အမျိုးသမီးငယ်များအပါအဝင် ဓားစာခံ ပြည်သူ ၇၀ကျော်ကို ဆက်လက်ဖမ်းဆီးထား
အမျိုးသမီးငယ်များအပါအဝင် ဓားစာခံ ပြည်သူ ၇၀ကျော်ကို ဆက်လက်ဖမ်းဆီးထားဇေအောင်/People’s Spring
စစ်ကိုင်းတိုင်း၊ ဘုတလင်မြို့နယ်တွင် တကျော့ပြန် စစ်ကြောင်းထိုးနေသော စစ်ကောင်စီတပ်က အင်းတဲကျေးရွာ မီးရှို့ဖျက်ဆီးပြီး အမျိုးသမီးငယ်များအပါအဝင် ဓားစာခံပြည်သူ ၇၀ကျော်ကို ဆက်လက်ဖမ်းဆီးထားကြောင်း သတင်းရရှိသည်။
အောက်တိုဘာ ၂၇ ရက်က တကျော့ပြန် စစ်ကြောင်းထိုးနေသည့် အင်အား ၁၅၀ခန့်ပါ စစ်ကောင်စီစစ်ကြောင်းသည် ယမန်နေ့ (အောက်တိုဘာ ၂၉ရက်)ညနေပိုင်းက အင်းတဲကျေးရွာကို မီးရှို့နေပြီး ယနေ့နံနက်ပိုင်းအထိ စစ်ကြောင်းထွက်ခွာခြင်း မရှိသေးကြောင်း ဒေသခံများက ပြောသည်။
“မီးရှို့တာ ငါးအိမ်လောက်ပါသွားတယ်။ အခုမနက် ဂန်း(သေနတ်)တွေတော့ ရမ်းဖောက်နေတယ်။ ထွက်ခွာခြင်းတော့ မရှိသေးဘူး။”ဟု ဘုတလင်အခြေစိုက် ရွာဇော်ကြီး၏ တော်လှန်အသံမှ တာဝန်ရှိသူတစ်ဦးက ပြောသည်။
Public Service Announcement
အဆိုပါစစ်ကြောင်းသည် (၁၈)မိုင်ခန့်အကွာရှိ မုံရွာမြို့ အနောက်မြောက်တိုင်း စစ်ဌာနချုပ် (နမခ)သို့ ပြန်ဆုတ်မည့်အခြေအနေရှိ၍ အဆိုပါ လမ်းကြောင်းရှိ ကျေးရွာအများအပြား ကြိုတင်တိမ်းရှောင်နေကြောင်း ဘုတလင်အခြေစိုက်ကာကွယ်ရေးရဲဘော်အချို့က ပြောသည်။
“နမခကိုပြန်မယ်လို့ ခန့်မှန်းတယ်။ ပြန်တယ်ဆိုတာက လမ်းကြောင်းတလျှောက် ရှင်းလင်းရင်းနဲ့ပေါ့။ အနောက်ဘက်နဲ့ မြောက်ဘက်တွေက တော်တော်များများ ရှင်းလင်းပြီးသွားပြီ။ အရှေ့တောင်ဘက်နဲ့ နမခတကြောက မလျှောက် ခဲ့ရသေးဘူး။ အင်းတဲအရှေ့ဘက် ပေလမ်းတလျှောက်ကနေ ဝင်မယ်ပဲထင်တယ်။”ဟု ဘုတလင်အခြေစိုက် ကာကွယ်ရေးရဲဘော်တစ်ဦးက ပြောသည်။
ဓါးစာခံဖမ်းဆီးခံထားရသူများတွင် အမျိုးသမီး ၄၀ဦးကျော်၊ အမျိုးသား ၂၀ မှ ၃၀ခန့် အထိ ဖမ်းဆီးခံထားရပြီး အများစုမှာ လူငယ်များဖြစ်ကြောင်း ဒေသကာကွယ်ရေးအဖွဲများက ပြောသည်။
“တချို့ ဓါးစာခံက ဆယ်ရက်ကျော်ပြီ။ ပထမတစ်ခေါက်ကတည်းက ခေါ်သွားလိုက်တာ အခုဆို ၁၈ရက်လောက်ရှိပြီထင်တယ်။ လွှတ်ပေးတာက လေးယောက်လောက်ပဲ ရှိသေးတာ။”ဟု ဘုတလင်အခြေစိုက် ကာကွယ်ရေးရဲဘော်က ပြောသည်။
အဆိုပါစစ်ကြောင်းအား ကာကွယ်ရေးအဖွဲ့များက ဖြတ်တောက်တိုက်ခိုက်မှုအဖြစ် မိုင်းဆွဲခြင်း၊ ပစ်ခတ်တိုက်ခိုက်ခြင်းများလည်း ရှိနေကြောင်း သိရသည်။
စက်တင်ဘာ ၃ဝရက်က ဘုတလင်မြို့နယ်အတွင်း စစ်ကောင်စီစစ်ကြောင်းတစ်ကြောင်းလုံး ပျောက်ဆုံးအောင် တိုက်ခိုက်ခံရပြီးနောက် စစ်ကောင်စီတပ်က ကျေးရွာများအား အောက်တိုဘာ ၁၁ရက်မှစတင်ကာ စစ်ကြောင်းထိုးခဲ့သည်။
စစ်ကြောင်းတစ်လျှောက် ဒေသခံပြည်သူ ၂၄ဦးထက်မနည်း သတ်ဖြတ်ခံခဲ့ရပြီး သုံးဦးထက်မနည်း ခန္ဓာကိုယ်အစိတ်အပိုင်းများ ဖြတ်တောက်ခံခဲ့ရသည်။
ထို့အပြင် စစ်ကောင်စီစစ်ကြောင်းက အိမ်ခြေများကိုပါ မီးရှို့ဖျက်ဆီးခဲ့ရာ ကျေးရွာခြောက်ရွာထက်မနည်းမှ နေအိမ် ၄၀၀ ကျော် မီးရှို့ဖျက်ဆီးခံခဲ့ရကြောင်း သတင်းရရှိသည်။
ထို့အပြင် ဘုတလင်နယ်အတွင်းရှိ ကျေးရွာအများအပြားမှ ပြည်သူထောင်နှင့်ချီထွက်ပြေးတိမ်းရှောင်နေရပြီး စားနပ်ရိက္ခါများ လိုအပ်နေကြောင်း စစ်ရှောင်ကူညီနေသူများက ပြောသည်။
