“စစ်ကောင်စီအောက်မှာမနေချင်ဘဲ ထွက်ပြေးချင်တဲ့သူအများကြီးရှိတယ်”

KNU တပ်မဟာ ၅ နယ်မြေကို လာရောက်ပူးပေါင်းတဲ့စစ်ကောင်စီတပ်ဖွဲ့ဝင် ၅၀ နီးပါးထိရှိလာ

စစ်အာဏာသိမ်းတဲ့ဖေဖော်ဝါရီလ ၁ ရက်ကစတင်ပြီး ဒီနေ့ ဒီဇင်ဘာလ ၂၈ ရက်အထိ ၁၀ ကျော် ကာလအတွင်း KNU တပ်မဟာ ၅ နယ်မြေကို လာရောက်ပူးပေါင်းတဲ့ စစ်ကောင်စီတပ်ဖွဲ့ဝင် ဦးရေဟာ ၄၉ ဦးရှိတယ်လို့ တပ်မဟာ ၅ ရဲ့ပြောရေးဆိုခွင့်ရှိသူ ဒုတိယ ဗိုလ်မှူးကြီး စောအယ်ဒို ကပြောလိုက်ပါတယ်။

ဒီလို လာရောက်ပူးပေါင်းကြတဲ့သူတွေကို မေးမြန်းကြည့်ရာမှာ တိုင်းပြည်ကို မကာကွယ်ဘဲ ပြည်သူလူထုကို တိုက်ခိုက်ရမယ့်အလုပ်မျိုးမလုပ်ချင်လို့ ထွက်ပြေးလာကြတာလို့ ပြောတဲ့အကြောင်း တပ်မဟာ ၅ ပြောရေးဆိုခွင့်ရှိသူက ပြန်ပြောပြပါတယ်။

လာရောက်ပူးပေါင်းတဲ့စစ်ကောင်စီတပ်ဖွဲ့ဝင်တွေထဲမှာအများစိုးရိမ်နေကြသလို လက်ရှိအချိန်ထိ စုံစမ်းထောက်လှမ်းတဲ့သူမပါဘူးလို့လည်းပြောပါတယ်။

အဲဒီစစ်ကောင်စီတပ်ဖွဲ့ဝင်ထဲမှာ မိသားစုထံပြန်လိုတဲ့သူတွေကို ခရီးစရိတ်ထုတ်ပေးတာမျိုးရှိသလို၊မပြန်တော့ဘဲ တော်လှန်ရေးအဖွဲ့တွေနဲ့ ပူးပေါင်းတိုက်ပွဲဝင်တဲ့သူတွေလည်းရှိတယ်လို့သိရပါတယ်။

Public Service Announcement

တပ်မဟာ ၅ နယ်မြေထဲမှာရှိတဲ့ စစ်ကောင်စီတပ်ဖွဲ့ဝင်တွေအနေနဲ့လည်း စစ်ခေါင်းဆောင်တွေကို ကာကွယ်ပေးတာမျိုးဆက်မလုပ်လိုတော့ဘဲ CDM လုပ်ချင်တာ ဒါမှမဟုတ် တော်လှန်ရေးအဖွဲ့တွေနဲ့ ပူးပေါင်းချင်တယ်ဆိုရင် စီစဉ်ပေးလို့ရတယ်လို့ တပ်မဟာ ၅ ရဲ့ပြောရေးဆိုခွင့်ရှိသူ ဒုတိယ ဗိုလ်မှူးကြီး စောအယ်ဒို ကပြောပါသေးတယ်။