မေ – ၆ ၊၂၀၂၆
တောင်ကိုရီးယား သမ္မတကတော်ဟောင်းရဲ့ အယူခံကိစ္စ ကြားနာမှုကို ဦးဆောင် စစ်ဆေးခဲ့တဲ့ အကြီးအမှူး တရားသူကြီးဟာ အဆုံးစီရင်တယ်လို့ ယူဆရတဲ့ အခြေအနေမျိုးနဲ့ သေဆုံးသွားပါတယ်။
ရှင်ဂျောင်အိုရဲ့ အလောင်းကို ဆိုးလ်မြို့တော် တရားရုံးတစ်ခုနားက ပန်းခင်းမှာ ရဲတွေက မေလ ၆ ရက် မနက်အစောပိုင်းမှာ ရှာတွေ့ခဲ့ပါတယ်။
သူဟာ လာဘ်ပေးလာဘ်ယူမှုအတွက် ထောင်ဒဏ် ချမှတ်ခံခဲ့ရသူ သမ္မတကတော်ဟောင်း ကင်မ်ကွန်ဟီးရဲ့ အယူခံ ကြားနာမှုတွေကို ဦးဆောင်ခဲ့တဲ့ တရားသူကြီး ဖြစ်ပါတယ်။ ကင်မ်ဟာ မူလပြစ်ဒဏ်ဖြစ်တဲ့ ထောင်ဒဏ် လပေါင်း ၂၀ ကနေ အယူခံရုံးရဲ့ စီရင်ချက်မှာတော့ ထောင်ဒဏ် လေး နှစ်ထိ တိုးသွားတာကို ကြုံခဲ့ရပါတယ်။
Public Service Announcement
ကင်မ်ဟာ စစ်အုပ်ချုပ်ရေး ကြေညာဖို့ ကြိုးစားခဲ့တဲ့ လုပ်ရပ်ကြောင့် ရာထူးကနေ ဖယ်ရှားခံရပြီး ထောင်ဒဏ် ချမှတ်ခံရသူ သမ္မတဟောင်း ယွန်ဆွတ်ယောရဲ့ ဇနီးဖြစ်ပါတယ်။
သေဆုံးသူ တရားသူကြီး ရှင်ရဲ့ အိတ်ကပ်ထဲမှာတော့ ကိုယ့်ကိုယ်ကိုယ် အဆုံးစီရင်ကြောင်း စာတစ်စောင် ရှိနေခဲ့ပါတယ်။ သူက ကိစ္စတချို့အတွက် တောင်းပန်ထားပေမယ့် ကင်မ်ကို ပြစ်ဒဏ်တိုးခဲ့တဲ့ အမှုနဲ့ ပတ်သက်တဲ့ စီရင်ဆုံးဖြတ်ချက် အကြောင်းကိုတော့ ထည့်သွင်း ရည်ညွှန်းမထားခဲ့ဘူးလို့ ရဲတွေက ဆိုပါတယ်။
ရဲတွေက ဒီဖြစ်စဉ်မှာ ပြင်ပ ပယောဂ တစ်ခုခု မပါဝင်ဘူးလို့ ကနဦး ယူဆထားပေမယ့် သေမှုသေခင်း အသေးစိတ်ကို ဆက်လက် စုံစမ်းမယ်လို့ ပြောပါတယ်။ တရားသူကြီးဟာ အမြင့်တစ်နေရာကနေ ခုန်ချခဲ့တာလို့ ယုံကြည်ရပါတယ်။
ဇန်နဝါရီလတုန်းက အောက်ရုံးမှာ ထောင်ဒဏ် လ ၂၀ စီရင်ချက် ချမှတ်ခံခဲ့ရပြီး ကင်မ်က ဆိုးလ် တရားရုံးချုပ်မှာ အယူခံဝင်ခဲ့ပြီး ရှင်ကတော့ အဲဒီအမှုမှာ တရားသူကြီး အကြီးအမှူး အနေနဲ့ ကိုင်တွယ်ခဲ့တာပါ။
ဧပြီလမှာတော့ တရားသူကြီးရှင် ကြီးမှူးနေတဲ့ တရားခွင်က ကင်မ်ဟာ တခြားအဂတိမှုနဲ့ စတော့ရှယ်ယာ အရှုပ်အထွေးတွေမှာ ပတ်သက်ဆက်နွှယ်ကြောင်း ဆုံးဖြတ်ခဲ့သလို ပြစ်ဒဏ်ကိုလည်း မူလကထက်တိုးပြီး ထောင်ဒဏ် လေး နှစ် စီရင်ချမှတ်ခဲ့ပါတယ်။
ကိုးကား – Korea Herald
