စစ်ကောင်စီတပ်သေဆုံးမှုရှိပြီး လက်နက်ခဲယမ်းများရ
စက်တင်ဘာ-၈၊ ၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU)၊မြိတ်-ထားဝယ်ခရိုင် တပ်မဟာ (၄)နယ်မြေ ပုလော (လယ်မူလား)မြို့နယ်ရှိ စစ်ကောင်စီတပ်စခန်းတခုကို ယနေ့ (စက်တင်ဘာ ၈ရက်) နံနက်တွင် သိမ်းပိုက်နိုင်ခဲ့ကြောင်း KNU ဗဟိုက သတင်းထုတ်ပြန်သည်။
စက်တင်ဘာ ၈ရက် နံနက် ၇နာရီခန့်တွင် ပုလောမြို့နယ် ထမင်းမစားရွာအတွင်း တပ်စွဲထားသော အာဏာသိမ်းစစ်တပ်စခန်းကို KNU၏ ကရင်အမျိုးသားလွတ်မြောက်ရေးတပ်မတော်(KNLA) ၊တပ်မဟာ(၄) လက်အောက်ခံ KNDOတပ်ရင်း(၇)၊ တပ်ခွဲ(၂)၊ တပ်ခွဲ(၅)၊ KNLA အထူးတပ်ဖွဲ၊ ပလောပြည့်သူ့ကာကွယ်ရေးတပ်ဖွဲနှင့် တော်လှန်ရေးပူးပေါင်းတပ်ဖွဲများတိုက်ခိုက်သိမ်းပိုက်နိုင်ခဲ့ဟုဆိုသည်။
Public Service Announcement
“ထမင်းမစားရွာကထားဝယ်နဲ့ဘိတ်ရဲ့အမှတ်(၈)လမ်းမကြီးပေါ်မှာတည်ရှိတဲ့ရွာပေါ့နော်။၂၀၂၁ ကတည်းကတပ်စွဲထားတာ။စာသင်ကျောင်းထဲမှာလည်းရှိတယ် ကုန်းတကုန်းကြီးတယ် တပ်စွဲထားတာ။ အမှတ်(၁၂)တိုင်းဗဟို ရဲ့လက်အောက်ခံ ၊တိုင်းဗဟို ၁၂ လက်အောက်ခံတပ်ရင်း၂၈၀နဲ့ အမြောက်တပ်တွေရှိတယ်။ပြောရမယ်ဆိုရင်တော့ ကာကင်းတခုအနေနဲ့ စခန်းချထားတာပေါ့”ဟု KNLA တပ်မဟာ(၄) သတင်းရင်းမြစ်က စခန်းသိမ်းတိုက်ခိုက်ခဲ့သည့် ထမင်းမစားကျေးရွာ စစ်ကောင်စီတပ်စခန်း အခြေအနေကို ပြောသည်။
ယနေ့စခန်းသိမ်းတိုက်ပွဲတွင်စစ်ကောင်စီတပ်က သေဆုံးမှုရှိပြီး ထွက်ပြေးသွားသူများရှိဟု ဆိုသည်။
“လက်နက်ခဲယမ်းတွေလည်းရတယ်။တချို့စက်ပစ္စည်းတွေရတယ်” ဟု သတင်းရင်းမြစ်က ပြောသည်။
KNU မြိတ်-ထားဝယ်ခရိုင်၏ထုတ်ပြန်ချက်တွင်၎င်းတပ်စခန်းသည် အာဏာသိမ်းစစ်တပ်၏ ခလရ(၂၈၀)တပ်ရင်း၊ အမတ(၃၀၉)တပ်ရင်း၊ အမှတ်(၁၂)တပ်မတော်လေ့ကျင့်ရေးသင်တန်းကျောင်း တပ်ဖွဲဝင်များ စုစုပေါင်း အင်အား (၄၀)ကျော်တပ်စွဲထားဟု ဖော်ပြထားသည်။
KNUတပ်မဟာ(၄)နှင့်တော်လှန်ရေးပူးပေါင်းတပ်များသည် တနင်္သာရီ တိုင်းအတွင်း နယ်မြေစိုးမိုးနိုင်ရေးနှင့် စစ်အင်အားဖြည့်တင်းနိုင်ရေး ကြိုးပမ်းနေသည့် စစ်ကောင်စီတပ်များကို အထိနာအောင် တိုက်ခိုက်နိုင်သကဲ့သို့ ထီးခီး၊ထီးထဒေသရှိ စစ်ကောင်စီနယ်စပ်စခန်းများကိုလည်း တိုက်ခိုက်သိမ်းပိုက်ထားသည်။
