ဇူလိုင်-၃၊၂၀၂၆။ထားမြတ်/People’s Spring
ကချင်ပြည်နယ်ရွှေကူမြို့နယ်တိုက်ပွဲမှာ အာဏာသိမ်း စစ်တပ်ဘက်ကသေဆုံးထိခိုက်များပြားနေတယ်လို့ကချင်စစ်ရေးတသင်းရင်းမြစ်အချို့ကပြောပါတယ်။
စစ်တပ်ကရှမ်းမြောက်မဘိမ်းမြို့နယ်၊ငါးအိုးဒေသကနေရွှေကူကိုစစ်အင်အားဖြည့်ပြီးဗန်းမော်ကို စစ်ကူပို့ကြိုးပမ်းလာလို့မေလလဆန်းကတည်းက တိုက်ပွဲတွေ ပြင်းထန်နေတာပါ။
ငါးအိုး-ရွှေကူကြားတိုက်ပွဲ ပြင်းထန်ခဲ့သလို လက်ရှိဗန်းမော်ကို ဦးတည်နေတဲ့ စစ်တပ်စစ်ကြောင်းဟာလည်း KIA ရဲ့ ဖြတ်တောက်တိုက်ခိုက်မှုကြောင့် အထိနာပြီးတပ်ပြန်ဆုတ်သွားတယ်လို့ စစ်ရေးသတင်းရင်းမြစ်ကပြောပါတယ်။
Public Service Announcement
“ရွှေကူတိုက်ပွဲတော့ စ…တွေ တော်တော်သေနေပြီ။ တော်တော်များသွားပြီ။ ကျနော်ထင်တာ ၃၀၀ ကျော်လောက်ရှိပြီ ။ သေတာနဲ့ ဒဏ်ရာရရတာနဲ့ဆိုရင် ၄၀၀၊ ၅၀၀လောက်ရှိပြီ။နေ့တိုင်းသေနေတာ။တရက်ကို ၁၀ယောက်ကျော်၊ တခါတလေ အယောက် ၂၀၊ တခါတလေ ကျရင် ၃၀ အဲဒီလို သေတာ။ လက်နက်တွေနဲ့စစ်အသုံးအဆောင်ပစ္စည်းတွေ လက်နက်ခဲယမ်းတွေကတော့ နေ့တိုင်းကိုရတာ” လို့ ကချင်စစ်ရေးသတင်းရင်းမြစ်တဦးကပြောပါတယ်။
ရွှေကူဒေသဟာ KIAတပ်မဟာ(၁၁) တပ်ရင်း(၁၂)နယ်မြေ ဖြစ်ပြီး ပြည်သူ့ကာကွယ်ရေးတပ်မတော်(PDF) အပါအဝင် မဟာမိတ်တွေနဲ့ပူးပေါင်းကာစစ်တပ်ကိုခုခံတိုက်ခိုက်နေတာဖြစ်ပါတယ်။
ကချင်သတင်းရင်းမြစ်အချို့နဲ့ PDF တပ်ရင်းအချို့ရဲ့ရွှေကူဒေသတိုက်ပွဲ ရုပ်သံ တွေအရ စစ်တပ်စစ်ကြောင်းတွေကို တော်လှန်ရေးဘက်က အသေခံဒရုန်းတွေနဲ့ အထိနာအောင် တိုက်ခိုက်နိုင်ခဲ့တာကို တွေ့ရပါတယ်။ ရုပ်သံမှတ်တမ်းတွေမှာ စစ်သားတွေရှိတဲ့နေရာမျိုးစုံကို ဒရုန်းတွေနဲ့ တိုက်ခိုက်ချေမှုန်း နေတာကိုတွေ့ရပါတယ်။
အာဏာသိမ်းစစ်တပ်ဟာရွှေကူကို မြေပြင်ကနေ စစ်အင်အားလက်နက်ခဲယမ်းရိက္ခာဖြည့်တင်းနိုင်ခြင်း မရှိတဲ့ အခြေအနေမှာ လေကြောင်းကနေ ခဲယမ်းရိက္ခာဖြည့်တင်းမှုတွေရှိတယ်လို့ သတင်းရင်းမြစ်အချို့က အသိပေးထားပါတယ်။
ရွှေကူရှိ ခလရ(၅၆)၊ ခမရ(၆၀၂) တပ်ထဲကို စစ်တပ်ကဇူလိုင် ၂ရက်ညနေပိုင်းမှာ လေကြောင်းကနေ ရိက္ခာခဲယမ်းလာချပေးသွားတယ်လို့ ကချင်စစ်ရေး အခြေအနေတွေအသိပေးနေသူ တဦးက ရုပ်သံမှတ်တမ်းဖော်ပြ အသိပေးပါတယ်။ဒါ့အပြင် ရွှေကူဝန်းကျင်၊ ကသာ၊ နဘားလမ်းဆုံ နဲ့ အင်းတော်ကြီးဒေသ လုံးတုံ ဘက်မှာ KIA၊PDF နဲ့ စစ်တပ်အကြားတိုက်ပွဲတွေဖြစ်ပွားနေတယ်လို့လည်း သတင်းရင်းမြစ်က ရေးသားထားပါတယ်။
ကချင်ဒေသ စစ်ရေးအခြေအနေတွေနဲ့ပတ်သက်ပြီးမေးမြန်းဖို့ KIA သတင်းပြန်ကြားရေးဌာနတာဝန်ခံဗိုလ်မှူးကြီးနော်ဘူထံဆက်သွယ်ထားဆဲဖြစ်ပြီး အဆက်အသွယ် မရသေးပါဘူး။
