သတိုး/People’s Spring
ရန်ကုန်နှင့် မန္တလေးမြို့ရှိ မဟာမိတ်အဖွဲ့များပူးပေါင်းလုပ်ဆောင်မည့် ရန်-မန်း စစ်ဆင်ရေးအနေဖြင့် မန္တလေးမြို့ နန်းတွင်းရှိ အလယ်ပိုင်းတိုင်းစစ်ဌာနချုပ်(လပခ)ကို ၁၀၇ မမ ရှော့တိုက်ဒုန်းများဖြင့် ပစ်ခတ်တိုက်ခိုက်ခဲ့ကြောင်း Operation Flame (OF) အဖွဲ့မှ တာဝန်ရှိသူကလူထုနွေဦးသို့ ပြောသည်။
“ဒီစစ်ဆင်ရေးကို ရန်-မန်းစစ်ဆင်ရေးလို့ နာမည်ပေးဖြစ်ပုံကတော့ ကျနော်တို့အနေနဲ့ ရန်ကုန်နဲ့ မန္တလေးမှာရှိတဲ့ မဟာပိတ်များအားလုံးနှင့်အတူ ပူးပေါင်းပြီးတော့ အကြမ်းဖက်စစ်တပ်ကိုအရှိန်မြှင့်တိုက်ခိုက် ချေမှုန်းသွားဖို့ဘဲ ဖြစ်ပါတယ်”ဟု ၎င်းက ပြောသည်။
စက်တင်ဘာ ၁၇ရက် ည ၆နာရီခန့် တွင် ၁၀၇ မမရှော့တိုက်ဒုန်းနှစ်လုံးနှင့် ည ၁၀နာရီခွဲခန့်တွင် ရှော့တိုက်ဒုန်း သုံးလုံးပစ်ခတ်တိုက်ခိုက်ခဲ့ခြင်းဖြစ်သည်ဟု ၎င်းက ဆက်ပြောသည်။
Public Service Announcement
“တိုက်ခိုက်မှုကြောင့် ရန်သူ့စခန်းအတွင်း ထိခိုက်ပေါက်ကွဲမှုများရှိခဲ့ပြီး လူနာတင်ကားအဝင်အထွက်များရှိခဲ့ကြောင်းကို မြေပြင်သတင်းများမှ ပြန်လည်သိရှိရပါသည်” ဟု ယင်းအဖွဲ့က အသိပေး ထုတ်ပြန်ထားသည်။
ထို့ပြင် တိုက်ခိုက်မှုအပြီး စစ်ကောင်စီက ပစ်ခတ်မှူများပြုလုပ်ခဲ့ပြီး ရပ်ကွက်များအတွင်းလည်းစစ်ဆေးမှုများလည်းပြုလုပ်ခဲ့သည်ဟု ဆိုသည်။
ရန်-မန်းစစ်ဆင်ရေးကို ရန်ကုန် နှင့် မန္တလေးမြို့ရှိ Operation Flame အဖွဲ့တို့က ပြုလုပ်ခဲ့ခြင်းဖြစ်ပြီး ရန်ကုန်မြို့တွင် စက်တင်ဘာ ၅ ရက်ညက မြောက်ဥက္ကလာပရဲစခန်းကို အဝေးထိန်းမိုင်းဖြင့် ဖောက်ခွဲတိုက်ခိုက်ခဲ့သည်ဟု သတင်းထုတ်ပြန်ထားသည်။
အလယ်ပိုင်းတိုင်းစစ်ဌာနချုပ်ကို စက်တင်ဘာ ၃ ရက်ကလည်း Brave Warriors for Myanmar (BWM) နှင့် Shadow Mandalay အဖွဲ့တို့က ၁၀၇ မမရှော့တိုက်ဒုန်းများဖြင့် ပစ်ခတ်တိုက်ခိုက်ခဲ့ရာ စစ်ကောင်စီ၏ ဒုခေါင်းဆောင်စိုးဝင်း၏ ကိုယ်ရေးအရာရှိဗိုလ်မှူးကြီးအပါအဝင် ၇ ဦးသေဆုံးခဲ့သည်ဟု သတင်းထွက်ပေါ်ခဲ့သည်။
