ကရင်အမျိုးသားအစည်းအရုံး(KNU) ထိန်းချုပ်နယ်မြေ တပ်မဟာ(၃)နှင့် တပ်မဟာ(၅) အကြားရှိ ကဘောတူအရပ်မှ အာဏာသိမ်းစစ်ကောင်စီ၏ အခြေစိုက်တပ်စခန်းကို ယနေ့ နံနက်ပိုင်းတွင် တိုက်ခိုက်သိမ်းပိုက်ခဲ့ကြောင်း KNU ဗဟိုသတင်းနှင့် ပြန်ကြားရေးဌာနက ထုတ်ပြန်သည်။
စက်တင်ဘာ ၉ရက် နံနက် ၄နာရီခန့်အချိန်တွင် KNU တပ်မဟာ(၃)မှ ကရင်အမျိုးသားကာကွယ်ရေးတပ်မတော်(KNDO)တပ်နှင့် KNU တပ်မဟာ(၅)မှ ကရင်အမျိုးသားလွတ်မြောက်ရေးတပ်မတော်(KNLA ) တပ်ဖွဲ့များ ပူးပေါင်း၍ တိုက်ခိုက်ခဲ့ခြင်းဖြစ်ကြောင်း ဖော်ပြခဲ့သည်။
အာဏာသိမ်းစစ်ကောင်စီ၏ အခြေစိုက်တပ်စခန်း ကို KNU လက်အောက်ခံတပ်များက တိုက်ခိုက်သိမ်းပိုက်ပြီးနောက် အခင်းဖြစ်ပွားသောနေရာနှင့် အနီးတဝိုက်သို့လည်းကောင်း၊ KNU တပ်မဟာ(၅)နယ်မြေ မူတြော်(ဖာပွန်)ခရိုင် လယ်မူပလော ကျေးရွာသို့လည်းကောင်းလေယာဥ်ဖြင့် လာရောက်ကြည့်ရှုထောက်လှမ်းခဲ့သည်ဟု ဆိုသည်။
တိုက်ပွဲဖြစ်စဥ်နှင့် ထိခိုက်ကျဆုံးမှုများကို ဆက်လက်ဖော်ပြမည်ဟုလည်း ထုတ်ပြန်ခဲ့သည် တိုက်ခိုက်ခံရသည့် စစ်ကောင်စီ၏ ကဘောတူတပ်စခန်းသည် ကျောက်ကြီးမြို့နယ်အတွင်း တည်ရှိသည်။
Public Service Announcement
