မကွေးတိုင်း၊ ငဖဲမြို့နယ်တွင် စစ်ကောင်စီ၏ အမှတ် (၉၀၅) အမြှောက်တပ်မှ တပ်သားလိုက်ပါလာသည့် ယာဥ်တစ်စီးအား ပဒေသာမိုင်းဖြင့် ဖောက်ခွဲတိုက်ခိုက်ခဲ့ကြောင်း People’s Revolution Alliance(PRA-Magway) သတင်းနှင့် ပြန်ကြားရေး တာဝန်ခံက ပြောသည်။
ယမန်နေ့ (ဇန်နဝါရီ ၁ ရက်) နံနက် ၈ နာရီခွဲခန့်က အမှတ်(၉၀၅)အမြှောက်တပ်က စစ်ကောင်စီတပ်သားများလိုက်ပါလာသော မော်တော်ယာဥ်ကို ငဖဲမြို့နယ်၊ ဂုတ်ကြီးကျေးရွာနှင့် မြေလတ်ကျေးရွာကြားတွင် ပဒေသာမိုင်းဖြင့် ခြုံခိုတိုက်ခိုက်ခဲ့ခြင်းဖြစ်ကြောင်း PRA-Magway သတင်းနှင့် ပြန်ကြားရေး တာဝန်ခံက ပြောသည်။
စစ်ကောင်စီဘက်က ထိခိုက်သေဆုံးမှုရှိနိုင်ပြီး နောက်ဆက်တွဲအခြေအနေ ဆက်လက်စုံစမ်းနေကြောင်း ၎င်းတာဝန်ခံက ပြောသည်။
“စစ်ကောင်စီယာဥ်ပေါ်မှာတော့ အင်အား၂၅ယောက် ပါပါတယ်။သူတို့က ငဖဲမြို့နယ် ဂုတ်ကြီးကျေးရွာကနေပြီးတော့ သူတို့တပ်ရှိရာ ငဖဲမြို့နယ် ဆုံကုန်းမှာရှိတဲ့တပ်ကိုပြန်တာဖြစ်ပါတယ်။ မိုင်းထိပြီးနောက် စစ်ကောင်စီဘက်က ဒဏ်ရာရတဲ့သူ အမြောက်အများရှိတယ်လို့ သိရပါတယ်။ ပြင်းထန်တဲ့သူတွေကိုတော့ နီးစပ်ရာဆေးရုံတွေကိုပို့ဆောင်တယ်လို့သိရပါတယ်။”ဟု PRA-Magway သတင်းနှင့် ပြန်ကြားရေး တာဝန်ခံက ပြောသည်။
Public Service Announcement
မိုင်းထိပြီးနောက် စစ်ကောင်စီတပ်သည် PRA မကွေးနှင့်မသက်ဆိုင်သည့် လူငယ်နှစ်ဦးကိုလည်း ဖမ်းဆီးထားကြောင်း၊ မိုင်းထိရာအနီးရှိ မြေလတ်ကျေးရွာကိုလည်း စစ်ကောင်စီတပ်များက ဝင်ရောက်စီးနင်းရှာဖွေမှုများ ပြုလုပ်ခဲ့ကြောင်း PRA-Magway သတင်းနှင့် ပြန်ကြားရေး တာဝန်ခံက ပြောသည်။
ပြီးခဲ့သည့် နိုဝင်ဘာ ၁ ရက် မွန်းတည့် ၁၂ နာရီခန့်ကလည်း ဂုတ်ကြီးကျေးရွာရဲစခန်းမှ ကင်းလှည့်စစ်ကြောင်းကို ခြုံခိုတိုက်ခိုက်ခဲ့ရာ ဂုတ်ကြီးရဲစခန်းမှ ရဲတပ်ကြပ်တစ်ဦးသေဆုံးခဲ့ပြီး လက်နက်ခဲယမ်းများ သိမ်းဆည်းရမိခဲ့ကြောင်း People’s Revolution Alliance(PRA-Magway)က အသိပေးထားသည်။
