ကရင်အမျိုးသားအစည်းအရုံး(KNU/KNLA) တပ်မဟာ (၆)နယ်မြေ ကော့ကရိတ်မြို့နယ်သို့ စစ်ကောင်စီတပ်က ယနေ့ ဆက်လက်ထိုးစစ်ဆင်လာ၍ တိုက်ပွဲ နှစ်ကြိမ်ဖြစ်ပွားခဲ့ကြောင်း တပ်မဟာ(၆)၏ ဒူးပလာယာခရိုင်က သတင်းထုတ်ပြန်သည်။
တားမြစ်နယ်မြေကျော်လွန်လာပါက တိုက်ပွဲဖြစ်နိုင်ကြောင်း KNUဘက်က သတိပေးထားသည့်ကြားမှ စစ်ကောင်စီတပ်က ဝင်ရောက်လာ၍ ယနေ့ညနေပိုငး၌ ကော့ကရိတ်မြို့နယ် ရေတွင်ဖြူနှင့်အံဖလေးရွာကြားတွင် တိုက်ပွဲ ၁နာရီခန့် ဖြစ်ပွားခဲ့သည်ဟုဆိုသည်။
တားမြစ်နယ်မြေထက်ကျော်လာသည့်အတွက် ကရင်အမျိုးသားလွတ်မြောက်ရေးတပ်မတော်(KNLA)က ပစ်ခတ်ခဲ့ရာ အကြမ်းဖက်စစ်အုပ်စုမှ နှစ်ဦးသေပြီး ဒါဏ်ရာရသူ လေးဦးရှိကြောင်း ဒူးပလာယာခရိုင်က ထုတ်ပြန်သည်။
ထို့နောက် ယနေ့ညနေပိုင်း၌ ကော်သနော့ရွာအနီး၌ KNU တပ်ဖွဲ့ဝင်များနှင့် စစ်ကောင်စီတပ်တို့ နာရီဝက်ကြာ တိုက်ပွဲထပ်မံဖြစ်ပွားခဲ့သည်။
Public Service Announcement
ကွင်းကလေး ရွာအနီးရှိ အကြမ်းဖက်စစ်အုပ်စုစခန်းမှ ဒါဏ်ရာရသူကို လာသယ်သည့် အကြမ်းဖက်စစ်အုပ်စု အပြန်လမ်း၌ တားမြစ်နယ်မြေထက် ကျော်လွန်လာ၍ KNLAက ပစ်ခတ်ခဲ့ခြင်းဖြစ်သည်ဟု ထုတ်ပြန်ထားသည်။ ယင်းတိုက်ပွဲတွင် ထိခိုက်ဒဏ်ရာရရှိမှုကို မသိရသေးဟု ဖော်ပြထားသည်။
ယမန်နေ့ကလည်း KNUတပ်မဟာ(၆)နှင့် စစ်ကောင်စီတပ်တို့ ကွင်းကလေးကျေးရွာအနီး၌ တိုက်ပွဲဖြစ်ပွားခဲ့ရာ ထိုစဉ်က စစ်ကောင်စီတပ်ဖွဲ့ဝင် တစ်ဦးသေ နှစ်ဦး ဒဏ်ရာရရှိခဲ့သည်။
တိုက်ပွဲဖြစ်ပွားရာဒေသသို့ စစ်ကောင်စီဘက်က စစ်အင်အားတိုးမြင့်ချထားသည်ဟုဆိုသည်။ ထို့ပြင် စစ်ကောင်စီတပ်များက ဒေသခံများအား ဖမ်းဆီးခြင်း၊ ပေါ်တာဆွဲရန် အမျိုးသားများအား ရှာဖွေခြင်း ပြုလုပ်ခဲ့သည်ဟု ဒူးပလာယာခရိုင်ကထုတ်ပြန်ထားသည်။ တိုက်ပွဲကြောင့် အနီးဝန်းကျင်ရှိကျေးရွာများမှ ဒေသခံများ စစ်ဘေးရှောင်နေကြရသည်။
အဆိုပါ ဒေသသို့ စစ်ကောင်စီတပ်က ထိုးစစ်ဆင်ရာတွင် ၎င်းနှင့်အတူ စစ်ကောင်စီလက်အောက်ခံ နယ်ခြားစောင့်တပ်ဖွဲ့(BGF)တပ်များလည်း ပါဝင်သည်ဟုဆိုသည်။
