▪️KNU တပ်မဟာ(၁)နယ်မြေ၌ စစ်ကောင်စီတပ်များ မကြာခဏ တိုက်ခိုက်ခံရ
ကရင်အမျိုးသားအစည်းအရုံး(KNU/KNLA) တပ်မဟာ (၁)နယ်မြေ ဘီးလင်းမြို့နယ်တွင် စစ်ကောင်စီတပ်ယာဉ်တန်းကို ယနေ့ မနက်ပိုင်းက ပြောက်ကျားတိုက်ခိုက်ခဲ့ကြောင်း သထုံပြည်သူ့ကာကွယ်ရေးတပ်ဖွဲ့(PDF) က သတင်းထုတ်ပြန်သည်။
မတ်လ ၂၉ရက် နံနက် ၁၁နာရီခန့်တွင် ရန်ကုန်-မော်လမြိုင်ကားလမ်းပေါ်မှ စစ်ကောင်စီ၏ ၄၁စီးပါ ကားတန်းအား ဘီးလင်းမြို့နယ်၊ ချောင်းပြန့်ကျေးရွာအနီးတွင် KNLA နှင့် သထုံ PDF ပူးပေါင်း တပ်ဖွဲ့တို့မှ လက်နက်ကြီးလက်နက်ငယ်များဖြင့်ပြောက်ကျားဝင်ရောက်တိုက်ခိုက်ခဲ့သည်ဟု ဖော်ပြထားသည်။
ပူးပေါင်းအဖွဲ့မှ ထိခိုက်ကျဆုံးမှုမရှိကြောင်းဖော်ပြထားပြီး စစ်ကောင်စီတပ်မှ ထိခိုက်ကျဆုံးမှုရှိမရှိ အခြေအနေကို ဖော်ပြမထားပေ။
KNLA/PDF ပူးပေါင်းအဖွဲ့သည် သထုံမြို့နယ်၊ ကမာစိုင်ကွက်သစ်ရှိ တော်ဝင်ချယ်ရီစားသောက်ဆိုင် ၌ ကင်းပုန်းဝပ်နေသော စစ်ကောင်စီ၏ တပ်ဖွဲ့ဝင်များအား လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း ထုတ်ပြန်သည်။
စစ်ကောင်စီတပ်သည် ယမန်နေ့(မတ်လ ၂၈ရက်)ကလည်း ဘီးလင်းမြို့မရဲစခန်း၊ မြို့နယ်ထွေအုပ်ရုံးနှင့် ဘီးလင်းတိုးဂိတ်အဟောင်း၌ တပ်စွဲထားသည့် စစ်ကောင်စီတပ်များကို တိုက်ခိုက်ခဲ့သည်။ အဆိုပါ ဖြစ်စဉ်များ၌ စစ်ကောင်စီတပ်မှ သေဆုံးထိခိုက်မှုရှိမရှိ အခြေအနေများကို ဖော်ပြမထားပေ။