မြန်မာစစ်တပ်ရဲ့ ဆိုးရွားတဲ့ပြစ်မှု​တွေကို နိုင်ငံတကာအသိုက်အဝန်းနဲ့ ကုလက ထိရောက်စွာအရေးယူဆောင်ရွက်ဖို့ မြန်မာသံအမတ်ကြီးတောင်းဆို

မြန်မာစစ်တပ် ကျူးလွန်နေသော ဆိုးဝါးတဲ့ပြစ်မှုတွေနဲ့ပတ်သက်လို့ နိုင်ငံတကာအသိုက်အဝန်းနဲ့ ကုလသမဂ္ဂက ထိရောက်စွာ အရေးယူဆောင်ရွက်ဖို့ မြန်မာသံအမတ်ကြီး ဦးကျော်မိုးထွန်းက မနေ့က တောင်းဆိုခဲ့ပါတယ်။

(၇၆) ကြိမ်မြောက်ကုလသမဂ္ဂအထွေထွေညီလာခံ၊ တတိယကော်မတီရဲ့ ကလေးများ၏ အခွင့်အရေးကာကွယ်မြှင့်တင်ရေးဆိုင်ရာ အစည်းအဝေးမှာ ကုလသမဂ္ဂဆိုင်ရာမြန်မာသံအမတ်ကြီး ဦးကျော်မိုးထွန်းက တောင်းဆိုခဲ့တာပါ။

မြန်မာစစ်တပ်ဟာ ကလေးငယ်များရဲ့ လုံခြုံရေးကို စာနာ ထောက်ထားခြင်း မရှိသကဲ့သို့ ပဋိပက္ခအတွင်း ကလေးငယ်များကို ကာကွယ်ရေးနဲ့ပတ်သက်လို့ နိုင်ငံတကာ ဥပဒေတွေကိုလည်း လိုက်နာလိုခြင်းမရှိဘူးလို့ သံအမတ်ကြီးက ကုလသမဂ္ဂကို ပြောပါတယ်။

ဖေဖော်ဝါရီ ၁ ရက် အာဏာသိမ်းမှုကြောင့် အနည်းဆုံး ကလေး ၇၅ ဦး အသက်ဆုံးရှုံးခဲ့ရပြီး ကလေး ၁၀၀၀ ခန့် ဖမ်းဆီးထိန်းသိမ်း ခံထားရကြောင်းနဲ့ မြန်မာနိုင်ငံရှိ ကလေးငယ်များဟာ စစ်တပ်အာဏာသိမ်းမှုကြောင့် သူတို့ရဲ့ အခွင့်အရေး အားလုံးဆိုးဝါးစွာချိုးဖောက်ခံနေရကြောင်း ဦးကျော်မိုးထွန်းက အစီရင်ခံပါတယ်။

Public Service Announcement

ကလေးများအပေါ် မြန်မာစစ်တပ်ရဲ့ လုပ်ရပ်တွေနဲ့ ပတ်သက်လို့ နိုင်ငံတကာ အသိုက်အဝန်းကစိုးရိမ်ကြောင်း ထုတ်ဖော်နေပေမယ့် မြန်မာစစ်တပ်ဟာ အရပ်သား ပြည်သူတွေနဲ့ ကလေးတွေအပေါ် ကျူးလွန်သော ဆိုးဝါးတဲ့လုပ်ရပ်တွေကို ရပ်တန့်ခြင်းမရှိဘဲ ဆက်လက် ကျူးလွန်နေဆဲဖြစ်တယ်လို့ သံအမတ်ကြီးက ဆက်ပြောပါတယ်။

ဒါ့အပြင် မြန်မာစစ်တပ်က ဆေးရုံတွေ၊ စာသင်ကျောင်းတွေ၊ ဘာသာရေးအဆောက်အအုံတွေမှာ နေရာယူထားမှုကို ချက်ချင်းရပ်တန့်ရေး ဆောင်ရွက်ပေးဖို့ ကိစ္စနဲ့ ကလေးများအခွင့်အရေး ကာကွယ်မြှင့်တင်ရေးဆိုင်ရာ အစီအစဉ်တွေနဲ့ပတ်သက်လို့ ကုလသမဂ္ဂကို တောင်းဆိုမေး မြန်းခဲ့ပါတယ်။