ကေအဲန်ယူ-ကော်သူးလေးအုပ်ချုပ်နယ်မြေဖြစ်တဲ့ ဒူးပလာယာခရိုင် ကော့ကရိတ်မြို့နယ်အတွင်းမှာ စစ်ကောင်စီတပ်နဲ့ KNLA တပ်မဟာ ၆ တို့ကြား ပစ်ခတ်တိုက်ခိုက်မှုဖြစ်ပွားခဲ့ပြီး ဒေသခံပြည်သူ တစ်သောင်း ကျော် ထွက်ပြေးတိမ်းရှောင်ခဲ့ရတယ်လို့ ကေအဲန်ယူက သတင်းထုတ်ပြန်ပါတယ်။
ကော့ကရိတ်မြို့နယ်အတွင်းမှာ စစ်ကောင်စီက စစ်ဆင်ရေးလုပ်နေတာဖြစ်ပါတယ်။
ဒူးပလာယာခရိုင် တပ်မဟာ ၆ ကော့ကရိတ်မြို့နယ်အတွင်းမှာ မတ်လ ၂၀ ရက် ညအချိန်က စစ်ကောင်စီတပ်ဟာ တောနော်ဆေးရုံကိုကျော်လွန်ပြီး တက်လာတဲ့အတွက် ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၆ နဲ့ ပစ်ခတ်တိုက်ခိုက်မှုဖြစ်ပွားခဲ့ပြီး မတ်လ ၂၁ ရက်နေ့ မနက်ပိုင်းကလည်း ပစ်ခတ်တိုက်ခိုက်မှု အကြီးအကျယ်ဖြစ်ပွားခဲ့သေးတာပါ။
ဒီလို ပစ်ခတ်တိုက်ခိုက်မှုဖြစ်ပွားချိန်မှာ စစ်ကောင်စီတပ်ဟာ တိုက်ပွဲဖြစ်ပွားတဲ့နေရာနဲ့ အနီးအနားရှိ ကျေးရွာတွေအတွင်းကို လက်နက်ကြီးနဲ့ရမ်းသမ်းပစ်ခတ်ခဲ့လို့ ဒေသခံပြည်သူလူထုပေါင်း (၁၂၀၀၀) ကျော်တို့ဟာ ဘေးလွတ်ရာကို ထွက်ပြေးတိမ်းရှောင်နေခဲ့ရတယ်လို့ ကေအဲန်ယူရဲ့ထုတ်ပြန်ချက်မှာ ဖော်ပြထားပါတယ်။
Public Service Announcement
ဒါ့အပြင် မိုးရွာသွန်းမှုတွေကြောင့် ကော့ကရိတ်မြို့နယ် အရှေ့ဘက်ခြမ်းဖြစ်တဲ့ ထိုင်း-မြန်မာနယ်စပ် သောင်ရင်းမြစ်ကမ်းနံဘေးမှာ တိမ်းရှောင်နေရတဲ့ လေးကေကော်စစ်ဘေးရှောင်တွေရဲ့ အဆောက်အဦးတွေ၊ အမိုးအကာတွေ လွင့်စင်ပျက်စီးသွားခဲ့ရပြီး အဲ့ဒီအတွက် အဆောင်တွေကိုအသစ်တဖန်ပြည်လည်တည်ဆောက်ပေးရတယ်လို့ စစ်ရှောင်အရေးကူညီပေးနေတဲ့ ကေအဲန်ယူဒေသတာဝန်ရှိသူတွေက ဆိုပါတယ်။
လတ်တလောမှာ စစ်ဘေးရှောင်တွေ နေထိုင်ဖို့အတွက် အဆောင် အလုံး (၃၀၀)ခန့် လိုအပ်ပြီး အဆောင်တစ်ဆောင်အနေနဲ့ ကုန်ကျစရိတ်မှာ ထိုင်းဘတ်ငွေ (၁၂၀၀)ရှိကာ စစ်ဘေးရှောင်ပြည်သူလူထုတွေအတွက် ကူညီမယ်ဆိုပါက ကေအဲန်ယူထံကို ဆက်သွယ်နိုင်တယ်လို့ ထုတ်ပြန်ထားတာဖြစ်ပါတယ်။
