ရုရှားက အကူအညီ တောင်းထားတယ်ဆိုတဲ့ အမေရိကန်ရဲ့ စွပ်စွဲချက်ကို တရုတ်ငြင်းဆို

ယူကရိန်း စစ်ပွဲနဲ့ ပတ်သက်လို့ ပါဝင် ထောက်ပံ့ဖို့ ရုရှားက အကူအညီ တောင်းထားတယ်ဆိုတဲ့ အမေရိကန်ရဲ့ စွပ်စွဲမှုတွေကို တရုတ်က ငြင်းဆိုသွားပါတယ်။

အမေရိကန် အစိုးရရဲ့ အမျိုးသား လုံခြုံရေး အကြံပေး အရာရှိ ဂျိတ်ခ် ဆူလီဗန်က အရေးယူ ပိတ်ဆို့မှုတွေကြောင့် ဘက်ပေါင်းစုံ အကျပ်အတည်း ကြုံနေတဲ့ ရုရှားဟာ တရုတ်ဆီက လက်နက်နဲ့ စီးပွားရေး အကူအညီတွေ ရနိုင်ဖို့ တောင်းခံနေကြောင်း ပြောကြားခဲ့ပါတယ်။ တကယ်လို့ တရုတ်က ရုရှားကို အကူအညီ ပေးခဲ့မယ် ဆိုရင်လည်း နောက်ဆက်တွဲ ဆိုးကျိုးတွေနဲ့ ရင်ဆိုင်ရလိမ့်မယ်လို့ပါ သူက သတိပေးသွားပါတယ်။

ဒါပေမဲ့ တရုတ် အစိုးရကတော့ ဆူလီဗန်ရဲ့ စွပ်စွဲမှုတွေကို ငြင်းဆိုပြီး အမေရိကန်က တရုတ်နဲ့ ပတ်သက်လို့ သတင်းမှားတွေ ဖြန့်ဝေနေတာသာ ဖြစ်တယ်လို့ တုံ့ပြန်ခဲ့ပါတယ်။

ယူကရိန်း ပြဿနာကို အခြေပြုပြီး တရုတ်အပေါ် နိုင်ငံတကာ အထင်အမြင် လွဲမှားအောင် အမေရိကန်က ပြုမူ ဆောင်ရွက်နေတာတွေက လက်ခံနိုင်စရာ မရှိဘူးလို့ ဗြိတိန်နိုင်ငံ၊ လန်ဒန်မြို့ အခြေစိုက် တရုတ် သံရုံးက ကြေညာချက် ထုတ်ပြန်ပါတယ်။

Public Service Announcement

ရုရှား-ယူကရိန်း စစ်ပွဲမှာ တရုတ်ဟာ အပြုသဘောဆောင်ပြီး ငြိမ်းချမ်းရေးဆီ ဦးတည်တဲ့ ဆွေးနွေးမှုတွေ အကောင်အထည် ပေါ်လာအောင် အားပေး ကူညီနေတာသာ ဖြစ်တယ်လို့ သံရုံး ထုတ်ပြန်ချက်မှာ ဖော်ပြထားပါတယ်။ အခုအချိန်မှာ အရေးအကြီးဆုံးက ပြဿနာတွေ ပိုဆိုးအောင် မီးစာဖြည့်ဖို့ မဟုတ်ဘဲ တင်းမာမှုတွေ အမြန်ဆုံး လျော့ပါးသွားဖို့သာ ဖြစ်တယ်လို့လည်း တရုတ်ဖက်က ဆိုပါတယ်။

တရုတ်က အခုလို ငြင်းချက် ထုတ်ထားပေမယ့်လည်း ထောက်လှမ်းရေး အစီရင်ခံစာတွေအရ တရုတ်ဟာ ရုရှားကို အကူအညီတွေပေးဖို့ အစီအစဉ် ရှိနေကြောင်း အမေရိကန် စစ်ဘက် အရာရှိ တချို့က ပြောကြားသွားပါတယ်။