လူအေး/People’s Spring
မြန်မာ-တရုတ်နယ်စပ်မြို့ဖြစ်သည့် ပန်ဝါမြို့မှ စစ်ကောင်စီလက်အောက်ခံ နယ်ခြားစောင့်တပ်ကို KIA က ထိုးစစ်ဆင်တိုက်ခိုက်နေပြီး စစ်ကောင်စီကလေ ကြောင်းမှပစ်ခတ်နေ၍ မြို့ခံများသည် တရုတ်နိုင်ငံဘက်သို့ထွက်ပြေးခိုလှုံနေကြရကြောင်းသတင်းရရှိသည်။
ပန်ဝါမြို့မှ နယ်စောင့်တပ် ၁၀၀၂ တပ်ရင်းကို ကချင်လွတ်လပ်ရေးတပ်မတော် (KIA) နှင့် ပူးပေါင်းတပ်များက အောက်တိုဘာလ ၁၀ရက်တွင် စတင်ထိုးစစ်ဆင်တိုက်ခိုက်နေခြင်းဖြစ်ကြောင်း ကချင်ပြည်နယ်မှ စစ်ရေးသတင်းရင်းမြစ်တစ်ဦးကပြောသည်။
Public Service Announcement
“ဆော့လော်ကို သိမ်းပြီးကတည်းက ပန်ဝါကိုချီတက်တာ။ ပြည်သူ့စစ်တွေက မခုခံဘူး။ အကုန်ဆုတ်ပြေးတာ။ ၁၀၀၂ တပ်ရင်းမှာတော့ မနေ့ကစပြီးတိုက်ပွဲပြင်းထန်နေတယ်။ ဒေသခံတော်တော်များများတရုတ်ဖက်ကိုထွက်ပြေးရတယ်” ဟု အဆိုပါ စစ်ရေးသတင်းရင်းမြစ်ကပြောသည်။
စစ်ကောင်စီသည် ပန်ဝါမြို့နယ်တိုက်ပွဲအတွင်းအောက်တိုဘာ ၁၀.ရက်မှစ၍ လေကြောင်းမှတိုက်ခိုက်ခဲ့ကြောင်းသိရသည်။
“မနေ့က လောက်ပြေရွာကို ပစ်တယ်။ ဒီကနေ့လည်း ပစ်တယ်” ဟု တရုတ်နိုင်ငံဘက်သို့ ထွက်ပြေးတင်ရှောင်ခဲ့သည့်ပန်ဝါဒေသခံတဦးကပြောသည်။
KIA နှင့် ပူးပေါင်းတပ်များသည် စက်တင်ဘာလကုန်ပိုင်းနှင့် အောက်တိုဘာ ၂ ရက်တွင် ချီဖွေ နှင့် ဆော့လော်မြို့တို့ကို ဆက်တိုက်သိမ်းပိုက်ခဲ့သည်။ထိုနောက် ပန်ဝါမြို့ကို ဆက်လက်ထိုးစစ်ဆင်နေခြင်းဖြစ်သည်။
ထိုအပြင် KIA နှင့် ပူးပေါင်းတပ်သည် အောက်တိုဘာ ၃ရက်တွင် ချီဖွေ-ပန်ဝါလမ်းပေါ်ရှိ ၁၁မိုင် BGF စခန်းကို သိမ်းပိုက်ခဲ့ပြီး အောက်တိုဘာ ၄ရက်တွင် ပန်ဝါသွားလမ်းပေါ်ရှိ လန်းဂျော်စစ်ကောင်စီ ယာယီ စခန်းတို့ကိုလည်း သိမ်းပိုက်ထားသည်။
ပန်ဝါမြို့သည် ချီဖွေမြို့နယ်တွင် ပါဝင်ပြီး တရုတ်မြန်မာနယ်စပ်မြို့ ဖြစ်ပြီး စစ်ကောင်စီ လက်အောက်ခံ ဦးဇခုန်တိန့်ယိန်း ၏ ကချင်အထူးဒေသ(၁)နယ်မြေဖြစ်သည်။ လက်ရှိတွင် KIA က ကချင်အထူးဒေသ(၁) အတွင်းရှိ ဆဒုံး၊ ဆော့လော်၊ ချီဖွေမြို့များကိုတိုက်ခိုက်သိမ်းပိုက်ထားသည်။ ထို့ပြင်ဒေသတွင်း လမ်းကြောင်းများကိုလည်း KIA ပူးပေါင်းတပ်က ထိန်းချုပ်ထားသည်။
ဦးစခုန်တိန့်ယိန်း သည် စစ်တပ်နှင့်ကာလရှည်လက်တွဲခဲ့သူဖြစ်သည်။သူ၏ နယ်ခြားစောင့်တပ် ၁၀၀၂ တပ်ရင်းသည် ပန်ဝါမြို့တွင် အခြေစိုက်ထားပြီး မြေရှားသတ္တုထုတ်လုပ်မှုများ အကြီးအကျယ်ပြုလုပ်နေကြောင်း ဒေသခံများကပြောသည်။
(ပန်ဝါဒေသအပါအဝင် မြန်မာ-တရုတ်နယ်စပ်ကို Google Earth တွင်တွေ့ရမှု)
