▪️၎င်းကိုယ်တိုင်လည်း ပစ်သတ်ဖမ်းဆီးခံရ၍ အချင်းချင်းပစ်သတ်မှုတွင် လေးဦးသေ
အမျိုးသမီးတစ်ဦးအား အဓမ္မပြုကျင့်ရန်ကြိုးပမ်းသည့် စစ်ကောင်စီတပ်သားတစ်ဦး ထိန်းသိမ်းခံရပြီးနောက် အခြားတပ်ဖွဲ့ဝင်သုံးဦးကို သေနတ်ဖြင့်ပစ်သတ်ပြီး ထွက်ပြေးစဥ် ၎င်းကိုယ်တိုင်လည်း ပြန်လည်ပစ်သတ်ခံလိုက်ရသည်။
အချင်းချင်းပစ်သတ်၍ စစ်ကောင်စီတပ်ဖွဲ့ဝင်လေးဦးစလုံးသေဆုံးခဲသည့် ဖြစ်စဥ်မှာ ရှမ်းပြည်နယ်မြောက်ပိုင်း ကွတ်ခိုင်မြို့နယ် ဟိုနောင်ကျေးရွာတွင် ယမန်နေ့ (ဧပြီ ၁၂ရက်)က ဖြစ်ခဲ့သည်ဟု ဒေသခံများက ပြော သည်။
ထို့နေ့ နံနက် ၁၀နာရီခန့်က ဟိုနောင်ကျေးရွာမှ အသက် (၅၀)အရွယ်ခန့်အမျိုးသမီးတစ်ဦးကို စစ်ကောင်စီ၏ ခမရ(၃၃၆)မှ တပ်သားတစ်ဦးက အဓမ္မပြုကျင့်ရန် ကြိုးပမ်းခဲ့ကြောင်း၊ အမျိုးသမီးက အော်ဟစ်အကူအညီတောင်းရာ ပတ်ဝန်းကျင်မှ ဒေသခံအများအပြားရောက်ရှိလာပြီးနောက် အဆိုပါ တပ်သားသည် ထွက်ပြေးသွားခဲ့သည်ဟု ဒေသခံတစ်ဦးက ပြောသည်။
Public Service Announcement
အထက်ပါအဖြစ်အပျက်ကို ဒေသခံများက ခမရ (၃၃၆) စခန်းချရာနေရာသို့ သွားရောက်အကြေင်းကြားပြီး အရေးယူပေးရန် တောင်းဆိုခဲ့ရာ တပ်ခွဲမှူးဆိုသူက အရေးယူပေးမည်ဟု ကတိပြုခဲ့သည်။
” စစ်သားက ရွာထဲကနေ ထွက်ပြေးသွားပြီး သူ့တပ်ကိုပြန်ရောက်နေတာ။ တပ်ခွဲမှူးက ယာယီချုပ်ထားပြီး ဘယ်လိုအရေးယူမလဲ၊ကြေအေးမလဲဆိုတာ ရွာကလူတွေနဲ့ တိုင်ပင်နေတုန်းမှာ စစ်သားသုံးယောက်ကို သေနတ်နဲ့ ပစ်ပြေးတာ။ သုံးယောက်စလုံးသေတယ်။ ကျန်တဲ့စစ်သားတွေကလည်း လိုက်ဖမ်းကြတာ ညနေကျတော့ အသေပြန်မိတယ်”ဟု ကွတ်ခိုင်ဒေသခံတစ်ဦးကပြောသည်။
ဒေသခံအမျိုးသမီးအား အဓမ္မပြုကျင့်ရန် ကြိုးပမ်းသည့် စစ်သားသည် အခြားစစ်သားသုံးဦးအား သေနတ်ဖြင့် ပတ်သတ်ပြီးထွက်ပြေးသွားချိန်မှာ နံနက် ၁၀နာရီခန့်ဖြစ်သည်။ သေနတ်တစ်လက်ဖြင့် ထွက်ပြေးသွားသည့် ယင်းစစ်သားကို စစ်ကောင်စီတပ်ဖွဲ့က လိုက်လံရှာဖွေခဲ့ရာ ညနေ မိုးချုပ်ကာစတွင် ဟိုနောင်ရွာအနီးတောစပ်၌ ပြန်တွေ့ခဲ့သည်။
” ရွာနားမှာပဲ ပြန်တွေ့တာ။ သေနတ်နဲ့ ပစ်ဖမ်းတော့ သေသွားတယ်။ ပြောရရင် စစ်တပ်ဘက်က သူတို့ချင်းပစ်ပြီး လေးယောက်သေသွားတာ”ဟု ဒေသခံတစ်ဦးကပြောသည်။ လေးဦးစလုံး တပ်သားအဆင့်ဖြစ်သည်ဟုဆိုသည်။
စစ်ကောင်စီတပ်ဖွဲ့ဝင်များသည် အရပ်သားများအား သတ်ဖြတ်ခြင်း၊ အဓမ္မပြုကျင့်ခြင်းကဲ့သို့ ဆိုးရွားသည့် လူ့အခွင့်အရေးချိုးဖောက်မှုများ မကြာခဏပြုလုပ်နေပြီး နိုင်ငံတကာအနေဖြင့် ထိထိရောက်ရောက်နှင့် မြန်မြန်ဆန်ဆန်အရေးယူပေးရန် အမျိုးသားညီညွတ်ရေးအစိုးရ(NUG)က ကြေငြာချက်ထုတ်ပြန် တောင်းဆိုထားသည်။
စစ်တပ်အာအာဏာသိမ်းပြီးနောက် စစ်ကိုင်းတိုင်း၊ ချင်း၊ ကရင်နီ၊ ကချင်၊ ရှမ်းနှင့် မကွေးတိုင်းတို့ တွင် ဆိုးရွားသည့် လူ့အခွင့်အရေးချိုးဖောက်မှုများကို စစ်ကောင်စီတပ်ဖွဲ့ဝင်များက ကျုးလွန်နေသည်။
