အာဏာလုစစ်ကောင်စီအနေဖြင့် ကရင်အမျိုးသားအစည်းအရုံး(KNU)တပ်မဟာ(၅)နယ်မြေ အတွင်းသို့ ယနေ့ (ဩဂုတ် ၂၅ရက်) တစ်ရက်တည်း လေကြောင်းမှ ထောက်လှမ်းမှု ၃ကြိမ်ပြုလုပ်ခဲ့ကြောင်း တပ်မဟာ(၅) က သတင်းထုတ်ပြန်သည်။
ဖာပွန်(မူတြော်)ခရိုင်အတွင်းရှိ ပေးကေးဒဲ ကျေးရွာ အုပ်စု၊ ဘောသေထာ ကျေးရွာအုပ်စု ထီးကေဒဲ ကျေးရွာအုပ်စု နှင့် တေးမူဒဲကျေးရွာအုပ်စုရှိ ကျေးရွာများ အပေါ်သို့ စစ်သုံးဂျက်တိုက်လေယာဉ်များ ဖြင့် ယနေ့ နံနက်က သုံးကြိမ်တိတိလာရောက် ထောက်လှမ်းသွားကြောင်း ဖော်ပြထားသည်။
မည်သို့ ရည်ရွယ်ချက်ဖြင့် လာရောက်ထောက်လှမ်းသွားသည်ကို မသိရသော်လည်း ကျေးရွာသူ ကျေးရွာသားများစိုးရိမ်ကြောက်လန့်နေမှုအပေါ် ခရိုင်၊ တပ်မဟာ တာဝန်ရှိသူများမှ ရပ်ရွာပြည်သူများအား ဗုံးခိုကျင်း များ၊ ကတုတ်ကျင်းများ နှင့် အခြားအန္တရာယ်ကင်းမည့် နေရာမျိုး၌သာ တပ်လှန့်အနေအထား ဖြင့် သွားလာနေထိုင်ကြရန် ညွှန်ကြားထားကြောင်း ထုတ်ပြန်ခဲ့သည်။
အဆိုပါ စစ်သုံးဂျက်တိုက်လေယာဉ်များသည် နံနက် ၈နာရီတွင် တစ်ကြိမ်၊ ၁၀နာရီ ၅၇ မိနစ်တွင် တစ်ကြိမ်၊ ၁၁နာရီ ၁၁မိနစ် တစ်ကြိမ် လာရောက်ထောက်လှမ်းခဲ့သည်ဟုဆိုသည်။
KNU တပ်မဟာ(၅)သည် စစ်တပ်အာဏာသိမ်းပြီးနောက်ပိုင်း စစ်ကောင်စီတပ်များကို စဉ်ဆက်မပြတ် ခုခံတိုက်ခိုက်နေသည့် တပ်မဟာတစ်ခုဖြစ်ပြီး လစဉ် တိုက်ပွဲနှင့် ပစ်ခတ်မှု ရာနှင့်ချီဖြစ်ပွားလျက်ရှိသည်။