မြန်မာစစ်တပ်အဆင့်မြင့်အရာရှိတွေနဲ့ သူတို့ရဲ့လက် အောက်ခံ အဆင့်ဆင့်တပည့်တွေ တာဝန်ခံမှု ရှိစေရေး၊ ဒဏ်ခတ်အရေးယူနိုင်ရေးအတွက် နိုင်ငံတကာအသိုက် အဝန်းနဲ့ နီးကပ်စွာပူးပေါင်း ဆောင်ရွက်သွားမယ်လို့ ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းက ပြောပါတယ်။
အကြမ်းဖက်စစ်တပ်အနေနဲ့ အပြည်ပြည်ဆိုင်ရာ ဥပဒေတွေကို လေးစားလိုက်နာမှုရှိစေဖို့ အာဆီယံ၊ ကုလသမဂ္ဂ၊ အပြည်ပြည်ဆိုင်ရာ ရာဇဝတ်မှုတွေအတွက် တရားစီရင်ရေးခုံရုံး၊ ဒေသတွင်းနဲ့ ဒေသအပြင်ရှိ နိုင်ငံများအပါအဝင် နိုင်ငံတကာသိုက်အဝန်းနဲ့ အနီးကပ်ပူးပေါင်းဆောင်ရွက်မယ် လို့ မြန်မာသံအမတ်ကြီးက ကုလသမဂ္ဂအထွေထွေညီလာခံ၊ ဆဋ္ဌမကော်မတီ မျက်နှာစုံညီအစည်းအဝေးမှာ ပြောဆိုခဲ့ပါတယ်။
စစ်တပ်ဟာ ငြိမ်းချမ်းစွာ ဆန္ဒထုတ်ဖော်နေသူတွေကို ကျည်ဆန်အစစ်တွေနဲ့ လွန်စွာ အင်အား သုံးပစ်ခတ်ခြင်း၊ တရားမဝင် ဖမ်းဆီးထိန်းသိမ်းခြင်း၊ နှိပ်စက်ခြင်း၊ ဥပဒေနဲ့အညီ အယူခံလျှောက်ထားခွင့်ကို ပိတ်ပင်ထားခြင်း၊ စွပ်စွဲခံထားရသူများအနေနဲ့ ဥပဒေကြောင်းအရ ကိုယ်စားပြုမှုမရရှိခြင်း စတာတွေ ချိုးဖောက်နေတယ်လို့ သံအမတ်ကြီးက ကုလသမဂ္ဂကို အစီရင်ခံပါတယ်။
နောက်ပြီး မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားရဲ့ကနဦးရရှိတဲ့ သက်သေခံအချက်များအပေါ် ရှေ့ပြေးကောက်ချက်ချမှုအရ စစ်တပ် ကျူးလွန်ခဲ့တဲ့ ပြစ်မှုတွေဟာ လူသားမျိုးနွယ် အပေါ် ကျူးလွန်တဲ့ ရာဇဝတ်မှုမြောက်ကြောင်းနဲ့ တိုင်းရင်းသားတွေအပေါ် ဖိစီးနှိပ်စက်မှု၊ အမျိုးသမီးတွေအပေါ် လိင်အကြမ်းဖမ်းမှု၊ လူမဆန်စွာနှိပ်စက်မှုတို့ကို ကျူးလွန်တာကို တွေ့ရတယ်လို့ ဆက်ပြောပါတယ်။
Public Service Announcement
စစ်တပ်ရဲ့ အဲဒီပြစ်မှုတွေအပေါ် တရားစီရင်နိုင်ဖို့အတွက် အမျိုးသားညီညွတ်ရေးအစိုးရဟာ ပူးပေါင်းပါဝင်ဆောင်ရွက်ဖို့ အသင့်ရှိပြီး ၂၀၀၂ ခုနှစ်ကစလို့ မြန်မာနိုင်ငံ အတွင်း ကျူးလွန်ခဲ့တဲ့ နိုင်ငံတကာပြစ်မှုတွေကို ICC ရဲ့တရားစီရင်ထုံးနဲ့အညီစီရင်ဖို့ လက်ခံထားတယ်လို့ သံအမတ်ကြီးက ထပ်လောင်းပြောပါတယ်။
