ပြည်သူတွေအနေနဲ့ အာဏာသိမ်းအကြမ်းဖက်စစ်ကောင်စီရဲ့ သတင်းအချက်အလက်တွေကို အချိန်နဲ့တပြေးညီ တိကျမှန်စွာ သတင်းပေးပို့ ကူညီဆောင်ရွက်ပေးကြဖို့ ဘားအံမြို့နယ် ပြည်သူ့အုပ်ချုပ်ရေးအဖွဲ့က စက်တင်ဘာ ၇ ရက်က ကြေညာချက်ထုတ်ပြန်လိုက်ပါတယ်။
မနေ့က စက်တင်ဘာ ၇ ရက်နေ့က အမျိုးသားညီညွတ်ရေးအစိုးရ (NUG)ရဲ့ နိုင်ငံတော်ကို အရေးပေါ်ကြေညာချက်ထုတ်ပြန်လိုက်တာနဲ့ပတ်သက်ပြီး ဘားအံမြို့နယ်ပြည်သူ့အုပ်ချုပ်ရေးအဖွဲ့က ထပ်ဆင့်ကြေညာချက်အမိန့်ထုတ်ပြန်လိုက်တာပါ။
ပြည်သူတွေအနေနဲ့ မလိုအပ်ပဲ ခရီးမသွားဖို့၊ အခြေခံစားကုန်တွေကို အတတ်နိုင်ဆုံးစုဆောင်းထားရှိဖို့နဲ့ ရန်သူဖြစ်တဲ့ စစ်ကောင်စီတပ်ဖွဲ့တွေရဲ့ သတင်းအချက်အလက်တွေကို သတင်းပေးပြီး ကူညီဖို့ ဘားအံမြို့နယ် ပြည်သူ့အုပ်ချုပ်ရေး အဖွဲ့က ပြောပါတယ်။
“သူတို့ရဲ့ လှုပ်ရှားမှုပုံစံအမျိုးမျိုးကို သတင်းပေးပို့နိုင်တယ်။ မြို့ထဲ စကစတွေရဲ့ ထူးခြားဖြစ်စဉ်မျိုးတွေကို သတင်းပေးပို့နိုင်တယ်။ မြို့ထဲ သူတို့စစ်ဆေးတဲ့နေရာတွေ၊ ဘုန်းကြီးကျောင်းတွေ၊ စာသင်ကျောင်းတွေမှာ တပ်စွဲထားတာတွေ၊ အရပ်ဝတ်နဲ့ပတ်နေတာတွေ၊ အများပြည်သူသုံးကားတွေနဲ့ အယောင်ဆောင်ပတ်နေတာတွေကို ပေးပို့နိုင်တယ်။ သူတို့ရဲ့ သတင်းတွေကိုရတဲ့အတွက် ဒီကာလမှာ ကြိုတင်ပြင်ဆင်မှုအပိုင်းကို ထိထိရောက်ရောက်လုပ်နိုင်တယ်” လို့ ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောပါတယ်။
စက်တင်ဘာ ၇ ရက်နေ့ကစပြီး အာဏာရှင်ဆန့်ကျင်ရေး ခုခံတွန်းလှန်စစ် စတင်ပြီးဖြစ်တာကြောင့် ပြည်သူတွေအနေနဲ့ လှည်းနေလှေအောင်း မြင်းဇောင်းမကျန် ရရာနည်းနဲ့ တွန်းလှန်ကြဖို့ ၊စစ်ကောင်စီရဲ့ လက်အောက်ခံဖြစ်တဲ့ လက်နက်ကိုင်တပ်ဖွဲ့၀င်တွေ၊ အရပ်ဘက်ဌာနဆိုင်ရုံးက Non-CDM ၀န်ထမ်းတွေ၊ စစ်ကောင်စီနဲ့ အကျိုးတူပူးပေါင်းလျက်ရှိတဲ့ လူပုဂ္ဂိုလ်တွေအားလုံးအနေနဲ့ ပြည်သူလူထုနဲ့ ပူးပေါင်းပါ၀င်ကြဖို့ ဘားအံမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ထားပါတယ်။
ဒါ့အပြင် ရပ်ကွက်ကျေးရွာပြည်သူ့အုပ်ချုပ်ရေးမှူးတွေနဲ့ ပြည်သူ့ကာကွယ်ရေးတပ်ဖွဲ့၀င်တွေအနေနဲ့ ပြည်သူလူထုဘေးကင်းလုံခြုံဖို့အတွက် စနစ်တကျပူးပေါင်းစီမံဆောင်ရွက်ပြီး စည်းမျဉ်းစည်းကမ်း ကျင့်၀တ်တွေကို လိုက်နာစောင့်ထိန်းကာ ဆက်လက်တော်လှန်ကြဖို့ကိုလည်း ထုတ်ပြေကြေညာခဲ့ပါသေးတယ်။
ဘားအံမြို့နယ်ပြည်သူ့အုပ်ချုပ်ရေးအဖွဲ့နဲ့ ဘားအံမြို့နယ် ပြည်သူ့ကာကွယ်ရေးအဖွဲ့တို့ဟာ နိုင်ငံတော်အချုပ်အခြာအာဏာကို လက်နက်အားကိုးပြီး အဓမ္မသိမ်းပိုက်ခဲ့တဲ့ စစ်ကောင်စီကို နည်းလမ်းပေါင်းစုံနဲ့ ခုခံတော်လှန်လျက်ရှိတယ်လို့ ထုတ်ပြန်ချက်အရ သိရပါတယ်။