ကရင်အမျိုးသားအစည်းအရုံး(KNU) တပ်မဟာ(၁)နယ်မြေ သထုံမြို့နယ်တွင် စစ်ကောင်စီတပ်၏ ရိက္ခာပို့ယာဉ်တန်းကို မိုင်းဖြင့်နှစ်ကြိမ်တိုက်ခိုက်ခဲ့ရာ ကားတစ်စီး ထိခိုက်ပျက်စီးသွားကြောင်း တပ်မဟာ(၁)တာဝန်ရှိသူတစ်ဦးက ပြောသည်။
သိမ်ဆိပ် -လေးကေ လမ်းအတိုင်း လေးကေဘက်သို့ ဦးတည်လာသည့် စစ်ကောင်စီတပ် ရိက္ခာပို့ ယာဉ်တန်းကို ဇန်နဝါရီ ၁၄ရက် နံနက် အစောပိုင်း ၂နာရီခန့်တွင် မိုင်းဖြင့်တိုက်ခိုက်ရာ ထိခိုက်မှုမရှိခဲ့ကြောင်း၊ ရိက္ခာပို့ပြီး ပြန်လာသည့် အဆိုပါယာဉ်တန်းကို ယနေ့ မွန်းလွဲ ပိုင်းတွင် ထပ်မံတိုက်ခိုက်ခဲ့ရာ ကားတစ်စီးထိခိုက်ခဲ့သည်ဟု ဆိုသည်။
“ထုံးဘိုလေးနဲ့ ထုံးဘိုကြီးကြား ရွှေဘိုတံတားမှာ။ သူတို့ ရိက္ခာပို့ပြီး ပြန်ဆင်းလာမှ သူတို့ ဖြတ်ပြီးတိုက်တာ ကားတစ်စီးထိပြီး ကားက ပျက်စီးသွားတယ်။ ပျက်စီးပြီးတော့ မောင်းလို့တော့မရဘူး သူတို့ ပြန်ဆွဲသွားတယ်”ဟု တပ်မဟာ(၁)တာဝန်ရှိသူက ပြောသည်။ စစ်ကောင်စီတပ်မှ ထိခိုက်သေဆုံးမှု ရှိ၊မရှိကို မသိရသေးဟု ၎င်းက ဆိုသည်။
KNUတပ်မဟာ(၁)နယ်မြေတွင် စစ်ကောင်စီတပ်၏ ခမရ(၉)တပ်မှ လက်နက်ကြီးများ ရမ်းသမ်း ပစ်ခတ်၍ ဒေသခံများ စိုးရိမ်ထိတ်လန့်မှုများဖြင့်နေထိုင်နေကြရကြောင်းလည်း တပ်မဟာ(၁) တာဝန်ရှိသူက ပြောသည်။
Public Service Announcement
“ဒေသအခြေအနေကတော့ စကစက လက်နက်ကြီးတွေ ရမ်းသန်းပစ်ခတ်တော့ ဝီယော်ကျေးရွာ အုပ်စု ဝီယော်ရယ်၊ ထုံးဘိုကြီးရယ် ထုံးဘိုလေးရယ် အဲဒီ ဒေသခံတွေဟာ ညဘက် အိမ်မှာ အိပ်လို့ မရဲဘူး။ ဘေးလွတ်ရာထွက်ပြေးပြီး အိပ်တယ်။ နေ့လည်ဘက် ပြန်လာပြီးတော့ အိမ်ကြည့်တယ်”ဟု ၎င်းက ဆိုသည်။
