ဧရာမ ထိပ်ဖူးတပ် ဒုံးကျည်အမျိုးအစားသစ် စမ်းသပ်ခဲ့ကြောင်း မြောက်ကိုရီးယား ထုတ်ပြန်

ပြီးခဲ့တဲ့ ရက်ပိုင်းတုန်းက မြောက်ကိုရီးယားဟာ ၆ ရက်ပဲခြားပြီး ဒုံးကျည် စမ်းသပ် ပစ်ခတ်မှု နှစ်ခုကို လုပ်ဆောင်ခဲ့ပါတယ်။ အစိုးရပိုင် KCNA သတင်းဌာနက အဲဒီ စမ်းသပ်မှုတွေဟာ အရွယ်အစား အရမ်းကြီးမားတဲ့ စူပါထိပ်ဖူးမျိုး တပ်ဆင်နိုင်တဲ့ ပဲ့ထိန်း ဒုံးကျည်တစ်မျိုးနဲ့ နည်းပညာပိုင်း ပိုမို အဆင့်မြှင့်တင်ထားတဲ့ ခရုစ်ဒုံးကျည်တစ်မျိုးတို့ကို ပစ်ခတ်ခဲ့တာ ဖြစ်တယ်လို့ ဖော်ပြသွားပါတယ်။

မြောက်ကိုရီးယား နိုင်ငံရဲ့ လုံခြုံရေးအပေါ် ပြင်ပ ခြိမ်းခြောက်မှုတွေ ကြီးကြီးမားမား ရှိလာနေတယ်လို့ ယုံကြည်တဲ့အတွက် အခုလို လက်နက် စမ်းသပ်မှုတွေ လုပ်ဆောင်နေတာလို့လည်း နိုင်ငံခေါင်းဆောင် ကင်မ်ဂျုံအွန်းက ပြောဆိုခဲ့ကြောင်း KCNAက ကိုးကား ထုတ်ပြန်သွားပါတယ်။

Public Service Announcement

အခုလထဲမှာ ပြုလုပ်ခဲ့တဲ့ ဒုံးကျည် စမ်းသပ်မှုတွေထဲမှာ ၄ တန်ခွဲလောက် အလေးချိန်ရှိတဲ့ သမားရိုးကျ ဒုံးကျည်ထိပ်ဖူး တပ်ဆင်နိုင်တဲ့ Hwasongpho-11-Da-4.5 အမျိုးအစားလည်း ပါဝင်ခဲ့တယ်လို့ သိရပါတယ်။ အဲဒီ ဒုံးကျည်ကိုအဆင့်မြှင့်တင် မွမ်းမံတည်ဆောက်နေဆဲ အခြေအနေမှာ ဇူလိုင်လတုန်းကလည်း မြောက်ကိုရီးယားက တစ်ကြိမ် စမ်းသပ်ခဲ့ဖူးပါတယ်။

ကင်မ်ဟာ နိုင်ငံရဲ့ နျူကလီးယား လက်နက်တိုက်ကို ချဲ့ထွင်ဖို့ အစဉ်တစိုက် ညွှန်ကြားနေသလို တစ်ဖက်မှာလည်း သမားရိုးကျ စစ်လက်နက်တွေရဲ့ စွမ်းရည်နဲ့ စစ်ရေးနည်းပညာတွေကို ခေတ်နဲ့အညီ အဆင့်မြှင့်တင်ဖို့ လမ်းညွှန်ထားကြောင်း KCNAက ဆိုပါတယ်။

တောင်ကိုရီးယား စစ်ထောက်လှမ်းရေးနဲ့ လွှတ်တော်အမတ် တချို့ကတော့ မြောက်ကိုရီးယား စမ်းသပ်နေတဲ့ ဒုံးကျည်တွေဟာ ရုရှားဆီ တင်ပို့ရောင်းချဖို့ ရည်ရွယ်ထားတဲ့ အမျိုးအစားတွေ ဖြစ်နိုင်ကြောင်း သုံးသပ်ထားပါတယ်။

မြောက်ကိုရီးယားဟာ နိုင်ငံရဲ့ ဒုံးကျည်စမ်းသပ်မှု အများစုကို အရှေ့ဖက် ကမ်းလွန်ဆီ ချိန်ရွယ် ပစ်ခတ်လေ့ရှိပြီး ပင်လယ်ပြင်မှာပဲ ကျရောက်သွားတတ်ပါတယ်။ ဂျပန်နဲ့ တောင်ကိုရီးယားတို့ကတော့ အဲဒီ ဒုံးကျည် အစိတ်အပိုင်းတွေကို ဆယ်ယူပြီး စစ်ဆေးလေ့လာဖို့ ရည်ရွယ်ထားကြောင်း အတည်ပြု ပြောကြားထားပါတယ်။

ကိုးကား: Al Jazeera⁩