ကျောက်ကြီးမြို့နယ်ရှိ အာဏာသိမ်းစစ်ကောင်စီတပ်စခန်းတစ်ခုကို ယနေ့နံနက်ပိုင်းတွင် တိုက်ခိုက်သိမ်းပိုက်ခဲ့သည်ဟု ကရင်အမျိုးသားအစည်းအရုံး(KNU) တာဝန် ရှိသူတစ်ဦးက ပြောသည်။
KNU တပ်မဟာ(၅)နယ်မြေ နှင့် တပ်မဟာ(၃) နယ်မြေအကြားရှိ စစ်ကောင်စီ၏ ကပေါတူစခန်းကို ယနေ့ နံနက် ၆နာရီမှ စတင်တိုက်ခိုက်ခဲ့ခြင်းဖြစ်သည်။
“နံနက် ၆နာရီစတိုက် ၈နာရီမှာပြီးသွားတယ်။ ကျွန်တော်တို့ဘက်မှာ ထိခိုက်မှုမရှိဘူး။စခန်းကိုသိမ်းလိုက်ပြီ” ဟု KNU တာဝန်ရှိသူက ပြောသည်။
အဆိုပါ တပ်စခန်းမှ လက်နက်ခဲယမ်းများလည်း သိမ်း ဆည်းရမိခဲ့ပြီး တိုက်ပွဲ၌ ထိခိုက်ကျဆုံးမှု အခြေအနေများကို အသေးစိတ်ကိုမူမသိရသေးကြောင်း ၎င်းက ဆက်ပြောသည်။
Public Service Announcement
KNU တပ်မဟာ(၅)အနေဖြင့် မတ်လ ၂၇ရက်နှင့် ဧပြီ ၂၇ရက်တွင်လည်း စစ်ကောင်စီတပ်စခန်း နှစ်ခုကို တိုက်ခိုက်သိမ်းပိုက်ခဲ့သည်။
ထိုသို့ တိုက်ခိုက်သိမ်းပိုက်ပြီးနောက် KNU နယ်မြေအတွင်းရှိ အင်အားနည်းသည့် စစ်ကောင်စီတပ်စခန်းအချို့သည် စခန်းကို စွန့်ခွာကာအ ခြား အင်အားများသည့် တပ်စခန်းများသို့ ပူးပေါင်းသွားခြင်းများလည်းရှိခဲ့သည်။
KNUသည် စစ်တပ်အာဏာသိမ်းမှုကို ဆန့်ကျင်ကန့် ကွက်ထားပြီး စစ်ကောင်စီတပ်နှင့် တိုက်ပွဲများ ဆက် တိုက်ဖြစ်ပွားလျက်ရှိသည့် တိုင်းရင်းသားလက်နက်ကိုင်တပ်ဖွဲ့ဖြစ်သည်။
(ပြီးခဲ့သည့် ဧပြီလက KNU သိမ်းခဲ့သော သော်လဲထာတပ်စခန်း ဓာတ်ပုံဖြစ်သည်)
