ရန်ကုန်မြို့ တာမွေမြို့နယ်တွင် ယနေ့(သြဂုတ် ၂၇ရက်) နေ့လည်ပိုင်းကပြုလုပ်သည့် စစ်အာဏာရှင်ဖြုတ်ချရေး လူထုစုပေါင်းသပိတ်ကို အကြမ်းဖက်စစ်ကောင်စီတပ်က လာရောက်ဖြိုခွင်းခဲ့ပြီး လူငယ်တစ်ဦးဖမ်းဆီးခံလိုက်ရကြောင်း သပိတ်တွင်ပါဝင်သူတစ်ဦးက ပြောသည်။
“သပိတ်ပြီးခါနီးမှာ ရဲကားတွေနဲ့ ရောက်လာပြီး ဖြိုခွင်းခံရတာပါ။ သပိတ်ထဲက လူငယ်တစ်ဦးတော့ ဖမ်းခံလိုက်ရပါတယ်။ ဘယ်သူမှန်းတော့ သေချာမသိသေးပါဘူး” ဟု ၎င်းက ပြောသည်။
အဆိုပါသပိတ်ကို ရန်ကုန်တကသကျောင်းသားများနှင့် မြို့နယ်ပေါင်းစုံသပိတ် အင်အားစုတို့ စုပေါင်း၍ “ပြည်သူအားလုံးဆင်နွှဲ လူထုလွတ်မြောက်ရေးတိုက်ပွဲ” ခေါင်းစဥ်ဖြင့် ချီတက်ဆန္ဒပြခဲ့ခြင်းဖြစ်သည်။
ရန်ကုန်မြို့တွင် ငြိမ်းချမ်းစွာ ဆန္ဒထုတ်ဖော်မှုများကို အကြမ်းဖက်နှိမ်နင်းမှုများ ရှိနေသော်လည်း လူငယ်များက နေ့စဉ်ရက်ဆက် ပုံစံမျိုးစုံဖြင့် ဆန္ဒပြမှုများ ပြုလုပ်လျက်ရှိသည်။
Public Service Announcement
