အမျိုးသားစာပေတစ်သက်တာဆုရှင်ဆရာကြီးမင်းယုဝေ ဒီကနေ့ ဇူလိုင်လ ၂၉ ရက်နေ့ မွန်းလွဲပိုင်းက ကွယ် လွန်သွားခဲ့ကြောင်း စာပေလောကအသိုင်းအဝိုင်းကနေ သိရပါတယ်။
ဆရာကြီးမင်းယုဝေဟာ အသက်-၉၃နှစ် ရှိပြီဖြစ်ပြီး ဆရာကြီး ကွယ်လွန်ခြင်းဟာ မြန်မာစာပေလောကအတွက် ကြီးစွာသော ဆုံးရှုံးမှုတစ်ရပ်ဖြစ်ကြောင်း၊ ဆရာကြီးရဲ့ နောက်ဆုံးလက်ရာမှာ “ချယ်ရီမြေမောင်တင်ထွန်း(မြန်မာစာချစ်သော ဂေါ်ရခါး)ဖြစ်ပြီး စာအုပ်မထွက်လာမီ ကွယ်လွန်သွားခြင်းဖြစ်ကြောင်းဆရာချယ်ရီမြေမောင်တင်ထွန်းက လူမူကွန်ရက်စာမျက်နှာကနေ ရေးသားခဲ့ပါတယ်။
ဆရာကြီးရဲ့ အမည်ရင်းက ဦးဝင်းမောင်ဖြစ်ပြီး ၁၉၂၈-ခုနှစ် စက်တင်ဘာလ၂၆ရက်နေ့မှာမွေးဖွားခဲ့ပါတယ်။ ဧရာဝတီတိုင်း၊ပုသိမ်ခရိုင်၊ကန်ကြီးထောင့်မြို့ဇာတိဖြစ်ပါတယ်။အသက် ၁၇နှစ်အရွယ်ကစပြီး စာပေရေးသားခဲ့တာ ကွယ်လွန်ချိန်အထိဖြစ်ပါတယ်။
ငွေတာရီမဂ္ဂဇင်းကိုစတင်တည်ထောင်ခဲ့သူ၊မြဝတီစာပေတိုက်တွင် အယ်ဒီတာချုပ်တာဝန်ထမ်းဆောင်ခဲ့သူဖြစ်ပါတယ်။လက်ရှိ မြတ်မင်္ဂလာစာစောင်နဲ့ မင်္ဂလာမောင်မယ်ကျောင်းသားလူငယ်စာစောင်တွေမှာ အယ်ဒီတာချုပ်အဖြစ် တာဝန်ထမ်းဆောင်နေသူဖြစ်ပါတယ်။
၁၉၄၄ ခုနှစ် ပုသိမ်ခရိုင် အာရှလူငယ် အစည်းအရုံး ညီလာခံ (ကျုံပျော်မြို့) အထိမ်းအမှတ် စာပေပြိုင်ပွဲတွင် ဆောင်းပါး ပထမဆု၊ ၁၉၅၄ ခုနှစ်တွင် အီစွတ်ပုံပြင်များ စာအုပ်ဖြင့် စာပေဗိမာန် ဘာသာပြန်စာပေဆု၊၁၉၇၂-ခုနှစ်မှာ”ရေခပ်ချိန်ကဗျာများ”စာအုပ်နဲ့ အမျိုးသားစာပေဆုရရှိခဲ့ပြီး ၂၀၁၂ခုနှစ်မှာအမျိုးသားစာပေ တစ်သက်တာဆု ချီးမြှင့်ခံခဲ့ရပါတယ်။တစ်သက်တာ ဓမ္မစာပေဆု၊သုတစွယ်စုံ တစ်သက်တာ စာပေဆုများလည်းချီးမြှင့်ခံခဲ့ရသူဖြစ်ပါတယ်။