အနုပညာလောကတွင် သရဲလေးကောင် ပြဇာတ်ဖြင့်နာမည်ကြီးသည့် ဟာသရုပ်ဆောင် ဖိုးဖြူ ယနေ့ (မတ် ၁၁)ည တွင် အဆုတ်ရောဂါဖြင့်ကွယ်လွန်သွားပြီဖြစ်သည်။
မြောက်ဥက္ကလာ OSC ဆေးရုံ၌ ယနေ့ ည ၆ နာရီ ၄၅ တွင်ကွယ်လွန်သွားခြင်းဖြစ်ကြောင်း ၎င်းနှင့်ရင်းနှီးသည့်အနုပညာရှင်တစ်ဦးကပြောသည်။
ကွယ်လွန်ချိန်၌ အသက် ၆၃ နှစ်အရွယ်ရှိပြီဖြစ်ပြီး ၎င်းကွယ်လွန်သွားသည့် အပေါ် ဝမ်းနည်းကြောင်း အနုပညာရှင်များကရေးသားထားသည်။
“ မြပုဏ္ဏမာအဖွဲ့ရဲ့ လူရွှင်တော် (ဦး)ဖိုးဖြူ ကွယ်လွန်သွားတဲ့အတွက် အထူးဝမ်းနည်းကြေကွဲရပါတယ်။ (ဦး)ဖိုးဖြူ ကောင်းရာသုဂတိသို့ရောက်ပါစေ။” ဟု House of Media & Entertainment ၏ ဖေ့စ်ဘွတ်ခ်၌ရေးသားထားသည်။
Public Service Announcement
နာရေးအစီအစဉ်အတွက် တိုင်ပင်နေဆဲဖြစ်ပြီး Dead Body ကို မတ် ၁၂ ရက်နံနက်တွင် ရေဝေးသို့ပို့ဆောင်မည်ဖြစ်ကြောင်း ၎င်းနှင့်ရင်းနှီးသူတစ်ဦးကပြောသည်။
ဖိုးဖြူသည် ဘီပိုး စီပိုး ရောဂါခံစားခဲ့ရသောကြောင့် အနုပညာလောကမှခေတ္တ ပျောက်သွားခဲ့ပြီး ရောဂါမှသက်သာလာချိန်၌ ဘီပိုး စီပိုး ဝေဒနာခံစားရသူများအတွက် ပရဟိတဆေးခန်း ဖွင့်၍ ကူညီပေးခဲ့သည်။
၁၉၉၃ တွင် သရုပ်ဆောင်လွင်မိုးနှင့်တွဲ၍ သရဲလေးကောင်နှင့် ကျွန်တော် ပြဇာတ်တွင် အရိုင်း ၊ကုသိုလ် ၊ကင်းကောင် ၊ဖိုးဖြူတို့က သရဲလေးကောင်အဖြစ်ပါဝင်ခဲ့ရာ ယင်းပြဇာတ်ဖြင့်ပရိသတ်အားပေးမှုအများအပြားရရှိခဲ့သည်။
