟု TNLAက အသိပေးထားသည်။
စစ်ကောင်စီတပ်သည် TNLAနှင့် ကိုးကန့်တပ်မတော်(MNDAA)တို့ သိမ်းပိုက်ထားသည့်မြို့ရွာများအား တိုက်ပွဲမဖြစ်ဘဲ လေကြောင်းတိုက်ခိုက်မှုများ မကြာခဏ ပြုလုပ်လျက်ရှိရာအရပ်သား ပြည်သူသေဆုံးထိခိုက်မှုများစွာရှိခဲ့သည်။
