မန္တလေးမြို့တွင် စစ်အာဏာရှင်ဖြုတ်ချရေး နေ့စဥ်မပျက် ချီတက်ဆန္ဒပြနေသည့် သံဃသမဂ္ဂသပိတ်စစ်ကြောင်းကို ယနေ့နေ့လည်ပိုင်းက ချီတက်ဆန္ဒပြရန်ထွက်ခွာစဥ် အကြမ်းဖက်စစ်ကောင်စီတပ်က ကားဖြင့်တိုက်ပြီး ပစ်ခတ်ဖြိုခွင်းရာ သံဃာတော်ခြောက်ပါးခန့် ဖမ်းဆီးခံရကြောင်း ဒေသခံတစ်ဦးက ပြောသည်။
“သံဃသပိတ်က စထွက်ပြီး ၅ မိနစ်တောင် မရှိသေးဘူး။ စစ်တပ်က အိမ်စီးကားတွေနဲ့ ရောက်လာပြီး ပစ်ခတ်ဝင်ဖမ်းခဲ့တာပါ။ သေနတ်ဖောက်သံတွေလည်း ကြားရတယ်။ ထိခိုက်မှု ရှိ၊ မရှိတော့ မသိရသေးပါဘူး။ ဘုန်းကြီးခြောက်ပါးလောက်တော့ အဖမ်းခံလိုက်ရတယ်လို့ ကြားပါတယ် “ဟု မန္တလေးမြို့ခံပြည်သူတစ်ဦးက ပြောသည်။
လက်ရှိတွင် အကြမ်းဖက် စစ်ကောင်စီတပ်ဖွဲ့ဝင်များ သည် မဟာအောင်မြေမြို့နယ်ရှိ ရွှေဘိုကျောင်းတိုက်ကို ပတ်ပတ်လည်ဝိုင်း၍ စစ်ဆေးမှုများ ပြုလုပ်နေကြောင်း ဒေသခံများက ဆိုသည်။
မန္တလေးသံဃသမဂ္ဂသပိတ်စစ်ကြောင်းသည် စစ်အာဏာ ရှင်ကို ဆန့်ကျင်ကြောင်း နေ့စဥ်မပျက်ဆန္ဒပြနေပြီး ယနေ့( ၂၃၆)ရက်မြောက်အဖြစ် ချီတက်ဆန္ဒပြခဲ့ခြင်း ဖြစ်သည်။
Public Service Announcement
