နေပြည်တော် မဏိရတနာကျောက်စိမ်းခန်းမမှာ COVID-19 လူနာ ၁၅၀၀ ကိုလက်ခံကုသပေးမယ်လို့ အာဏာသိမ်းစစ်ကောင်စီက လူနာကုတင်တွေတန်းစီချထားပြီးသတင်းထုတ်ပြန်ပါတယ်။ အဲဒီလူနာတွေကို စစ်ကောင်စီတပ်ရဲ့အထူးကုသမား တော်ကြီးတွေကဦးဆောင်ပြီး ၁၂ ဦးပါတဲ့ အဖွဲ့ ၂ ဖွဲ့က ကုသပေးမယ်လို့လည်း ဆိုပါတယ်။
ကိုဗစ် ပထမလှိုင်း ၊ဒုတိယလှိုင်းက ကုသရေးစင်တာတွေလို့ တစ်ခန်းနဲ့တစ်ခန်း ခြားပြီးစနစ်တကျပြင်ဆင်ထားတာမဟုတ်ဘဲ ခန်းမထဲမှာ ကုတင်တွေ တန်းစီထားတာကိုလည်းတွေ့ရပါတယ်။
“အခန်းကျယ်ထဲမှာ ကုတင်တွေတန်းစီချထားလိုက်ရင် Q center ဖြစ်သွားရောလား။ ခေါင်းကြီးတို့ကလဲ တကယ်ပဲ။ ကိုယ်တုံးတာ ချမပြရင် ကိုယ်ပဲသိတယ်။ Public တင်တော့ ခေါင်းကြီးတာ လူသိရှင်ကြားဖြစ်တာပေါ့။ နောက်ဆို လျှောက်လျှောက်မကြွားနဲ့ဟုတ်ပလား။ ကိုယ်အသုံးမကျတာ လူသိတယ်။ ကောင်းကောင်း ကန်းကန်းလဲမလုပ်နိုင်ပဲ လျှောက်လျှောက်မပြောရဘူး ဟုတ်ပလား။ ဟာသတွေ တကယ်ပဲ” လို့ စစ်ကောင်စီရဲ့သတင်းထုတ်ပြန်မှုကို ပြည်သူတစ်ယောက်ကလည်းမှတ်ချက်ပေးပါတယ်။
နေပြည်တော်မှာ ကိုဗစ် ၁၉ ကူးစက်ခံရမှုနဲ့သေဆုံးမှုက ဇူလိုင် ၁၇ ရက်အထိ့ နေပြည်တော် ကောင်စီ ၆ မြို့နယ်မှာ ၄၀၀ကျော် ကူးစက်ပြီး ၆ ဦးသေတယ်လို့ စစ်ကောင် စီကထုတ်ပြန်ပေမယ့် အမှန်တစ်ကယ်ကူးစက်ခံရပြီးသေဆုံးသူက အဆများစွာပိုနိုင်တယ်လို့ ဒေသခံအချို့က ပြောပါတယ်။
နေပြည်တော်မှာစစ်ကောင်စီရဲ့ ယန္တရားတွေမှာ တာဝန်ထမ်းဆောင်နေတဲ့ Non-CDM ဝန်ထမ်းတွေထဲ ပိုးကူးစက်မှုများပြားနေပြီး တချို့ဌာနတွေ ဌာနလုံးကျွတ် ကိုးဗစ်ကူးခံနေရတယ်လို့ ဝန်ထမ်းအချို့ကပြောပါတယ်။ နေပြည်တော် စည်ပင်သာယာ ကဝန်ထမ်းတွေဆိုရင် ပိုးကူးစက်ခံရသူအလွန်များနေပြီး နေပြည်တော်စည်ပင်ရိပ်သာမှာ ဒီတိုင်းထား ထားတယ်လို့ သိရပါတယ်။
“ခန်းမကျယ်တာနဲ့ပဲ ကုတင်တွေပစ်ထည့်လိုက်ရုံနဲ့ ကုသရေးစင်တာဖြစ်သွားရောလား စည်ပင်ရိပ်သာက P+ တွေကိုပဲ ပါရာစီတမော အရင်သွားပို့ပေးကြပါအုန်းဟဲ့”လို့ပြည်သူတစ်ဦးကလည်း မှတ်ချက်ပေးပါတယ်။
ကိုဗစ် ၁၉ ရောဂါကြောင့် သေဆုံးသူနေစဥ်ရာနဲ့ချီ ရှိနေတဲ့ မြန်မာနိုင်ငံရဲ့လူဦးရေအများဆုံး ရန်ကုန်မြို့မှာတော့ ဆေးရုံတွေမှာ လူနာတွေလက်မခံတော့ဘဲ အိမ်ပြန်ခိုင်းနေချိန်မှာ စစ်ကောင်စီက နေပြည်တော်မှာ ကိုဗစ်လူနာတွေကုသပေးဖို့ ကိုဗစ်စင်တာတည်ဆောက်ထားတယ် ဆိုပြီးတော့ သတင်းထုတ်ပြန်တာလည်းဖြစ်ပါတယ်။
