မကွေးတိုင်း၊ ပေါက်မြို့နယ်ရှိ ကြက်ဆူအိုင့်ကျေးရွာကို ယနေ့နံနက်ပိုင်းတွင် စစ်ကောင်စီတပ်က ဝင်ရောက်ဖျက်ဆီးမီးရှို့နေကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့ (စက်တင်ဘာ၂၅ ရက်) ညက မြိုင်နယ် အနောက်ပိုင်း ပေါက်နယ်စပ်ရှိ ပေါက်မြို့နယ် ကြက်ဆူအိုင့်ကျေးရွာတွင် ရောက်ရှိနေသော စစ်ကောင်စီတပ်များသည် ယနေ့ (စက်တင်ဘာ ၂၆ ရက်) နံနက် ၇ နာရီခန့်တွင် ကြက်ဆူအိုင့်ရွာကို မီးရှို့ဖျက်ဆီးနေခြင်းဖြစ်ကြောင်း We Love Myaing အဖွဲ့က အသိပေးသည်။
အဆိုပါစစ်ကြောင်းသည် ကန်နီ ပျူစောထီးရွာ အထိုင်ချစခန်းမှ မြိုင်နယ်မြောက်ပိုင်းကို စစ်ကြောင်းထိုးနေသည့် စစ်ကြောင်းဖြစ်ကြောင်း၊ စက်တင်ဘာ၂၃ ရက်က သန်းနုတောရွာ၌ ညအိပ် ပြီး စက်တင်ဘာ၂၄ ရက်တွင် မှန်ရင်းရွာ၊ယမန်နေ့ (စက်တင်ဘာ၂၅ ရက်)တွင် ကျောက်ခွက်ရွာနှင့် ပေါက်မြို့နယ်မြောက်ပိုင်း ကြက်ဆူအိုင့်ရွာနှင့် သရက်ကန်ရွာကို ဝင်ရောက်ခဲ့ကြောင်း We Love Myaing အဖွဲ့တာဝန်ရှိသူက ပြောသည်။
“မနေ့ ညနေက ကြက်ဆူအိုင့်ရွာအနီးက တောထဲမှာ ညအိပ်ပြီး ဒီနေ့မနက် ရွာကို မီးဝင်ရှို့တာပါ။ အိမ်ခြေကတော့ နှစ်ရာလောက်ရှိတယ်။ အဲဒီရွာက ပေါက်နယ်နဲ့ မြိုင်နယ်အစပ်မှာ ရှိတာပါ။ရွာပတ်လည်မှာ ရေနံထွက်တော့ ရွာက စည်တယ်။”ဟု We Love Myaing အဖွဲ့တာဝန်ရှိသူက ရှင်းပြသည်။
Public Service Announcement
ယမန်နေ့ (စက်တင်ဘာ ၂၅ ရက်) နံနက်ပိုင်းက မြိုင်မြို့နယ် ကျောက်ခွက်ကျေးရွာသို့ စစ်ကြောင်းထိုးလာသော အင်အား ၆၀ခန့်ပါ စစ်ကောင်စီတပ်နှင့်ပျူမျုးအား မြိုင်(ပကဖ)အဖွဲ့က မိုင်းပွိုင့်အကြီး ၂ပွိုင့်ဖြင့် တိုက်ခိုက်ခဲ့သေးသည်။
မြိုင်နယ်တွင် စစ်ကောင်စီတပ်က ကျေးရွာများအား စစ်ကြောင်းထိုးဖျက်ဆီးမှုများ ပြုလုပ်နေပြီး ဒေသခံများလည်း ထွက်ပြေးတိမ်းရှောင်နေရသည်။
